ލ އަތޮޅުގައި ހުންނަ ހަމައެކަނި އޭޓީއެމްގެ ހިދުމަތް މެދުކެނޑިއްޖެ

ލ އަތޮޅުގައި ހުންނަ ހަމައެކަނި އޭޓީއެމްގެ ހިދުމަތް މެދުކެނޑިއްޖެ އެއަތޮޅު ރައްޔިތުންނަށް ބޮޑެތި ދަތިތަކަކާއި ކުރިމަތިވެއްޖެއެވެ.

ބޭންކް އޮފް މޯލްޑިވިސް (ބީއެމްއެލް) ގެ ފުނަދޫ ބުރާންޗުން ބުނީ އޭ.ޓީ.އެމްގެ ހިދުމަތް މެދުކެނޑިފައިވަނީ ފުނަދޫ އިންޖީނުގެއަށް ދިމާވެފައިވާ މައްސަލައެއްގެ ސަބަބުން އެރަށުން ކަރަންޓު ކެނޑެމުން ދާތީކަމަށެވެ. ކަރންޓުގެ މައްސަލައާއި ގުޅިގެން އިއްޔެ އޭ.ޓީ އެމް ގެ ހިދުމަތް ލ އަތޮޅަށް ލިބިފައިވަނީ ރޭގަނޑު 8:00 އިން 10:00 އަށެވެ. ބީއެމްއެލް އިން ބުނީ ކަރަންޓުގެ ދަތިކަމާއެކު ވެސް އޭޓީއެމް ގެ ހިދުމަތް ދިނުމަށް މަސެއްކަތް ކުރާކަމަށެވެ. މިގޮތުން ކުޑަ ޖަނަރޭޓަރެން ހިންގައިގެން އޭޓީއެމްގެ ހިދުމަތް އަލުން ފެށުމަށް މަސައްކަތް ފަށާފައިވާކަމަށް ބެންކުން ބުނެއެވެ.

ފުނަދޫ ކައުންސިލްގެ ރައީސް އަހްމަދު ރިޔާޒް ވިދާޅުވީ ފުނަދޫން އިންޖީނުގެއަށް ދިމާވެފައިވާ ކަރަންޓުގެ މައްސަލަ ހައްލުކުރުމަށް މަސައްކަތް ކުރަމުންއަންނަ ކަމަށެވެ. އަދި އޭނާ ވިދާޅުވީ މިހާރު އެރަށަށް ކަރަންޓު ދޫކޮށްފައި އޮތް ނަމަވެސް އިންޖީނުތަކަށް ލޯޑު ބޮޑުވަމުން އަންނާތީ އެކަމަށް ފިޔަވަޅުތަކެއް އަޅާފައިވާނޭކަމަށެވެ.

"އިއްޔެ ކަރަންޓު ކެނޑިފަ ދެން ކަރަންޓު އައީ ރޭ ދަންވަރު 3:30 ހާއިރު. އިންޖީނުގެއިން މައުލޫމާތު ލިބުނުގޮތުގައި އިންޖީނުތަކަށް ލޯޑު ބޮޑުވާތީ ކަރަންޓު ކެނޑެމުންދަނީ. މިހާރުވެސް ކަރަންޓު ދެމުން އަންނަނީ ބައެއް ލައިންތައް ކަނޑާލައިގެން،" ރިޔާޒް ވިދާޅުވިއެވެ.

އޭޓީއެމް ހިދުމަށް ހޯދުމަށް އިއްޔެ ފުނަދުއަށް ދިޔަ މާބައިދޫ މީހަކު ބުނީ އޭޓީއެމް ހިދުމަށް މެދުކެނޑިފައި އޮތުމުން އޭނާ އަތުން ޓެކްސީ ހަރަދުގެ ގޮތުގައި 400 އަށްވުރެ ގިނަ ރުފިޔާ "ބޭކާރު" ވެފައިވާކަމަށެވެ.

"ގަމަށް އަޅުގަނޑުމެން ހޮސްޕިޓަލަށް ދާއިރު ލާރި ނެގޭނެ ގޮތެއް ނުހުރޭ. އެހެން ވީމަ އަނެއްކާ ފުނަދުއަށް މިޖެހެނީ ބޮޑު ހަރަދުކޮށްފަ ފުނަދުއަށް ދާން. އެރަށް ދިޔައިރު އޭޓީއެމްގެ ހިދުމަތް ހުރީ މެދުކެނޑިފަ. އަޅުގަނޑު ފުނަދުއަށް ދިޔައީ ޓެކްސީއެއްގަ ކޮޅަކަށް 200 ރުފިޔާ ހަރަދުކޮށްގެން އޭޓީއެމްގެ ހިދުމަށް ހޯދަން. 400 ރުފިޔާ ބޭކާރުވެގެން މިދަޔައީ،" "ދުވަސް" ނޫހަށް މައުލޫމާތު ދެމުން މައިބައިދޫ މީހަކު ބުންޏެވެ.

ފޮނަދޫގެ އޭ.ޓީ.އެމް އަކީ މުޅި ލ. އަތޮޅުގައި ހުންނަ ހަމައެކަނި އޭ.ޓީ.އެމް އެވެ. އެ އަތޮޅު ހުރިހާ ރައްޔިތުން ވެސް ހިދުމަތް ހޯދަން ހުންނަ އޭޓީއެމްއަކީ އެއީއެވެ.