ޕީޖީގެ މަގާމަށް މުހުތާޒު މުހުސިން އައްޔަން ކުރުމަށް މަޖިލީހުން ފާސްކޮށްފި

ޕްރޮސިކިއުޓަރ ޖެނެރަލްގެ މަގާމަށް މުހުތާޒު މުހުސިން އައްޔަން ކުރުމަށް ރައްޔިތުންގެ މަޖިލީހުން މިއަދު ރުހުން ދީފިއެވެ.

މަޖިލީހުގައި މިއަދުނެގި ވޯޓުގައި ޕީޖީއަކަށް މުހުތާޒު އައްޔަން ކުރުމަށް ފެންނަ ކަމަށް ފާސްކުރެއްވީ 62 މެމްބަރުން ވޯޓު ދައްވައިގެންނެވެ. އޭނާއާ ދެކޮޅަށް ވޯޓު ދެއްވީ 7 މެންބަރުންނެވެ. މިވޯޓުގައި ޖުމްހޫރީޕާޓީން ބައިވެރިވެފައެއް ނުވެއެވެ. އަދި އިތުރު 12 މެންބަރުންވެސް ވޯޓުގައި ބައިވެރިވެފައެއް ނުވެއެވެ.

އެމްޑީޕީގެ ބައެއް މެންބަރުންވެސް މުހުތާޒާ އެއްކޮޅަށް ވޯޓު ދެއް ވާފައިވެއެވެ. މައުލޫމާތު ލިބިުފައިވާ ގޮތުގައި އޭނާ ދެކޮޅަށް ވޯޓު ދެއްވާފައިވާ 7 މެންބަރުންނަކީވެސް އެމްޑީޕީގެ މެންބަރުންނެވެ.

ޕީޖީ ކަމަށް މުހުތާޒު އައްޔަން ކުރެއްވުމަށް މިއަދު ފާސް ކުރެއްވީ އެމަގާމަށް އޭނާއާ ވާދަ ކުރެއްވި މައުމޫން ހަމީދަށް ވޯޓު ދެއްވުމަށް ޕީޕީއެމްގެ ރައީސް މައުމޫން ޢަބްދުލް ޤައްޔޫމް ޕީޕީއެމްގެ ޕާލިމެންޓްރީ ގްރޫޕުގެ ލީޑަރު އަޙުމަދު ނިހާން ޙުސައިން މަނިކަށް ސިޓީއެއް ފޮނުވާފައިވަނިކޮށްނެވެ. އެސިޓީ ފޮނުވިޔަސް ޕީޕީއެމްގެ ޕީޖީ ގްރޫޕުންވަނީ މުހުތާޒަށް ވޯޓުދޭން ތްރީލައިން ވިޕެއް ނެރެފައެވެ.

ކޮމިޓީ މަރުހަލާގައި މައުމޫން ހަމީދަށް ލިބިފައިވަނީ 33 ޕޮއިންޓެވެ. މުހުތާޒަށްވަނީ 67 ޕޮއިންޓް ލިބިފައެއެވެ. މަޖިލީހުގެ ކޮމިޓީން ރުހުން ލިބެނީ 75 އަށް ވުރެ މަތިން މާކްސް ލިބުމުންނެވެ.