ގަމުގެ ކަރަންޓް މައްސަލައާއި ނަރުދަމާގެ މައްސަލަ ހައްލު ކުރުމަށް ސަރުކާރުގެ ޝައުގުވެރި ކަމެއްނެތް: މެންބަރު ފައްޔާޒު

ހައްދުންމަތީ ގަމުގައި އަލަށް އާބާދުވަމުން އަންނަ ސަރަހައްދުގެ ނަރުދަމާގެ މައްސަލައާއި، އެދާއިރާގެ ކަރަންޓްގެ މައްސަލަ ހައްލުކޮށް ދިނުމަށް ސަރުކާރުގެ މާބޮޑު ޝައުގުވެރި ކަމެއްނެތް ކަމަށް އެދާއިރާގެ ރައްޔިތުންގެ މަޖިލިސް މެންބަރު އަލްއުސްތާޒު ފައްޔާޒު އިސްމާޢީލް ވިދާޅުވެއްޖެއެވެ.

ފައްޔާޒުގެ ފޭސްބުކް ސަފްހާގައި ލިޔެފައިވަނީ މިމައްސަލަ ހައްލު ކުުރުމަށް ގަމު ކައުންސިލާއެކު ސަރުކާރާ ވާހަކަ ދައްކަވާތާ މަސްތަކެއް ވެއްޖެ ކަމަށެވެ. "ނަމަވެސްމިކަން ހައްލު ކުރުމަށް މާބޮޑު ޝައުގުވެރި ކަމެއްނެތް" ފައްޔާޒު ލިޔުއްވައިފައިވެއެވެ.

އޭނާ ލިޔުއްވާފައިވަނީ "މިހާރު މަޖިލިސް ތެރެއިންނާއި، އާދޭސް ކޮށްގެން ހަލެއް ހޯދުމަށް ކުރެވޭ މަސައްކަތަށްހައްލެއް ނުލިބިޖެނަމަ، އަމިއްލައަށް ކައުންސިލާއި ރައްޔިތުން މިކަން ހައްލުކުރާނޭގޮތެއް ހޯދުން ނޫން ގޮތެއް ނުފެނޭ،" ކަމަށެވެ.

އަލްއުސްތާޒު ފައްޔާޒު އިސްމާޢީލް މިގޮތަށް ލިޔުއްވި ވަގުތުގައިވެސް ގަމު ތުނޑީ އަވަށުގެ ބައެއް ގޭގެއިން ކަރަންޓް ކެނޑިގެން ބައެއް މީހުން ގެންދިޔައީ މުޒާހަރާ ކުރަމުންނެވެ. މިއަދު ހެނދުނުން ފެށިގެން ބައެއްގޭގައި ކަރަންޓެއްނެތެވެ. އިންޖީނަށް ދިމާވި މައްސަލަ ހައްލުކޮށް ކަރަންޓް ދިންއިރު ކުރިން ކަރަންޓްހުރި ގެތަކުންވަނީ ކަރަންޓް ކެނޑިފައެވެ.

ގަމުގައި އަލަށްއާބާދުވާ ސަރަހައްދުގެ ނަރުދަމާ ނިޒާމު ހަލާކުވެ މަގުމައްޗަށް ނަޖިސް ބޭރުވާތާ މިހާރުވަނީ މަސްތަކެއް ވެފައެވެ. އެމައްސަލަ ހައްލުކޮށް ދެއްވުމަށް ގަމު ކައުންސިލުންވަނީ ސަރުކާރުގެ ކަމާބެހޭ ފަރާތްތަކުގައި ދަންނަވާފައެވެ. ނަމަވެސް ހައްލެއް ލިބިފައެއް ނުވެއެވެ. ނަމަވެސް އެ ނަރުދަމާ ހިންގައި ބެލެހެއްޓުން ސަރުކާރުން މިހާރުވަނީ ފެނަކަ ކޯޕަރޭޝަނާ ހަވާލު  ކުރައްވާފައެވެ.