ފަލަސްތީނަށް އެހީވުމަށް ލ. ގަމު މިސްކިތްތަކުގައި ފަންޑު ފޮށި ބަހައްޓައިފި

ފަލަސްތީނުގެ ރައްޔަތުންނަން އެހީ ވުމުގެ ގޮތުން ލ.ގަމު މިސްކިތްތަކުގައި އެ ރަށު ކައުންސިލުން ފަންޑު ފޮށި ބަހައްޓައިފިއެވެ.

ގަމުގެ ކައުންސިލަރެއް މިއަދު ވިދާޅުވީ ފަލަސްދީނުގެ ރައްޔަތުންނަން އެހީ ވުމުގެ ގޮތުން ގަމުގެ މިސްކިތްތަކުގައި ބެހެއްޓި ފަންޑު ފޮށި ތަކުގެ ފައިސާ ހަވާލު ކުރަން ހަމަޖެހިފައިވަނީ އަދާލަތު ޕާޓީއާ ކަމަށެވެ.

" ޣައްޒާގެ ރައްޔިތުންނާ އެކު ގަމު ރައްޔިތުން " މިނަމުގައި ރޭ އެ ރަށުގައިވަނީ ހިނގާލުމެއް ވެސް ބާއްވައިފައެެވެ. ހިނގާލުމަށް ރަނގަޅު ތަރުހީބެއް ލިބިފައިވާކަމަށް އެރަށު ކައުންސިލުން ބުނެއެވެ. ހިނގާލުމުގެ ބައިވެރިން ވަނީ ހަގުރާމަ ހުންޓާލުމަށާއި، އިޒްރޭލަށް ދަތި ކުރުމުގެ ފިޔަވަޅު އެޅުމަށް ގޮވާލާފައެވެ. ހިނގާލުން ނިންމާލާފައިވަނީ ފަލަސްތީނުގެ ރައްޔިތުންނަން ނަސްރު ދެއްވުމަށް އެދި ދުއާއެއް ކުރުމަށްފަހުއެވެ.

ފަލަސްތީނު ރައްޔިތުންނަށް އެހީވުމަށް އަދާލަތު ޕާޓީން މިމަހު 17 ވަނަ ދުވަހު ބެހެއްޓި ފަންޑު ފޮށްޓަށް މިހާތަނަށް ވަނީ 2.3 މިލިއަން ރުފިޔާ ލިބިފައެވެ. އެ އަދަދު އެހާ އިތުރުވެފައިވަނީ މާލޭގެ އިތުރުން ރަށްރަށުގައި ވެސް ފަންޑު ފޮށި ބަހައްޓަމުން ގެންދާތީކަމަށް އަދާލަތު ޕާޓީން ބުނެއެވެ.

ފަލަސްތީނުގެ ޣައްޒާއަށް އިޒްރޭލުން ހަމަލާދޭން ފެށިފަހުން މިއަދާ ހަމައަށް 800 އަށްވުރެ ގިނަ މީހުން ވަނީ ޝަހީދު ކޮށްލާފައެވެ. ހަމަލާތައް ފެށިފަހުން މިއަދަށް 19 ދުވަސް ވެއްޖެއެވެ.