ޕީޖީ ކަމަށް މުހުތާޒު އައްޔަން ކުރައްވައިފި

ޕްރޮސެކިޔުޓަރ ޖެނެރަލް ކަމުގެ މަގާމަށް އަލްއުސްތާޒު މުހުތާޒު ފަހުމީ މިއަދު އައްޔަން ކުރައްވައިފިއެވެ.

އެމަގާމަށް އޭނާ އައްޔަން ކުރެއްވުމަށް ރައީސް ޢަބްދުﷲ ޔާމީން ޢަބްދުލް ޤައްޔޫމްވަނީ މިއަދުވަނީ މަގާމުގެ ފަތްކޮޅުވެސް ހަވާލު ކުރައްވާފައެވެ. މިރަސްމިއްޔާތު ބާއްވާފައިވަނީ މިއަދު ހެނދުނު ރައީސް އޮފީހްގައެވެ.

މަގާމް ގެ ފަތްކޮޅު ދެއްވުމުގެ ކުރިން މުހުތާޒު ވަނީ ސްޕްރީމް ކޯޓުގެ ފަނޑިޔާރު އަލްއުސްތާޒު ޢަބްދުﷲ ‏‏‏ޢަރީފް ގެ ކުރިފުޅުމަތީގައި، މަގާމްގެ ހުވައި ކުރަށްވާފައެވެ. ހުވައި ކުރެއްވުމަށްފަހު އޭނާ ވަނީ ހުވައިގެ އިގްރާރުގައި ސޮއި ކުރައްވާފައެވެ.

މުހްތާޒު އެމަގާމަށް އައްޔަން ކުރުމަށް ރައްޔަތުނގެ މަޖިލީހުން ރުހުންދީފައިވަނީ އިއްޔެއެވެ. އޭނާއަށް ރުހުންދޭން ފެންނަ ކަމަށް 62 މެމްބަރުން ވަނީ ވޯޓުދެއްވާފައެވެ. ނުފެންނަ ކަމަށް ވޯޓު ދެއްވީ 7 މެންބަރުންނެވެ. 12 މެންބަރުން ވޯޓެއް ނުދެއްވައެވެ. ޖޭޕީންވަނީ ވޯޓުގައި ބައިވެރިނުވާން ނިންމާފައެވެ.

ޕީޖީ ކަމަށް އައްޔަން ކުރުމަށް ރުހުން ހޯދުމަށްޓަކައި ރައީސް ޔާމީން ވަނީ މުހްތާޒުގެ އިތުރަށް މައުމޫން ހަމީދުގެ ނަންފުޅުވެސް މަޖިލީހަށް ފޮނުވަވާފައެވެ. ނަމަވެސް މުހުތާޒުގެ ނަންފުޅު ފާސްވުމުން މައުމޫންގެ ނަންފުޅަށް ވޯޓަށް ނުއައްސަވައެވެ.

ޕީޖީއަކަށް ބޭފުޅަކު އައްޔަން ކުރެއްވީ އެމަގާމް ހުސްކޮށް އޮންނަތާ 8 މަހެއްހާ ދުވަސް ފަހުންނެވެ.