ޕީޖީކަމަށް މުހުތާޒު އިންތިޚާބު ކުރުމަށް ވޯޓުދޭން ޕީޕީއެމްއިން ނިންމައިފި

ޕްރޮސިކިއުޓާ ޖެނެރަލް (ޕީޖީ) ކަމަށް ބޭފުޅަކު އައްޔަން ނަގާ ވޯޓުގައި މުހުތާޒު މުހުސިނަށް ވޯޓު ދިނުމަށް ޕީޕީއެމްގެ ޕީޖީ ގްރޫޕުން މިއަދު ނިންމައި ތްރީލައިން ވިޕެއް ނެރެފިއެވެ.

ޕީޕީއެމްގެ ޕީޖީ ގްރޫޕުން މިގޮތަށް ނިންމިއިރު އެޕާޓީގެ ރައީސް އަލްއުސްތާޒު މައުމޫން އަބްދުލް ގައްޔޫމްވަނީ އެކަމަށް ކުރިމަތި ލައްވާފައިވާ އެހެން ބޭފުޅެއް ކަމަށްވާ މައުމޫން ހަމީދަށް ވޯޓު ދެއްވުމަށް އެދި ޕީޕީއެމްގެ ޕީޖީ ގްރޫޕަށް ސިޓީއެއް ފޮނުވާފައެވެ.

ޕީޖީއަކު ހޮވުމަށް ނަގާވޯޓުލުން އޮންނާނީ އަންނަ ހޯމަ ދުވަހު ބާއްވާ ރައްޔިތުންގެ މަޖިލީހުގައި ޖަލްސާގައެވެ.

މުހުތާޒަށް ވޯޓު ދެއްވުމަށް ފާސްކުރައްވާފައިވަނީ މުލީއާގޭގައި މިއަދު ބޭއްވެވި ޕީޖީ ގްރޫޕުގެ ބައްދަލުވުމުގައި ބައިވެރިވި 38 މެންބަރުންގެ ތެރެއިން 33 މެމްބަރުން ވޯޓު ދެއްވައިގެންނެވެ.

މި ބައްދަލުވުމުގައި އޮބްޒާވަރެއްގެ ގޮތުގައި ރައީސް މައުމޫން ބައިވެރިވެވަޑައިގަތުމަށް ކުރިން ނިންމަވާފައިވިޔަސް އެމަނިކުފާނު ބައިވެރިވެފައެއް ނުވެއެވެ. ރައީސް މައުމޫން ބައިވެރިވެ ވަޑައިނުގެންނެވި ސަބަބެއް އެނގިފައެއް ނުވެއެވެ. މައުމޫން ހަމީދަށް މަޖިލީހުގެ ކޮމިޓީން ރުހުން ނުލިބުނު މައްސަލަ ބެލުމަށް ރައީސް މައުމޫންވަނީ އެދިވަޑައިގެންފައެވެ. މީގެ ކުރިންވެސް މައުމޫންގެ ނަން މަޖިލީހަށް ހުށަހަޅައިވަނީ ފެއިލްވެފައެވެ.

ޕީޕީއެމުން ރުހުންދޭން ނިންމާފައިވާ މުހުތާޒަށް ކޮމިޓީ މަރުހަލާގައި ލިބިފައިވަނީ 67 މާކްސް އެވެ. މައުމޫން ހަމީދަށް ލިބިފައިވަނީ 33 މާކްސް އެވެ. ކޮމިޓީން ރުހުން ދިނުމަށް ނިންމާނީ 75 އަށް ވުރެ މަތިން މާކްސް ލިބިގެންނެވެ. މިދިޔައަހަރު އަހަރުގެ ނޮވެމްބަރު 25 ވަނަދުވަހުން ފެށިގެން ޕީޖީގެ މަގާމްވަނީ ހުސްވެފައެވެ.