ދިރޭއެމުގެ މަސްވެރިކަމަށް އަށާރަހާސް ޑޮލަރު ދޭން ނިންމައިފި

ދިރޭއެމުގެ މަސްވެރިކަމުގެ މެނޭޖުމަންޓް ޕުލޭން ތަންފީޒު ކުރުމަށްޓަކައި ވަރލްޑް ވައިލްޑްލައިފް ފަންޑް (ޑަބްލިޔޫ ޑަބްލިޔޫ އެފް)، ޕާކިސްތާނުން ރާއްޖެއަށް ހިލޭ އެހީގެ ގޮތުގައި އަށާރަހާސް އެމެރިކާ ޑޮލަރު ދިނުމަށް ހަމަ ޖެހިފައިވާ ކަމަށް މެރިންރިސާރޗް ސެންޓަރުން ހާމަކުރައްވައިފިއެވެ.

މިއީ މެރިން ރިސާރޗު ސެންޓަރާއި، ޑަބްލިޔޫ ޑަބްލިޔޫ އެފް، ޕާކިސްތާނާ ދެމެދު ވެފައިވާ އެއްބަސްވުމެއްގެ ދަށުން ދިނުމަށް ހަމަޖެހިފައިވާ އެހީއެކެވެ. މިއެއްބަސްވުމުގައި ސޮއި ކުރައްވާފައިވަނީ ޖުލައި 14 ވަނަ ދުވަހުއެވެ.

މިއެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިޝަރީޒް މިނިސްޓަރ ޑރ. މުޙައްމަދު ޝައިނީ އެވެ.

މި އެއްބަސްވުމަކީ 20 އޮކްޓޫބަރ 2013 ގައި ޑަބްލިއު.ޑަބްލިއު.އެފް (ޕާކިސްތާން) އާއިއެކު ރާއްޖޭގެ ދޮށީގެ މަސްވެރިކަމަށް ލިބިފައިވާ މެރިން ސްޓްވާރޑްޝިޕް ކައުންސިލް ސަރޓިފިކެޓް ދެމެހެއްޓުމަށް ކުރަންޖެހޭ މަސައްކަތް ކުރުމަށް ސޮއިކުރެވިފައިވާ އެމް.އޯޔޫ ގެ ދަށުން ކުރާ ފުރަތަމަ މަސައްކަތް ކަމަށް މެރިންރިސާރޗް ސެންޓަރުން ހާމަކުރައްވާފައިވެއެވެ.

ދިރޭއެމުގެ މަސްވެރިކަމުގެ މެނޭޖްމަންޓް ޕްލޭންގައި ކުރުމަށް ރާވާފައިވާ މަސައްކަތުގެ ތެރެއިން ކަނޑުމަހާއި ކަންނެލީގެ މަސްވެރިކަމަށް ހިފާ އެމުގެ މިންވަރުބަލައި ދިރާސާ ކުރުން މިއެއްބަސްވުމުގައި ހިމަނާފައިވެއެވެ.

މީގެ އިތުރަށް އެން ހިފޭމިންވަރު މަސްވެރިން ފުރަންޖެހޭ ލޮގްފޮތުގައި ރެކޯރޑްކުރުމަށް މަސްވެރިން އަހުލުވެރި ކުރުވުމަކީވެސް މިއެއްބަސްވުމުގެ ދަށުން ކުރަން ޖެހޭ މަސައްކަތެކެވެ. ހިފާ އެން މަރުވުމަށް ދިމާވާ ސަބަބުތައް ބެލުމާއި ގިނަދުވަސް ވަންދެން ވަތުގައި އެން ދިރުވާފައި ބެހެއްޓުމަށް ކުރެވިދާނެ ކަންތައްތައް މަސްވެރިންނަށް ކިޔައިދިނުމަކީވެސް ކުރަން ޖެހޭ ކަމެއް ކަމަށް މެރިންރިސާރޗު ސެންޓަރުން ވަނީ ހާމަކުރައްވާފައެވެ.

މެރިން ރިސާރޗު ސެންޓަރުގެ ސީނިއާ ރިސާރޗު އޮފިސަރު އަޙުމަދު ރިޔާޒު ޖައުހަރީ ވިދާޅުވީ މިމަސައްކަތް ކުރާނީ ތިންބަޔަކަށް ރާއްޖެ ބަހައިގެން ކަމަށެވެ. އޭނާ ވިދާޅުވީ މަސްވެރިން އެންހިފާތަނާއި، އެންހިފާ މިންވަރު ދެނެގަތުމަށްޓަކައި މަސްވެރިންނާއެކު އެސެންޓަރުގެ ބޭފުޅަކު 30 ދަތުރު ކުރާނެ ކަމަށެވެ. އަދި މަސްވެރިން ހޭލުންތެރު ކުރުމުގެ ގޮތުންވެސް އެސެންޓަރުން މަސައްކަތްތަކެއް ކުރައްވާނެ ކަމަށްވިދާޅުވިއެވެ. އެކަމަށްވެސް މިފަންޑުގައި ފައިސާ ހިމަނާފައިވާ ކަމަށް އޭނާ ވިދާޅުވިއެވެ. މިމަސައްކަތް ރާއްޖޭގައި ފެށޭވަރުވާނީ އަންނަ ސެޕްޓެމްބަރުމަސް ތެރޭގައި ކަމަށްވެސް ޖައުހަރީ ވިދާޅުވިއެވެ.