ފުލުހުންގެ ވަޒީފާގެ އުފާލަކީ އިންސާނިއްޔަތަށް ފޯރުކޮށްދޭ ޚިދުމަތް: ހޯމްމިނިސްޓަރ

ފުލުހުންގެ ވަޒީފާގެ އުފާލާއި އަރާމަކީ މައިދާނުގައި ދައްކާ ކުޅަދާނަކަމާއި އިންސާނިއްޔަތަށް ފޯރުކޮށްދޭ ޚިދުމަތްކަމަށް މިނިސްޓަރ އޮފް ހޯމް އެފެއާޒް ޢުމަރު ނަޞީރު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ފުލުހުންގެ "މެމޯރިއަލް ޑޭ" ފާހަގަ ކުރުމަށް ރޭ ބޭއްވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ ފުލުހުންގެ ވަޒީފާގައި ލިބޭ ހިތްހަމަޖެހުމާއި އުފަލަކީ އިންސާނެއްގެ ފުރާނަ ސަލާމަތް ކޮށްދެވުމާއި، ނުރައްކާތެރި ވަގުންނާއި ލުޓޭރުން މީހުން އަތުން ފޭރިގަންނަ މުދަލާއި ފައިސާ އޭގެ ޙައްޤުވެރިންނަށް ރައްދުކުރުުމެވެ. އަދި މިކަންކަން ރައްޔިތުންނަށް ކޮށްދީގެން ހިތަށްލިބޭ އުފާވެރިކަމާއި ހިތްހަމަޖެހުން ކަމަށެވެ.

"އިސްވެ ދެންނެވުނު ފަދަ އެތައް ހާދިސާއެއް ތަކުރާރުވަމުން އެބަދޭ. މި ފަދަ ކޮންމެ ޙަރަކާތެއްގައި އެ ފުލުހެއްގެ ހުނަރާއި ޢިލްމާއި ހަކަތަ ދިވެހި ރައްޔިތުންގެ ދިފާޢުގައި ހޭދަކުރާ ކޮންމެ ފުލުހެއްގެ ހަނދާން އާކޮށް ޝުކުރުވެރިވަން. އައްސަރިބަހާއި ސާބަސް ތަކުރާރުކުރަން" ޢުމަރު ވިދާޅުވިއެވެ.

އެމަނިކުފާނު ވިދާޅުވީ ފުލުހުންނަކީ ތާއަބަދު ރައްޔިތުންނަށް ޚިދުމަތް ކޮށްދީ ރައްކައުތެރި މާހައުލެއް މުޖުތަމައުގައި ގާއިމްކޮށް ދިނުމަށް މަސައްކަތް ކުރާބައެއް ކަމަށެވެ. އެމަސައްކަތުގައި އުޅޭއިރު ދިމާވާ ނުރައްކާތަކަށް އެއްވެސް ޖެހިލުމެއްނެތި ފުލުހުން ކުރިމަތިލާނެ ކަމުގެ ޔަގީންކަންވެސް އޮންނަ ކަމަށް މިނިސްޓަރ ވިދާޅުވިއެވެ.

ފުލުހުންގެ މުއައްސަސާގެ އިސްތިރާޖީއާ ބެހޭގޮތުން ވާހަކަފުޅު ދައްކަވަމުން މިނިސްޓަރ ވިދާޅުވީ ފުލުހުން ޤައުމާއި ދީނާއި ރައްޔިތުންނަށްޓަކައި އަދާ ކުރާ ޚިދުމަތަކީ ކުށްމަދު އަމާން ވެށްޓެއްގެ އިތުބާރު މުޖުތަމަޢަށް ކަށަވަރު ކޮށިދިނުންކަަމަށާއި ފުލުހެއްގެ ޤާބިލްކަން ބިނާވެފައި އޮންނަނީ، ޢަމަލީގޮތުން ޙަރަކާތްތެރިވުމުގެ ފުރުޞަތު ފުލުހުންގެ މީހާއަށް އޮންނަ ނިސްބަތަކުން ކަމަށް ވާއިރު ފުލުހުންގެ ޚިދުމަތުގެ އިސްތިޖާރީގައި އިސްކަން ދޭނީ ފުލުހުންނަކީ ޢަމަލީ ބަޔަކަށް ހެދުމަށް ކަމަށެވެ. އެހެންކަމުން ހުރިހާ ފުލުހުންވެސް ފުލުހުންގެ ޢަމަލީ މަސައްކަތުގެ ތަޖުރިބާ ހޯދުން އިތުރު ކުރަމުން ގެންދިއުމަށް މިނިސްޓަރ އެދިލެއްވިއެވެ. އޭގެ އިތުރުން މިނިސްޓަރ ވިދާޅުވީ ފުލުހުންގެ މިހާރުގެ އިސްތިރާޖީއަކީ ހިނގި ކުށަށް ފިޔަވަޅު އަޅަން ތިބުމުގެ ބަދަލުގައި ހިނގާފާނެ ކުށަށް ދުރާލާ އިސްވެ ފިޔަވަޅު އަޅައިގެން ތިބުންކަމަށާއި މުޖުތަމަޢުގެ އެންމެހައި ފަރާތްތަކާ ގުޅިގެން ފުލުހުންގެ ޚިދުމަތް ރައްޔިތުންނަށް ފޯރުކޮށްދިނުންކަމަށެވެ.

މިނިސްޓަރ ދެއްކެވި ވާހަކަ ފުޅުގައި ވިދާޅުވީ ފުލުހުން އުފެދިގެން އަންނަނީ ދިވެހި ރައްޔިތުންގެ ތެރެއިން ކަމަށާއި އެހެންކަމުން ފުލުހުންނާއި ރައްޔިތުންނަކީ އެއްބައެއް ކަމަށާއި ހަމައެކަނި ތަފާތުވަނީ ޒިންމާއާއި މަސްޢޫލިއްޔަތު ނުވަތަ ޤާނޫނީ ޙައިސިއްޔަތުކަމަށެވެ.

ފުލުހުންގެ ޒިންމާއާއި މަޞްޢޫލިއްޔަތާއި ޤާނޫނީ ހާއިސިއްޔަތުގެ މާނައާމެދު ވާހަކަފުޅު ދައްކަވަމުން މިނިސްޓަރ ވިދާޅުވީ އަނެކާއަށް ފުރާނައިގެ ގޮތުންނާއި މުދަލުގެ ގޮތުންނާއި އަދިވެސް އެހެން ގޮތްގޮތުންވެސް ރައްކާތެެރިކަން ހޯދައިދިނުމަކީ ކޮންމެ އަމިއްލަ ފަރުދެއްގެވެސް ޒިންމާއެއް ކަމަށާއި އަދި އެފަދަ ކަމެއް ހިނގާނަމަ އެކަމެއް ހުއްޓުވަން މަސައްކަތް ކުރުމަކީވެސް އަމިއްލަ ފަރުދެއްގެ މައްޗަށްވެސް އޮތް އެންމެ ރަނގަޅު ގޮތް ކަމަށާއި ނަމަވެސް ފުލުހުންނަށް އެއީ ޤާނޫނީ ވާޖިބެއް ކަމަށެވެ.ފުލުހުންނަށް ދިމާވާ ގޮންޖެހުންތަކުގެ މައްޗަށް އަލި އަޅުއްވާލައްވަމުން މިނިސްޓަރ ވިދާޅުވީ ފާއިތުވި ތަނުގައި ހިނގާފައިވާ ބައެއް ހިތާމަވެރި ހާދިސާތަކުގައި އެތައް ފުލުހެއްގެ އަގުބޮޑު މުދާ އަނދައި އަޅިއަށް ވެފައިވާކަމަށާއި މަގުމަތިން ފުލުހުންނާ ދިމާކޮށް ތޫނު އެއްޗެހިން ހަމަލާދީ ފުރައްސާރަކުރުމަށް ހިތްވަރު ލިބޭ ވެށްޓެއްއޮތުމާއި އެފަދަ ކަންކަން ނުހުއްޓުވި އަތްދަށުން ދޫވެފައި ވުމަކީ ފުލުހުންނަށް މިއަދު ކުރިމަތިވެފައިވާ ގޮންޖެހުންތައް ކަމަށެވެ. އެހެންކަމުން އެ ކަންތައްތަކަށް ފުރުޞަތު ނުދީ އެކަންތައް ހުއްޓުވުމަށް މަސައްކަތް ކުރަމުންދާކަމަށްވެސް ހޯމް މިނިސްޓަރ ޢުމަރު ނަޞީރު ވިދާޅުވިއެވެ.