ދިވެހި މަހުގެ އަގު ވައްޓާލުމަށް އެމްޑީޕީން ގެންދަނީ މަސައްކަތް ކުރަމުން: ޑރ. ޝައިނީ

ރާއްޖޭން އެކްސްޕޯޓުކުރާ މަހުގެ އަގު ވައްޓާލުމަށް އެމްޑީޕީން މަސައްކަތް ކުރާކަމަށް ފިޝަރީޒް މިނިސްޓަރ ޑރ. މުހައްމަދު ޝައިނީ ވިދާޅުވެއްޖެއެވެ.

ފިޝަރީޒް މިނިސްޓްރީގައި މިއަދު ބޭއްވި ނިއުސް ކޮންފަރެންސްގައި މިނިސްޓަރ ވިދާޅުވީ އެމްޑީޕީގެ ވަގުތީ ރައީސް މުހައްމަދު ނަޝީދު ދިވެހި ރާއްޖޭގެ މަސްވެރިކަމުގެ ސިނާއަތާ ގުޅޭގޮތުން "ހަގީގަތާ ހިލާފު" ވާހަކަފުޅުތަކެއް ދައްކަވަމުން ގެންދަވާ ކަމަށެވެ. އޭގެ ސަބަބުން ދިވެހިރާއްޖޭން ވިއްކާ މަހުގެ އަގު ވައްޓާލުމަށް ބައިނަލްއަގުވާމީ ދުނިޔޭގައި މަސައްކަތް ކުރާ ފަރާތްތަކަށް އިތުރު ބާރެއް ލިބިގެން ގޮސްފައިވާކަމަށް ވެސް މިނިސްޓަރ ވިދާޅުވިއެވެ.

"ކުރީގެ ރައީސްކަން ކުރެއްވި ބޭފުޅެއްގެ ހައިސިއްޔަތުން ރައީސްނަޝިދަށް އަޅުގަނޑުމެން އިހުތިރާމާއި ގަދަރުކުރަން ބޭނުންވޭ. އެހެން ނަމަވެސް (ރައީސް ނަޝީދު ވާހަކަފުޅުގެ ސަބަބުން) ދިވެހިންނަށް ބޮޑެތި ނޭދެވޭ އަސަރުތަކެއް ކުރާކަމަށްވަންޔާ އަޅުގަނޑުމެން އެބަޖެހޭ މިކަމަށް ކޮންމެވެސް ރައްދެއް ދޭން،" ޑރ. ޝައިނީ ވިދާޅުވިއެވެ.

ނަޝީދުގެ ވާހަކަފުޅުތައް ރާއްޖޭގެ ނޫސްތަކުގައި އޮތް އިރު ފިޝަރީޒް މިނިސްޓްރީން އަޅާނުލައި ދޫކޮށްލި ނަމަވެސް އެ މައްސަލަ ބައިނަލްއަގުވީ ނޫސްތަކުގައި ޖަހަން ފެށުމުން އެކަމާ އަޅައިނުލާ ނުތިބެވޭނެ ކަމަށް ވެސް މިނިސްޓަރ ވިދާޅުވިއެވެ.

"މިހާރު ރައީސް ނަޝީދުގެ ވާހަކަފުޅުތައް އޮތް ނޫހަކީ އަ ޓިއުނާ ޑޮޓް ކޮމް. އެއީ އެންމެގިނައިން ކަޅުބިލަ މަހުގެ މަސްވެރިކަމާ ގުޅޭގޮތުން އެންމެ ގިނަ މީހުން ބަލާ އަދި އެންމެ ގިނަމީހުން ކިޔާ މަޝްހޫރު މެގަޒިންއެއް. އެ ބޭފުޅުންނަކީ ރާއްޖޭގައި ޒަމާނުއްސުރެ ދެމެހެއްޓެނިވި ގޮތުގައި ކުރާ ކަޅުބިލަމަހުގެ މަސްވެރިކަމުގެ އަގު ވައްޓާލުމަށްފަހު، ބޮޑުދާ އަޅައިގެން މަސްވެރިކަން ކުރާ ފަރާތްތަކުގެ މަހުގެ އަގު މައްޗަށް ގެނައުމަށްޓަކައި އެގޮތަށް މަސައްކަތްކުރާ ބައެއް،"

ޑރ. ޝައިނީ ވިދާޅުވީ ރައީސް ނަޝީދު އެފަދަ ވާހަކަފުޅުތަކެއް ދައްކަވަނީ ޕީޕީއެމްގެ ސަރުކާރަށް "ހަސަދަވެރިވުމުގެ ގޮތުން" ކަމަށް ދެކެވަޑައިގަންނަވާ ކަމަށެވެ. މީގެ ކުރިން އެމްޑީޕީން ދިވެހިރާއްޖޭގެ ޓޫރިޒަމް ބޮއިކޮޓް ކުރުމުގެ މަސައްކަތްތަކެއް ކޮށްފައިވާކަމަށް ވެސް ޑރ. ޝައިނީ ވިދާޅުވިއެވެ. އަދި މިހާރު އެމްޑީޕީން ކުރަމުން އަންނަ މަސައްކަތްތަކަކީ އެ ބީދައިން ކުރަމުން އަންނަ މަސައްކަތްތަކެއް ކަމަށްވެސް ވިދާޅުވިއެވެ.

ރައީސް މުހައްމަދު ނަޝީދު ޖުލައި 7 ވަނަ ދުވަހު ކުރައްވާފައިވާ ޓްވީޓެއްގައި ވިދާޅުވެފައިވަނީ "އޮޑިދޯނި ފަހަރު މަހަށް ފުރާ އަދަދާއި، މަސްބޭނި މިންވަރު ކުރިން އައީ ރިޕޯޓު ކުރަމުން. އެހެން ނަމަވެސް މަސް ރިޕޯޓު ހުއްޓަލާފައިވާކަމީ ކަންބޮޑުވާކަމެއް." ކަމަށެވެ. އެހެން ނަމަވެސް އެއީ އެއްވެސް ހަގީގަތެއް ނުބައްލަވައި ނަޝީދު ދައްކަވާފައިވާ ވާހަކަ ފުޅެއްކަމަށް މިނިސްޓަރ ވިދާޅުވިއެވެ. "އަޅުގަނޑުމެން މިހާރު ކުރިއަށްވުރެ ރަނގަޅަށް މިކަން މިހާރު ރިޕޯޓުތައްވެސް ނަގަމުން މިއަންނަނީ،" ޑރ. ޝައިނީ ރައީސް ނަޝީދުގެ ޓުވީޓަށް ރައްދު ދެއްވަމުން ވިދާޅުވިއެވެ.

"އަޓިއުނާ ޑޮޓް ކޮމް" ގައި ޖުލައިމަހު ޝާއިއު ކޮށްފައިވާ ހަބަރެއްގައި ބުނެފައިވަނީ ރައީސް އަބްދުﷲ ޔާމީނުގެ ސަރުކާރުން ގެންގުޅޭ ސިޔާސަތުތަކަށް އެމްޑީޕީން ފާޑުކިޔާފައިވާކަމަށެވެ. އެގޮތުން ރާއްޖެއިން ކަނޑުމަސް ބޭރުކާ މިންވަރު ދަށްވެފައިވާކަމަށް ވެސް އެ ނޫހުގައި އެމްޑީޕީއާ ހަވާލާދީ ބުނެފައިވެއެވެ. އެމްޑީޕީވެރިކަމުގައި ކޮންމެ އަހަރަކު 6000 ޓަނުގެ މަސް އެކްޕޯޓު ކޮށްފައިވާ ކަމަށެވެ. އެހެން ނަމަވެސް އެމްޑީޕީ ވެރިކަމުން ދުރުކުރިފަހުން އެ އަދަދު 1900 ޓަނަށް ދަށްވެފައިވާކަމަށެވެ.

ފިޝަރީޒް މިނިސްޓަރ ވިދާޅުވީ އެމްޑީޕީން ރާއްޖޭގެ މަސްވެރިކަމާ ދެކޮޅަށް މަސައްކަތްތަކެއް ކުރި ކަމުގައިވިއަސް އެކަން ގާބޫލު ނުކުރާނެ ބަޔަކު އެބަތިބިކަމަށެވެ. އެގޮތުން ޔޫރަޕުގެ ގައުމުތަކުން ގުޅައި ރާއްޖޭގެ މަސްވެރިކަމާ ގުޅޭގޮތުން ނޫސްތަކުގައި ފަތުރާފައިވާ ވާހަކަތަކަކީ ތެދުތޯ މިނިސްޓަރާއި ސުވާލުކުރަމުން ގެންދާ ކަމަށް ވެސް ވިދާޅުވިއެވެ.

ރާއްޖޭގެ ހުރިހާ ސަރަހައްދަކުން ވެސް މަސްވެރިންނަށް އައިސް ލިބޭނެގޮތް ހެދުމަށް ސަރުކާރުން ކުރަމުން އަންނަ މަސަކަތްތަކަށް އެމްޑީޕީގެ މެޖޯރިޓީ އޮންނަ ކައުންސިލްތަކުން އެއްބާރުލުން ނުދޭކަމަށް މިނިސްޓަރ ވިދާޅުވިއެވެ. މިގޮތުން އައިސްޕްލާންޓު އެޅުމަށް ބޭނުންވާ ސަރަހައްދު ތަކުގެ ބިން ސަރުކާރަށް ކުއްޔަށް ދިނުމުގައި އަގު ބޮޑުކުރާކަން ފާހަކަވާކަމަށް ވެސް މިނިސްޓަރ ވިދާޅުވިއެވެ. ނަމަވެސް އެ ކައުންސިލްތަކަކީ ކޮބައިކަމެއް އަދި ކައުންސިލްތަކުން ކިޔާ އަގަކީ ކޮބައިކަމެއް މިވަގުތު ހާމަކުރައްވަން ބެނުންނުވާކަމަށް ވެސް މިނިސްޓަރ ވިދާޅުވިއެވެ.