ކުދި ކުށްތައް ކުރާ ޒުވާނުންގެ މައްޗަށް ދައުވާނުކޮށް ދޫކޮށްލެވޭނެ އުސޫލެއް ގާއިމް ކުރައްވަނީ
26 ޖުލައި 2014 13:09
ޕީޖީ ކަމުގެ ފަތްކޮޅު މުހުތާޒާ ރައީސް ޔާމީން މިއަދު ހަވާލު ކުރައްވަނީ: ފޮޓޯ ރައީސް އޮފީސް
ކުދި ކުށްތަކުގައި ދައުވާ އުފުލާފައި ތިބި ޒުވާނުންނަށްގެ ތެރެއިން ފުރަތަމަ ފަހަރަށް ކުށަށް އަރައި ގަނެފައި ތިބި ޒުވާނުންނާއެކު ވެވޭ އެއްބަސް ވުމެއްގެ ދަށުން ދައުވާނުކޮށް ދޫކޮށްލުމުގެ އުސޫލެއް ގާއިމް ކޮށްދިނުމުގެ މަސައްކަތް ރައީސުލްޖުމްހޫރިއްޔާ އަބްދުﷲ ޔާމިން ފައްޓަވައިފިއެވެ.
މިނިވަން ދުވަހުގެ މުނާސަބަތުގައި ރޭ ޖުމްހޫރީ މައިދާނުގައި ބޭއްވި ހަފުލާގައި ވާހަކަ ދައްކަވަމުން ރައީސް ޔާމިން ވިދާޅުވީ ކުދި ކުށްތައް ކުރާ ޒުވާނުންގެ މައްޗަށް ދައުވާނުކޮށް ދޫކޮށްލެވޭނެ އުސޫލެއް ގާއިމް ކޮށްދިނުމަށް ޕްރޮސެކިއުޓަރ ޖެނަރަލްގެ އަރިހުން ވެސް އެދިލައްވާފައިވާނެކަމަށެވެ.
"ޒުވާނުންނާއި މުޖުތަމަޢުގެ އެންމެހައި ފަރުދުންގެ ހަމަޖެހުމަށްޓަކައި ޒުވާނުންނަށް ފަހި މުޖުތަމަޢެއް ބިނާކުރުމުގެ މަސައްކަތް ސަރުކާރުން މިދަނީ ކުރަމުން. މައްސަލަތަކުގެ ޝިކާރަޔަކަށް ޒުވާނުން ވިޔަނުދިނުމަށްޓަކައި ކެނޑިނޭޅިދަނީ މަސައްކަތްތަކެއް ކުރެވެމުން،" ރައީސް ވިދާޅުވިއެވެ.
ޔާމިން ވިދާޅުވީ އެމަނިކުފާނު ރައީސުލްޖުމްހޫރިއްޔާ ކަމާއި ހަވާލުވެ ވަޑައިގަތްފަހުން މިހާތަނަށް 4000 މައްސަލައެއްގައި ތުހުމަތު ކުރެވިފައިވާ 3588 ޒުވާނުންގެ ކުށުގެ ރެކޯޑުތައް ސާފުކޮށް ނިންމަވާފައިވާނޭކަމަށެވެ. އަދި ވިދާޅުވީ އެމަނިކުފާނުގެ އަމާޒަކީ ދިވެހި މުޖުތަމަޢަކީ ޞުލްޙަވެރި ޒުވާން، ތަޢުލީމީ، ތަހުޒީބު މުޖުތަމަޢަކަށް ހެދުންކަމަށެވެ.
"މިދެންނެވި ޒުވާނުންގެ މައްޗަށް ތުހުމަތު ކުރެވުނު މައްސަލަތަކާމެދު މިހާރުވަނީ ގޮތެއް ނިންމިފައި. އަޅުގަނޑުގެ ޢަޒުމަކީ، ދިވެހި މުޖުތަމަޢަކީ ޞުލްޙަވެރި ޒުވާން، ތަޢުލީމީ، ތަހުޒީބު މުޖުތަމަޢަކަށް ހެދުން. ހަމައެޔާއެކު، ރާއްޖޭގެ ރައްޔިތުންނަކީ، މިއަދު ދުނިޔެ ދެކެމުންދާ ޒަމާނީ ޓެކްނޮލޮޖީގެ ވަސީލަތްތަކުގެ ބޭނުން ފުރިހަމައަށް ހިފައި، ދުނިޔެއަށް އަންނަމުންދާ އެކިއެކި ބަދަލުތަކާމެދު ވިސްނައި، ހޭލުންތެރި މުޖުތަމަޢަކަށް ދިވެހި މުޖުތަމަޢު ވެގެންދިޔުން،" ރައީސް ޔާމިން ވިދާޅުވިއެވެ.
ކިޔުންތެރިންގެ ހިޔާލު