ރައްޔިތުންގެ ކުރިމަތީގައި ވަޒީރުންނާ ސުވާލު ކުރުމުގެ ނަތީޖާ ވަރަށް ފުރިހަމަ: މެމްބަރު ފައްޔާޒު

މަޖިލީހަށް ވަޒީރުން ހާޒިރުކޮށް އެބޭފުޅުންނާ ސުވާލުކުރައްވާތީ ސަރުކާރު ކޯލިޝަނުގެ މެމްބަރުން ފާޑުވިދާޅުވި ނަމަވެސް، ރައްޔިތުން ކުރިމަތީގައި ވަޒީރުންނާ ސުވާލުކުރުމުގެ ނަތީޖާ ވަރަށް ފުރިހަމައަށް ފެންނަމުން އަންނަކަމަށް ހައްދުންމަތީ ގަމު ދާއިރާގެ މެމްބަރު ފައްޔާޒު އިސްމާއިލް ވިދާޅުވެއްޖެއެވެ.

ފައްޔާޒު މިހެން ވިދާޅުވީ ލ. ގަމުގެ ނަރުދަމާ ނިޒާމަށް ދިމާވެފައިވާ މައްސަލައަށް ދާއިމީ ހައްލެއް ނުލިބި ގިނަ ދުވަސްތަކެއް ވާތީ އެ މައްސަލައިގައި މިނިސްޓަރ އޮފް އެންވަޔަރަމަންޓް އެންޑް އެނާރޖީ ޠާރިޤު އިބްރާހީމް އާ ސުވާލު ކުރެއްވުމަށް ނިންމަވާފައިވަނިކޮށް ގަމުގެ ނަރުދާގެ މަސައްކަތް ފެނަކަ ކޯޕަރޭޝަނާ އެ މިނިސްޓްރީން ހަވާލުކުރުމާ ގުޅިގެން "ދުވަސް ނިއުސް" އިން ދެންނެވި ސުވާލަކަށް ޖަވާބު ދެއްވަމުންނެވެ.

ފައްޔާޒު ވިދާޅުވީ އެންވަޔަރަމަންޓު މިނިސްޓަރ އޭނާގެ ސުވާލަށް ޖަވާބު ދެއްވުމަށް ވަޑައިގަތުމުގެ ކުރިން އެކަމަށް ފިޔަވަޅު އެޅުއްވިކަމީ އުފާކުރައްވާ ކަމެއް ކަމަށެވެ. އެހެން ނަމަވެސް ފެނަކައާ މަސައްކަތް ހަވާލުކުރުމުން އެ މައްސަލައަށް ދާއިމީ ހައްލެއް ލިބިދާނެ ކަމާމެދު ސުވާލު އުފެދޭކަމަށް ވެސް އޭނާ ވިދާޅުވިއެވެ.

"ސަރުކާރު ކޯލިޝަނަށް ނިސްބަތްވާ ބައެއް މެމްބަރުން އެބަ ވިދާޅުވޭ މިނިސްޓަރުން މަޖިލީހަށް ހާޒިރު ކުރުވައިގެން ސުވާލު ކުރުމަކީ ވަގުތު ބޭކާރުކުރަން ކުރާ ކަމެއްކޭ. ފޯނުން ގުޅައިގެން ވެސް ސުވާލުކޮށްލެވިދާނޭ. އެހެން ނަމަވެސް އެކަމުން އަޅުގަނޑުމެންނަށް ނަތީޖާ ފެންނަމުން މިދަނީ. ސުވާލަށް ޖަވާބު ދެއްވުމުގެ ކުރިން އެމަސައްކަތް ފެނަކައާ ހަވާލު ކުރައްވާފައި އެވަނީ. އެއީ އަޅުގަނޑު އުފާކުރާކަމެއް. އެހެން ނަމަވެސް ކަން ބޮޑުވާންޖެހޭ ކަމަކީ ފެނަކައާ މީގެ ފަސް ހަތަރު މަސްކުރިން ހަވާލުކޮށްފައިވާ މަސައްކަތްތައް އަދިވެސް ނުނިމި އޮތުން،" ފައްޔާޒު ވިދާޅުވިއެވެ.

މި މައްސަލައިގައި މިނިސްޓަރ ތާރިގާ ސުވާލުކުރެއްވުމަށް ފައްޔާޒު އެދިވަޑައިގެންފައިވަނީ މިދިޔަ ޖޫން މަހުގެ 12 ވަނަ ދުވަހުއެވެ. އެހެން ނަމަވެސް އެ ސުވާލަށް ޖަވާބު ދެއްވުމަށް މަޖިލީހަށް ވަޑައިގަތުމަށް ތާރިގު އެއްބަސް ވެ ވަޑައިގަތުމުގެ ކުރިން އެންވަޔަރަމަންޓު މިނިސްޓްރީން ވަނީ ގަމު ނަރުދަމާގެ ބެލެހެއްޓުމުގެ މަސައްކަތް މިމަހު 22 ވަނަ ދުވަހު ފެނަކަ ކޯޕަރޭޝަނާ ހަވާލުކޮށްފައެވެ.

އޭނާ ވިދާޅުވީ ކެބިނެޓު މިނިސްޓަރުންނާ "ފޯނުން ގުޅައިގެން ވެސް" ސުވާލު ކުރެއްވިދާނެކަމަށް ކޯލިޝަން މެމްބަރުން ވިދާޅުވި ނަމަވެސް ފޯނުން ގުޅުމާއި ރައްޔިތުން ކުރިމަތީގައި ޖަވާބުދާރީ ވެވަޑައިގަތުމާ ދެމެދު ހުރި ތަފާތު މިހާރު ފެނިވަޑައިގަންނަވާނެ ކަމަށެވެ.

އެންވަޔަރަމަންޓު މިނިސްޓަރާ، ކުރެއްވުމަށް ފައްޔާޒު ނިންމަވާފައިވާ ސުވާލަކީ "ގަމުގެ ނަރުދަމާ ނިޒާމު ރަނގަޅުކޮށް އެމައްސަލައަށް ދާއިމީ ހައްލެއް ހޯދުމަށް މިއަހަރު ބަޖެޓުގައި ފައިސާއެއް ވޭތޯ؟ އަދި ކިހައި މުއްދަތެއްގެ ތެރޭގައި އެމައްސަލައަށް ދާއިމީ ޙައްލެއް ހޯއްދަވައި ދެވޭނެތޯ؟،" އެވެ. މިނިސްޓަރާ ސުވާލުކުރެއްވުމަށް މަޖިލީހުން އެޖެންޑާ ކޮށްފައިވަނީ އަންނަ އޮގަސްޓު މަހުގެ 13 ވަނަ ދުވަހަށެވެ.

ރިޔާސީ އިންތިޚާބުގެ ތެރޭގައި ޕީޕީއެމްގެ އޭރުގެ ރިޔާސީ ކެންޑިޑޭޓް އަދި މިހާރުގެ ރައީސް ޢަބްދުﷲ ޔާމީން އަބްދުލް ގައްޔޫމަކީ ގޭންގް ތަކާ ގުޅުން އޮންނަ ބޭފުޅެއް ކަމަށް ތުހުމަތު ކުރައްވަވައި މިހާރުގެ ހޯމް މިނިސްޓަރު އުމަރު ނަސީރު ވާހަކަ ފުޅު ދައްކަވާފައިވާތީ އެއީ ކިހާވަރެއްގެ ހަގީގަތެއް އޮތް ވާހަކައެއްތޯ ވެސް ފައްޔާޒު ވަނީ މަޖިލީހުގައި ޢުމަރު ނަސީރާ ސުވާލު ކުރައްވާފައެވެ. ސުވާލުގެ ޖަވާބުގައި ރައީސް ޔާމީނާއި ގޭންގް ތަކާ އެއްވެސް ގުޅުމެއްނެތް ކަމަށް ހޯމްމިނިސްޓަރު ޢުމަރު ނަސީރު ވަނީ ވިދާޅުވެފައެވެ.