މާލޭގައި ކުޑަ އަންހެން ކުއްޖަކު ގެއްލިގެން ހޯދަނީ

މާލޭގައި ދިރިއުޅޭ ކުޑަކުއްޖަކު ގެއްލިގެން އޭނާ ހޯދުމުގެ މަސައްކަތް މޯލްޑިވިސް ޕޮލިސް ސާވިސް އިން ފަށައިފިއެވެ.

ފުލުހުން ބުނީ ގެއްލިގެން ހޯދަމުން އަންނަނީ ތ. ވިލުފުށި، ހުވަނދުމާގެ، މަރްޔަމް ނަފްޙާ ނާޞިރު، 15 ކަމަށެވެ.

އޭނާ ހޯދުމުގެ މަސައްކަތް ފުލުހުންފަށާފައިވަނީ  އޭނާ ދިޔަ ވަކިތަނެއް ނޭނގި ގެއްލިފައިވާކަމަށް ޢާއިލާއިން ފުލުހުންނަށް ރިޕޯރޓްކުރުމާ ގުޅިގެންނެވެ. 

ނަފްޙާ ގެއްލިގެން އޭނާގެ އާއިލާއިން އޭނާ ހޯދަން ފަށާފައިވަނީ މިދިޔަ އާދިއްތަ ދުވަހުގެ ދަންވަރު 00:30 އިން ފެށިގެންނެވެ. ފުލުހުންނަށް އެ މައްސަލަ ހުށަހަޅާފައިވަނީ  އެ ދުވަހުގެ ހެނދުނު 10:35 ގައިކަަމަށް ފުލުހުން ބުނެއެވެ.

މަރްޔަމް ނަފްޙާ ނާޞިރު އެންމެ ފަހުން ފެނިފައިވަނީ އޭނާ މާލޭގައި ދިރިއުޅޭ ގެއިން ކަމަށް ފުލުހުން ބުނެއެވެ. އެހެން ނަމަވެސް އެ ގެއަކީ ކޮބައިކަމެއް ފުލުހުން ހާމައެއްނުކުރެއެވެ. އެ ކުއްޖާ ގެއްލުނުއިރު ހުރީ ހުދުކުލައިގެ ޓޮޕަކާއި، އައިސް ބްލޫ ކުލައިގެ ޖިންސެއް ލައިގެން ކަމަށް ފުލުހުން ބުނެއެވެ. އެ ކުއްޖާއަކީ ބުރުގާ އަޅާ ކުއްޖެކެވެ. އެހެން ނަމަވެސް އޭނާ ގެއްލުނުއިރު އަޅައިގެން ހުރި ބުރުގާގެ ކުލަ ނޭގޭ ކަމަށް ފުލުހުންގެ ވެބްސައިޓުގައި ބުނެފައިވެއެވެ.

ގެއްލިގެން ހޯދާ ކުއްޖަކީ ލޮލުގެ ކަޅީގެ ކުލަ ކަޅު، ހަށިގަނޑު ހިކިކޮށް ހުންނަ ކުއްޖެއް ކަމަށް ފުލުހުން ބުނެއެވެ.

އެނާއާއި ގުޅެ އެއްވެސް މަޢުލޫމާތެއް ލިބިލައްވާފައިވާ ނަމަ އެ މަޢުލޫމާތެއް ފުލުހުންގެ ހޮޓްލައިން ނަންބަރު 3322111 އަށް ނުވަތަ އެމަޖެންސީ ނަންބަރު 119 އަށް ނުވަތަ ފެމިލީ އެންޑް ޗައިލްޑް ޕްރޮޓެކްޝަން ޑިޕާޓްމަންޓްގެ ނަންބަރު 9790163 އަށް ގުޅުއްވައި ހިއްސާކުރެއްވުން އެދެކަމަށް ފުލުހުންބުނެއެވެ.