ފައިމަގުގައި އުޅުމަށް މާލޭ ސިޓީކައުންސިލުން ނިންމާފައިވާ ނިންމުން ބަދަލެއް ނުކުރެވޭނެ : ޑެޕިއުޓީ މޭޔަރ

މިއަދު ހަވީރު 4:00 އިން ރޭގަނޑު 7:00 އަށް ފައިމަގުގައި އުޅޭ ގޮތަށް މާލޭ ސިޓީކައުންލުން ނިންމާފައިވާ ނިންމުމަށް ބަދަލުގެނެވެން ނެތްކަމަށް ޑެޕިއުޓީ މޭޔަރ ޝިފާ މުހައްމަދު ވިދާޅުވެއްޖެއެވެ.

ޝިފާ މިހެން ވިދާޅުވީ ސިޓީކައުންސިލުން ނިންމާފައިވާ ގޮތަށް މާލޭގައި މިއަދު ވެހިކަލް ދުއްވުން މާނާކުރެވެން ނެތްކަމަށް ޓްރާންސް ޕޯޓު އޮތޯރިޓީން ބުނެފައިވާތީއެވެ. ޓްރާންސްޕޯޓު އޮތޯރިޓީން ބުނީ މިއަދު ހަވީރު މާލޭގައި ވެހިކަލް ދުއްވުން މަނާކުވެން ނެތީ ސަރުކާރުން ހާއްސަ "އިވެންޓުތަކެއް" ބޭއްވުމަށް ހަމަޖައްސާފައިވާތީ ކަމަށެވެ. ޓްރާންސް ޕޯޓުން ބުނީ މިއަދު ހަވީރު ވެހިކަލުގައި އުޅޭމީހުން ފުލުހުން ނުހުއްޓުވާނެކަމަށެވެ. އަދި އެކަން ސިޓީކައުންސިލަށް އަންގާފައިވާނެ ކަމަށްވެސް އެއޮތޯރިޓީންވަނީ ބުނެފައެވެ. ނަމަވެސް ޝިފާ ވިދާޅުވީ ސަރުކާރުން ސިޓީކައުންސިލަށް އެކަން އެނެގީ "ރޭ ދަންވަރު" ބައެއް ކައުންސިލަރުންގެ މޯބައިލް ފޯނަށް ގުޅައިގެން ކަމަށެވެ.

"ރޭ ދަންވަރު ސިޓީ ކައުންސިލުގެ ބައެއް މެމްބަރުންނަށް ސަރުކާރު ބޭފުޅުން ފޯނުން ގުޅުއްވާފަ ވިދާޅުވަނީ ވެހިކަލްތައް ދުއްވުން ހުއްޓުވެން ނެތްކަމަށް. އޭގެން ވެސް އެނގެނީ ސަރުކާރުން ރައްޔިތުންނާއި ގުޅުންހުރި ކަންކަމުގައި ގެންގުޅުއްވާ ދޯދިޔާ ސިޔާސަތު. އަޅުގަނޑުމެން މިހާރު ވާނީ ދުއްވަން ބޭނުންވާ ވެހިކަލްތަކަށް ސްޓިކާ ދޫކޮށް ވެސް ނިންމާފަ. ދެން އެހެން ގޮތަކަށް ބަދަލުކުރާނަމަ ރައްޔިތުންނަށް ވަރަށް ބޮޑު އޮޅުމެއް އަރާނެ،" ޝިފާ ވިދާޅުވިއެވެ. 

ސަރުކާރުން މާލޭގައި ފުޅަނދު ބުރުތަކަކާއި ކުޑަކުދިންގެ ހަވީރެއް ބޭއްވުމަށް ވަނީ ނިންމައިފައެވެ. ޝިފާ ވިދާޅުވީ މާލޭ ސިޓީކައުންސިލުން އޮތީ ފުޅަނދު ބުރުތަކުގައި ބައިވެރިވާ ވެހިކަލްތަކަށް ވެސް ސްޓިކާ ދޫކުރުމަށް ތައްޔާރަށް ކަމަށެވެ.

ޑެޕިއުޓީ މޭޔަރ އިތުރަށް ވިދާޅުވީ މިއަދަކީ މާލޭގައި ފައިމަގުގައި އުޅޭ ދުވަހެއް ކަމަށް ނިންމާފައިވަނީ މިމަހު 22 ވަނަ ދުވަހު މާލޭ ސިޓީކައުންސިލުގެ އާންމު ބައްދަލުވުމަކުން ކަމަށެވެ. މިހެން ކަމުން އެ ނިންމުން ބާތިލު ކުރަންޖެހޭނީ ވެސް އެފަދަ ބައްދަލުވުމެއް ބާއްވައިގެން ކަމަށް އޭނާ ވިދާޅުވިއެވެ. އަދި މާލޭ ސިޓީކައުންސިލްގެ ނިންމުމަށް މާލޭގައި ދިރިއުޅުއްވާ ރައްޔިތުން އިހުތިރާމުކޮށް މިއަދު ހަވީރު ފައިމަގުގައި އުޅުމަށް އެދިލައްވާކަމަށް ވެސް ޝިފާ ވިދާޅުވިއެވެ. 

"މިއަދު އަޅުގަނޑުމެން ނިންމާފައިވަނީ އުމުރުން ދުވަސްވީ ބޭފުޅުންނާ، ޒުވާނުންނާ އާއިލާތަކާ ކުޑަކުދިންނަށްވެސް ސޯޝަބަލް ދުވަހެއްގެ ގޮތުގައި ހެދުމަށް. އީދު ދުވަހު އަޅުގަނޑުމެންނަށް އެނގޭ ގިނަބަޔަކު މަގުމަތީގައި ހަމަޖެހިލައިގެން އުޅެން ބޭނުންފުޅުވާނެކަން. އަޅުގަނޑުމެން މިގޮތަށް ނިންމީ އަޅުގަނޑުމެންނަކީ ރައްޔިތުންގެ އިހުސާސްތައް އެނގިގެން ކުރިއަށްދާ ބަޔަކަށްވާތީ. އެހެން ނަމަވެސް ސަރުކާރުގެ ނިންމުމުން އެނގިގެންދަނީ އެބޭފުޅުންނަކީ ކުރިއާލައި ކަންކަން ރާވަވައިގެން ކުރިއަށް ވަޑައިގަންނަވަން ދަންނަބައެއް ނޫންކަން،" ޝިފާ ވިދާޅުވިއެވެ.