އިގްތިސާދީ ގޮތުން ރާއްޖެ ނިކަމެތިކުރުމަށް ބަޔަކު މަސައްކަތްކުރޭ: ރައީސް ޔާމިން
26 ޖުލައި 2014 12:32
މިނިވަން ދުވަހުގެ މުނާސަބަތުގައި ރޭ ބޭއްވި ހަފުލާގައި ރައީސް ޔާމިން ވާހަކަ ދައްވަނީ: ފޮޓޯ ރައީސް އޮފީސް
އިޤްތިޞާދީ ގޮތުން ޤައުމު ނިކަމެތިކުރުމަށް މަސައްކަތްކުރުމަކީ، މިނިވަންކަން ނަގާލުމަށް ކުރެވޭ މަސައްކަތެއްކަމަށް ރައީސުލްޖުމްހޫރިއްޔާ އަބްދުﷲ ޔާމިން ވިދާޅުވެއްޖެއެވެ.
ރައީސް ޔާމިން މިހެން ވިދާޅުވީރާއްޖޭގެ 49 ވަނަ މިނިވަންދުވަހުގެ މުނާސަބަތުގައި، ރޭ ޖުމްހޫރީ މައިދާނުގައި ބޭއްވެވި ރަސްމިއްޔާތުގައި ވާހަކަ ދައްކަވަމުންނެވެ.
ރައީސް ޔާމިން ވިދާޅުވީ ފަތުރުވެރިކަން ބޮއިކޮޓް ކުރުމާއި ރާއްޖޭގެ މަސްވެރިކަން "ހަލާކުކުރުމަށް" ކުރަމުން އަންނަ މަސައްކަތްތައް ކުށްވެރިކުރައްވާކަމަށެވެ.
"ރާއްޖޭގެ ފަތުރުވެރިކަން ބޮއިކޮޓް ކުރުމަށާއި، ރާއްޖޭގެ މަސްވެރިން ބާނާ މަސްގަންނަ ފަރާތްތަކުގެ ހިތްތަކުގައި ޝައްކު އުފައްދައި މަސްވެރިކަން ހަލާކުކުރުމަށް ވަކިފަރާތްތަކަކުން ކުރަމުން ގެންދާ މަސައްކަތްތައް އަޅުގަނޑު ކުށްވެރިކުރަން. ދިވެހި ރައްޔިތުން ފަޤީރުކުރުމަށް ކުރާ ހުރިހާ މަސައްކަތެއް ބަލިކޮށް، ޞުލްޙަވެރި ޒުވާން ޖީލެއް ބިނާކޮށް، ދިވެހިންނަށް ތަނަވަސްކަން ހޯދައިދިނުމުގައި މި ސަރުކާރު ކުރިއަށްދާނެ،" ރައީސް ޔާމިން ވިދާޅުވިއެވެ.
ރައީސް ޔާމިން ވިދާޅުވީ ރާއްޖޭގެ އިގްތިސާދު ކުރިއެރުވުމަށް ހާއްސަ އިގްތިސާދީ ސަރަހައްދުތަކެއް ކަނޑައެޅުމަކީ މުހިންމުކަމެއް ކަމަށެވެ. އަދި އެފަދަ ސަރަހައްދުތަކެއް ކަނޑައެޅުމުން އިންވެސްޓަރުންގެ އިތުބާރު ރާއްޖެއާއި މެދު ބޮޑުވެގެން ދާނެކެމަށް ވެސް އެމަނިކުފާނު ވިދާޅުވިއެވެ. އެފަދަ ޒޯނުތަކެއް އުފެއްދުމުން ވަޒީފާގެ ފުރުސަތައް ވެސް އިތުރުވެގެން ދާނެކަމަށް ވިދާޅުވިއެވެ.
"ރާއްޖޭގެ އިޤްތިޞާދު އިތުރަށް ފުޅާކޮށް ހަރުދަނާކުރުމަށްޓަކައި، ރާއްޖޭގައި ޚާއްޞަ އިޤްތިޞާދީ ސަރަޙައްދުތަކެއް ނުވަތަ ސްޕެޝަލް އިކޮނޮމިކް ޒޯންތަކެއް ޤާއިމުކުރުމަކީ، ސަރުކާރުގެ އިޤްތިޞާދީ ތަޞައްވުރުގެ ވަރަށް މުހިންމު އަމާޒެއް. މިކަމަށް މަގުފަހިކުރުމަށްޓަކައި، މިކަމާބެހޭ ބިލު، ސަރުކާރުގެ ފަރާތުން މިހާރުވަނީ ރައްޔިތުންގެ މަޖިލީހަށް ހުށަހަޅާފައި،މި ބިލް ޤާނޫނަކަށް ވެގެން އައުމުން، ބޭރުގެ އިންވެސްޓަރުންނަށް އިތުބާރު ލިބި، ރާއްޖެ އަންނަ އިންވެސްޓްމަންޓްތައް އިތުރުވެގެންދާނެ. މިއާއެކު، ވަޒީފާގެ ފުރުޞަތުތައް އިތުރުވެ، ރާއްޖޭގެ އިޤްތިޞާދު، ފަތުރުވެރިކަމަށް ބިނާވެފައި އޮތްއޮތުން ކުޑަކުރެވި، ރާއްޖޭގައި ވިޔަފާރިއާއި ޞިނާޢީ ޙަރަކާތްތައް ފުޅާވެގެންދާނެ. އަދި، ރާއްޖޭގެ އުފެއްދުންތެރިކަން އެތައް ގުނައަކަށް އިތުރުވެ، ރާއްޖޭގައި ދައުރުވާ ބޭރު ފައިސާގެ މިންވަރު އިތުރުވެގެންދާނެ،"
ކިޔުންތެރިންގެ ހިޔާލު