ގާނޫނުގައި ބުނެފައިވާ މިންވަރަށްވުރެ މަދުން ލިއޯ ޓްރޭޑުން ރޯދަ އެލަވަންސް ދީފި

ލިއޯ ޓްރޭޑިން ކޮންޕެނީގެ މުއައްޒަފުންނަށް ގާނޫނުގައި ބުނެފައިވާ މިންވަރަށްވުރެ މަދުން ރޯދަ އެލަވަންސް ދިނުމުން އެކުންފުނީގެ ބައެއް މުވައްޒަފުން ނުރުހުން ފާޅުކޮށްފިއެވެ.

"ދުވަސް ނޫހަށް" މައުލޫމާތު ދެމުން އެ ކުންފުނީގެ މުވައްޒަފަކު ބުނީ މިއަހަރު ރޯދަ އެލަވަންސްގެ ގޮތުގައި ބައެއް މުވައްޒަފުންނަށް 1500 ދިން އިރު އަނެއްބައި މުވައްޒަފުންނަށް 600 ރުފިޔާ ވެސް ދީފައިވާ ކަމަށެވެ.

"ބައެއް މުވައްޒަފުންނަށް 1500 ރުފިޔާ ދީފަ އައްޑޫގައި މަސައްކަތްކުރާ މުވައްޒަފުންނަށް ދިނީ 600 ރުފިޔާ. އެއީ އެއްވެސް އުސޫލެއް ނޫން ދެއްތޯ؟ ހުރިހާ ކުދިން ވެސް ތިބީ ހިތް ހަމަ ނުޖެހިފަ. އެހެން ނަމަވެސް ތުންތުން މަތިން އެ ވާހަކަތައް ދެއްކުން ނޫންކަމެއް އަދި ނުކުރޭ. އަޅުގަނޑުމެންނަށް ދެމުން ވެސް ބުނި މިދެވެނީ ކުޑައެއްޗެއްކަން އެނގެޔޭ،" ދުވަސް ނޫހާއި ވާހަކަ ދެއްކި އެ ކުންފުނީގެ މުވައްޒަފެއް ބުންޏެވެ.

"ދުވަހާއި" ވާހަކަ ދެއްކި ދެވަނަ މީހާ ވެސް ބުނީ ރޯދައެލަވަންސް ދީފައިވާ މިންވަރާއި މެދު ހިތްހަމަ ނުޖެހޭ ކަމަށެވެ. ރޯދަ އެލަވަންސް ދިން ގޮތުގެ އިތުރުން ވެސް މެނޭޖުމަންޓުން ކަންތައްތައް ފާއިތުވީ އަހަރެއްހާ ދުވަހުގެ ތެރޭގައި ކަންކަން ކޮށްފައިވާ ގޮތާއިމެދު ހިތްހަމަނުޖެހޭކަމަށް އޭނާ ބުންޏެވެ.

"އަޅުގަނޑުމެން ވަޒީފާ ގެއްލިދާނެކަމުގެ ބިރު އޮތީމަ އެއްވެސް މައްސަލައެއް ޖައްސާކަށް ނުކެރޭ. ބައެއް މުވައްޒަހުން އެތަނުގައި މަސައްކަކުރާތާ އަހަރެއްހާ ދުވަސް ވީއިރު ވެސް ވަޒީފާގައި އުޅޭކަމުގެ އެއްވެސް ލިޔެކިއުމެއްވެސް ނުލިބޭ،" ލިއޯ ޓްރޭޑިން ކޮމްޕެނީގެ މުވައްޒަފެއް ބުންޏެވެ.

ލިއޯ ޑްރޭޑިން ކޮމްޕެނީގެ މެނޭޖިން ޑިރެކްޓަރ ވިދާޅުވީ ރޯދަމަހުގެ އެލަވަންސްއާއިމެދު ހިތްހަމަ ނުޖެހިގެން އެއްވެސް މައްސަލައެއް އެ ކުންފުނީގެ މެނޭޖުމަންޓުގައި މުވައްޒަފަކު އުފުލާފައިނުވާކަމަށެވެ.

"އަޅުގަނޑުމެން ދެ ރޭންކަކަށް ބަހާލައިގެން ރޯދަމަހުގެ އެލަވަންސް ދިނީ. އެއީ ދިވެހިންނަށް 1500 ރުފިޔާ އަދި ބިދޭސީންނަށް 1000 ރުފިޔާ. އަމިއްލަ ބައެއް ކުންފިނި ތަކުން އެބަހުރި 900 ރުފިޔާ އަދި 800 ރުފިޔާ ވެސް ދީފަ. އެ ބޭފުޅުން ހިތްހަމަ ނުޖެހޭނަމަ އެންމެ ފުރަތަމަ ވާހަކަދައްކަން ޖެހޭނީ މެނޭޖުމަންޓާ އެއްވެސް މުވައްޒަފަކު އަދި މިހާތަނަށް ހިތްހަމަނުޖެހުން ފާޅުކޮށްފައެއް ނުވޭ،" ލިއޯ ޓްރޭޑިން ކޮމްޕެނީގެ މާލޭގައި ހުންނަ ހެޑް އޮފީހުން ވާހަކަ ދައްކަވަމުން އެ ކުންފުނީގެ މެނޭޖިން ޑިރެކްޓަރ ވިދާޅުވިއެވެ.

"ލިއޯ ޓްރޭޑިން" ކުންފުންޔަކީ ލޮޖެސްޓިކް މަސައްކަތްތަކުގެ އިތުރުން، ބަނދަރު ހެދުމާއި، ނަރުދަމާގެ މަސައްކަތްތައް ވެސް ކުރަމުން އަންނަ ކުންފުންޏެވެ. އެ ކުންފުނީގައި 200 އަށް ވުރެ ގިނަ މުވައްޒަފުން މިވަގުތު ވެސް މަސައްކަތް ކުރަމުން އަންނަކަމަށް އެ ކުންފިނީގެ ވެބްސައިޓުގައި ބުނެފައިވެެއެވެ.

ވަޒީފާއާބެހޭ ގާނޫނުގައި ބުނެފައިވަނީ ވަޒީފާ އަދާކުރާ ކޮންމެ މުސްލިމަކަށް ރޯދަ މަހުގެ އިނާޔަތުގެ ގޮތުގައި ރޯދަ މަސް ފެށުމުގެ ކުރިން، އެ މީހަކަށް ލިބޭ މުސާރައިގެ ތިންބައިކުޅައެއްބައި ދޭންވާނެ ކަމަށެވެ. އަދި މުސާރައިގެ ތިންބައިކުޅައެއްބައި 2،000 ރުފިޔާއަށްވުރެ ކުޑަނަމަ ދޭންޖެހެނީ 2،000 ރުފިޔާ ކަމަށް ގާނޫނުގައި ބުނެފައިވެ އެވެ. މުސާރައިގެ ތިންބައިކުޅަ އެއްބައި 10،000 ރުފިޔާއަށްވުރެ ގިނަނަމަ، ދޭންޖެހޭނެ ޖެހޭނީ 10،000 ރުފިޔާ ކަމަށް ގާނޫނުގައިވެ އެވެ.

ވަޒީފާޔާ ބެހޭ ގާނޫނާ ހިލާފަށް މުވައްޒަފުންނާ ދޭތެރޭ ކަންތައްތައް ކުރާ ފަރާތްތައް، 5،000 އާއި 50،000ރ. ދެމެދުގެ އަދަދަކުން ޖޫރިމަނާ ކުރެވެ އެވެ.

ލޭބަރ ރިލޭޝަންސް އޮތޯރިޓީން މިދިޔަ އަހަރު ކުރި ސާވޭއްގައި ބުނެފައިވަނީ ބައެއް އޮފީސްތަކުގެ މައުލޫމާތު ބެލި އިރު، އޭގެ ތެރެއިން 52 ޕަސެންޓް ތަނުން ރޯދަ އެލަވަންސާ ގުޅޭ މައްސަލަތައް ފާހަގަވެފައިވާކަމަށެވެ. 25 ޕަސެންޓް ތަނުން ރޯދަ އެލަވަންސް ދިން ނަމަވެސް، އެ ފައިސާ ދީފައި ވަނީ ގާނޫނުގައި ބުނެފައިވާ ގޮތަށް ނޫން ކަން ފާހަގަވި ކަމަށް ވެސް އެ އޮތޯރިޓީން ބުނެފައިވެއެވެ. އަދި 27 ޕަސެންޓް ތަންތަނުން ރޯދަ އެލަވަންސް އެއްގޮތަކަށް ވެސް ދީފައި ނުވާ ކަން ފާހަގަވި ކަމަށް ވެސް އެ އޮތޯރިޓީން ބުނެފައިވެއެވެ.