ލޯންޗަކާއި ހުޅުމާލެ ފެރީއެއް ޖެހި އެކްސިޑެންޓު ވެއްޖެ
28 ޖުލައި 2014 9:11
ލޯންޗަކާއި ހުޅުމާލެއާ މާލެއާ ދެމެދު ދުއްވާ އެމްޓީސީސީގެ ފެރީއެއް ރޭ 9:00 ހާއިރު އެކްސިޑެންޓްވެއްޖެ ކަމަށް މޯލްޑިވިސް ޕޮލިސް ސާވިސް އިން ހާމަކޮށްފިއެވެ.
ފުލުހުން ބުނީ އެ އެކްސިޑެންޓުގައި ހަތަރު މީހަކަށް އަނިޔާވެފައިވާކަމަށެވެ. ނަމަވެސް އެމީހުންނަށް ސީރިއަސް އަނިޔާތަކެއް ނުވާކަމަށް ފުލުހުން ހާމަކުރެއެވެ. މި ހާދިސާގައި އަނިޔާވި މީހުންނަށް ވަނީ އޭޑީކޭ ހޮސްޕިޓަލަށް ގެންގޮސް ފަރުވާދީފައެވެ. އެކްސިޑެންޓުގައި ފެރީގައި ހުރި ސައިކަލުތަކަށް ވެސް ގެއްލުން ވެފައިވާކަމަށް ފުލުހުންގެ ވެބްސައިޓުގައި ބުނެފައިވެއެވެ.
އެ އެކްސިޑެންޓް ހިނގާފައިވަނީ ހުޅުމާލެ ފެރީ ޓަރމިނަލް ބަނދަރުން ނުކުންނަން ދިޔަ ލޯންޗަކާއި ވަންނަން އައި ފެރީއެއް ހުޅުމާލެ ބަންދަރުގެ ނެރުމަތިން ޖެހިގެންކަމަށް ފުލުހުން ބުނެއެވެ.
އެ ހާދިސާ މެރިން ޕޮލިސްއިން ދަނީ ތަޙުޤީޤު ކުރަމުންނެވެ.
ކިޔުންތެރިންގެ ހިޔާލު