އިޒްރޭލާއި ދެކޮޅަށް މާލެގައި ރޭ ދަންވަރު މުޒާހަރާކޮށްފި
29 ޖުލައި 2014 9:57
އިޒްރޭލާއި ދެކޮޅަށް ރޭ ދަންވަރު މުޒާހަރާ ކުރި މީހުންނާއި ފުލުހުން ވާހަކަ ދައްކަނީ: ފޮޓޯ ސޯޝަލް މީޑިއާ
ކ. ތުލުސްދޫ ރާޅާއަރާ ސަރަހައްދުގައި އިޒްރޭލާއި ދެކޮޅަށް ޝުއޫރު ފާޅުކުރުމަށް ހަރުކޮށްފައި ހުރި ބޯޑެއް އެރަށަށް އެރި އިޒްރޭލު ފަތުރުވެރިންތަކެއް ހަލާކުކޮށްލުމުން އެކަމާއި ދެކޮޅަށް އަޑުއުފުލުމަށް ތުލުސްދޫއަށް ދިޔަ ބަޔަކު ހައްޔަރު ކުރުމުން މާލޭގައި މުޒާހަރާކޮށްފިއެވެ.
ރޭ މެންދަމު 1:00 ހާއިރު ކުރި މުޒާހަރާގައި އިޒްރޭލާއި ދެކޮޅަށް ޝުއޫރު ފާޅުކުރުމުގެ ގޮތުން މާލޭގެ އެކި ސަރަހައްދުތަކުގައި އެ ގައުމުގެ ދިދަތައް އަންދާލާފައިވެއެވެ. މުޒާހަރާގެ ބައިވެރިން ވަނީ ރައީސުލްޖުމްހޫރިއްޔާ އަބްދުﷲ ޔާމިން ދިރިއުޅުއްވާ ގ. ދޫވެހި ކައިރިއަށް ވެސް އެއްވެ އަޑުއުފުލާފައެވެ. އަދި އިސްލާމިކް މިނިސްޓަރ ޝޭހު މުހައްމަދު ޝަހީމް އަލީ ސައީދު ދިރިއުޅުއްވާ ގެ ކައިރިއަށް ވެސް އެއްވެ އަޑު އުފުލާފައިވެއެވެ.
މުޒާހަރާގެ ބައިވެރިން އިޒްރޭލުގެ އެއް ނަންބަރު ފާލަން ކައިރިއަށް ވެސް އެއްވެފައިވެއެވެ. އެމީހުން އެ ސަރަހައްދަށް އެއްވެފައިވަނީ ތުލުސްދޫއަށް ދިޔަ އެމީހުންގެ "އަހުން" މާލެ އަންނާތީ ކަމަށް ބުނެއެވެ. މުޒާހަރާގެ ބައިވެރިން އެއް ނަންބަރު ފާލަން ކައިރިއަށް އެއްވެފައިވަނީ އެ ސަރަހައްދުގައި ތިބި ފުލުހުންގެ ސަފު ފޫއަޅުވާލުމަށްފަހުއެވެ.
ނަމަވެސް ފުލުހުން ބުނެފައިވަނީ ތުލުސްދޫއަށް އިޒްރޭލު ފަތުރުވެރިންނާއި ދެކޮޅަށް އަޑުއުފުލުމަށް ދިޔަ މީހުން ހައްޔަރު ނުކުރާ ކަމަށެވެ. ނަމަވެސް އެމީހުން ފުލުސް އޮފީހަށް ހާޒިރު ކުރުމަށްފަހު "ބައެއް މައުލޫމާތު ސާފުކުރުމަށްފަހު" ދޫކޮށްލާފައި ވާކަމަށެވެ.
ތުލުސްދޫގައި އިޒްރޭލާއި ދެކޮޅަށް ހަރުކޮށްފައި ހުރި ބޯޑެއް ހަލާކުކޮށްލުމާއި ގުޅިގެން އެރަށުގެ ބައެއް މީހުންނާއި އެ ބޯޑު ހަލާކުކޮށްލި މީހުންނާއި ދެމެދު ހަމަނުޖެހުންތަކެއް ހިނގާފައިވެއެވެ. ބޯޑު ހަލާކުކޮށްލި ފަތުރުވެރިން ތުލުސްދޫއިން ފައިބާފައިވަނީ ފުލުހުންގެ އެހީތެރިކަމާއެކުއެވެ. އަދި އެރަށު މީހުން އިޒްރޭލާއި ދެކޮޅަށް އަޑުއުފުލައި އިތުރު ބޯޑުތައް އެރަށުގައި ހަރުކޮށްފައިވެއެވެ. ނަމަވެސް އެރަށު ކައުންސިލެގެ އެދުމުގެ މަތިން އެ ބޯޑުތައް ފަހުން އެރަށު މީހުން ވަނީ ނައްޓާލައިފައެވެ. ތުލުސްދޫގެއި ހިނގާދިޔަ ހާދިސާއާއި ގުޅިގެން ރާއްޖޭގެ ބައެއް އެހެން ރަށްރަށުގައި ވެސް އިޒްރޭލާއި ދެކޮޅަށް ޝުއޫރު ފާޅުކުރުމުގެ ހަރަކާތްތަކެއް ހިނގާފައިވެއެވެ.
ކިޔުންތެރިންގެ ހިޔާލު