އިޒްރޭލުން ގެންނަ މުދާ އެތެކުރުން މަނާކޮށްފި

.އިޒްރޭލުން ގެންނަ މުދާ މިއަދުން ފެށިގެން ރާއްޖެއަށް އެތެރެކުރުން ކަސްޓަމްސް އިން މަނާކޮށްފިއެވެ

އިޒްރޭލުން އުފައްދާ މުދާ ރާއްޖެއަށް އެތެރެކުރުން މަނާކުރަން ކަސްޓަމުން ނިންމާފައިވަނީ އިކޮނޮމިކް މިނިސްޓްރީން އެގޮތަށް ކަސްޓަމްސަށް އަންގާފައިވާތީއެވެ. ކަސްޓަމުން ބުނީ އިޒްރޭލުން އުފައްދާ ބާވަތެއްގެ މުދާ ރާއްޖެއަށް އެތެރެކުރަން މަސައްކަތް ކޮށްފިނަމަ އެ މުދަލަކާއި މެދު އަމަލު ކުރާނީ ރާއްޖެއަށް އެތެރެކުރުން މާނާ ތަކެއްޗާއިމެދު އަމަލުކުރާ ގޮތަށް ކަމަށެވެ. 

"އަޅުގަނޑުމެން އެ ބާވަތެއް ހިފަހައްޓައި ނައްތައިލާނަން. އިޒްރޭލުން އުފައްދާ ބާވަތްތަކާމެދު ދެން އަމަލު ކުރާނީ ރާއްޖެއަށް ވެއްދުން މަނާ ތަކެއްޗާމެދު އަމަލުކުރާގޮތަށް،" ކޮމިޝަނާ ޖެނެރަލް އޮފް ކަސްޓަމްސް، އަހުމަދު މުހައްމަދު މިއަދު މީޑިއާތަކަށް މައުލޫމާތު ދެއްވަމުން ވިދާޅުވިއެވެ. 

މިއަހަރުގެ މިހާތަނަށް އެކަނިވެސް އިޒްރޭލުން ރާއްޖެއަށް 3.5 މިލިއަން ރުފިޔާގެ މުދާ އެތެރެކޮށްފައިވެއެވެ. އޭގެތެރޭގައި އެނެމް ގިނައިން ހިމެނެނީ، އިލެކްޓްރޯނިކް ސާމާނާއި، ޒައިތޫންޏާއި، ފަތްޕިލާވެލީގެ ބާވަތްތަކެވެ. މިދިޔަ އަހަރު އިޒްރޭލުން ރާއްޖެއަށް 9.8 މިލިއަން ރުފިޔާގެ މުދާ އެތެރެކޮށްފައިވެއެވެ. 

ދިވެހި ސަރުކާރުން އިޒްރޭލުގެ މުދާ އެތެރެކުރުން މަަނާކޮށްފައިވަނީ އެ ގައުމުން ފަލަސްތީނުގެ ޣައްޒާއަށް ދެމުން އަންނަ  އުދުވާނީ ހަމަލާތައް ކުށްވެރިކުރުމުގެ ގޮތުންނެވެ. އިޒްރޭލުން ފަލަސްތީނުގެ ޣައްޒާއަށް ހަމަލާދޭން ފެށިފަހުން މިހާތަނަށް 819 މީހުން މަރުވެފައިވާކަމަށް ރޮއިޓާއިސް އިން ބުނެއެވެ. އިޒްރޭލުން ޣައްޒާއަށް އެއްގަމާއި ވައިގެ މަގުން ހަމަލާދެމުން އަންނަތާ މިއަދަށް 18 ދުވަސް ވެއްޖެއެވެ. 

ދިވެހި ސަރުކާރުން ވަނީ އިޒްރޭލާއިއެކު ވެފައިވާ ތިން އެއްބަސްވުމެއް ވެސް އުވާލައިފައެވެ. އެއީ  ސިއްހީ އަދި ބޭސްފަރުވާ، ސަގާފީ ތައުލީމާއި ސައިންސާއި، ފަތުރުވެރިކަމުގެ ދާއިރާއިން ވެފައިވާ އެއްބަސްވުންތަކެވެ.