ރައީސް ޔާމީނަކީ ގޭންގްތަކާ ގުޅުން އޮންނަ ބޭފުޅެއް ނޫން: ޢުމަރު

ރައީސް ޔާމީނާއި ގޭންގް ތަކާ އެއްވެސް ގުޅުމެއްނެތް ކަމަށް ހޯމްމިނިސްޓަރު ޢުމަރު ނަސީރު މިއަދު ވިދާޅުވެއްޖެއެވެ.

އުމަރު މިހެން ވިދާޅުވީ ރައްޔިތުންގެ މަޖިލީހުގެ ގަމުދާއިރާގެ މެންބަރު ފައްޔާޒު އިސްމާއީލް މިއަދުގެ ޖަލްސާގައި ކުރެއްވި ސުވާލަކަށް ޖަވާބު ދެއްވަމުންނެވެ. ރިޔާސީ އިންތިޚާބުގެ ތެރޭގައި ޢުމަރު ނަސީރު ވަނީ ޕީޕީއެމްގެ އޭރުގެ ރިޔާސީ ކެންޑިޑޭޓް އަދި މިހާރުގެ ރައީސް ޢަބްދުﷲ ޔާމީން އަބްދުލް ގައްޔޫމަކީ ގޭންގް ތަކާ ގުޅުން އޮންނަ ބޭފުޅެއް ކަމަށް ތުހުމަތު ކުރައްވައި ވާހަކަފުޅު ދައްކަވާފައެވެ.

މިކަމާ ގުޅިގެން ދުވަހަށް މައުލޫމާތު ދެއްވަމުން ވެސް ޢުމަރު ނަސީރު ވިދާޅުވީ ރައީސް ޔާމީނާމެދު އެފަދަ ތުހުމަތެއް ކުރެވޭނެ ޖަގައެއް ނެތް ކަމަށެވެ. "މައުލޫމާތު ލިބޭ ވަރަކުން އިއްޔެ ދުށްގޮތް މިއަދު ބަދަލުވާނެ. އަޅުގަނޑަށް ކުރިން ނޭނގޭ އެތައް މައުލޫމާތެއް މިހާރުވަނީ ލިބިފައި. ރައީސް ޔާމީނަކީ ގޭންގްތަކާ ގުޅުމެއް އޮންނަ ބޭފުޅެއް ނޫން،" ޢުމަރު ތަކުރާރު ކުރެއްވިއެވެ.

އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީގެ މަރާ ގުޅުންހުރި ކުއްޖަކާ ރައީސް ޔާމީން "ބައްދަލު" ކުރިކަމަށް ޢުމަރު ކުރިން ވިދާޅުވި ކަމަށް މީޑިއާގައި ވާހަކަ ފެތުރިޔަސް އެކުއްޖާއާ ބައްދަލުކުރިއޭ ވިދާޅުވެފައި ނުވާނެ ކަމަށެވެ. "އަޅުގަނޑު ބުނެފައިވާނީ ރައީސް ޔާމީނާ ބައްދަލުކުރަން އެކުއްޖާގޮސް އިންދާ ދުށީމޭ" ޢުމަރު ވިދާޅުވިއެވެ.

މިއަދުގެ ޖަލްސާގައި ގެމަނަފުށީ ދާއިރާގެ މެންބަރު ޖަމީލް އުސްމާން ވަނީ ރައީސް ޔާމީންގެ ސަރުކާރު ވައްޓާލުމަށް އިންޑިއާގެ އެހީ ބޭނުންވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެފައިވާތީ އެކަމަށް ފިޔަވަޅު އެޅުމާ ބެހޭގޮތުންވެސް ހޯމްމިނިސްޓަރު ޢުމަރު ނަސީރާ ސުވާލު ކުރައްވާފައެެވެ.

އެސުވާލުގެ ޖަވާބުގައި ޢުމަރު ވިދާޅުވީ ސިޔާސީ ބޭފުޅުން ދައްކަވާ ވާހަކަތަކުގައި އޮއްޓަރު ހުންނަ ވާހަކަތަކާއި އޮއްޓަރު ނެތް ވާހަކަތައް ހުންނާނެ ކަމަށެވެ. އެހެން ކަމުން ސިޔާސީ ބޭފުޅުން އެގޮތަށް ދައްކަވާ ވާހަކަފުޅުތަކުގައި އޮަށްޓަރުހުރީ ކިހާވަރަކަށްތޯ ބައްލަވާނެ ކަމަށެެވެ.

ގަމުދާއިރާގެ މެންބަރު އަލްްއުސްތާޒު ފައްޔާޒު އިސްމާޢީލް ވިދާޅުވީ އުމަރު ނަސީރާ އެސުވާލު ކުރެއްވީ ޢުމަރު ކުރިން ތުހުމަތު ކުރައްވާފައިވާ ސިފަތައް ރައީސް ޔާމީންގެ ކިބައިގައި ހުރިނަމަ އެއީ ރައްޔިތުން ކަންބޮޑުވާން ޖެހޭނެ ކަމެއް ކަމަށެވެ. އަދި ރައީސަކަށް ނިސްބަތްކޮށް އެފަދަ ވާހަކައެއް ދެއްކެވުމަކީވެސް ރައްޔިތުން ކަންބޮޑުވާން ޖެހޭ ކަމެއް ކަމަށެވެ. ރައީސްގެ ކިބައިގައި އެފަދަ ސިފަތަކެއް ހުރިތޯ ރައްޔިތުންނަށް ސާފުވާންޖެހޭ ކަމަށްވެސް ފައްޔާޒު ވިދާޅުވިއެވެ.

އަލްްއުސްތާޒު ފައްޔާޒު ވިދާޅުވީ ހޯމް މިނިސްޓްރީއަކީ ރައްޔިތުންނަށް ލިބިދީފައިވާ ހައްގުތަކާ މިނިވަންކަންވެސް ހިފަހައްޓާލެވިދާނެ ފަަދަ ބާރެއް ލިބިގެންވާ ވުޒާރާއެއް ކަމަށެވެ. އެފަދަ ވުޒާރާއެއްގެ ވާޒީރަކު ގައުމުގެ ރައީސަކަށް ނުވަތަ ރިޔާސީ ކެންޑިޑޭޓަކަށް ނިސްބަތްކޮށް އެފަދަ ވާހަކައެއް ދެއްކެވުމުން ކަންބޮޑުވެ ވަޑައިގަންނަވާ ކަމަށެވެ. އަދި އެފަދަ ވަޒީރަކު ރައްޔިންގެ މިނިވަންކަމާއި ހައްގުތައް "ނިގުޅައި ނުގެންފާނެ ބާވައޭ" އޭނާ ސުވާލު ކުރެއްވިއެވެ. އޭނާ ވިދާޅުވީ ސިޔާސީ ބޭފުޅުން ސިޔާސީ ފައިދާއަށް މިފަދަ ވާހަކަތައް ދެއްކެވުމުން އެކަމުގެ ނޭދެވޭ އަސަރު މުޅި މުއައްސަސާއަށް ކުރިމަތިވަމުން އަންނަ ކަމަށެވެ.

ފައްޔާޒު ވިދާޅުވީ ފުލުހުން ހައްގު ގޮތުގައި މީހަކު ހައްޔަރު ކޮށްގެން އުޅޭއިރު އެކަން އެކުރަނީ ރަނގަޅަށްތޯވެސް މިހާރު ސުވާލު އުފެދޭނެ ޖާގަ އެބައޮތް ކަމަށެވެ. އެހެން ކަމުން ހޯމްމިނިސްޓްރީ ފަދަ ވުޒާރާތަކުގެ ވަޒީރުންނަށް ވަޑައިގަންނަވާންވާނީ ހަރުދަނާ ބޭފުޅުން ކަމަށްވެސް ފައްޔާޒު ވިދާޅުވިއެވެ.މިކަމާ ގުޅިގެން ޢުމަރު ނަސީރު ވިދާޅުވީ ހޯމްމިނިސްޓްރީން އަބަދުވެސް ރައްޔިތުންގެ ހައްގުތަކާއި މިނިވަންކަން ހިމާޔަތް ކޮށްދެއްވާނެ ކަމަށެވެ. "އެކަމަށް އެއްވެސް ބޭފުޅަކު ޝައްކު ކޮށްގެން ނުވާނެ" ކަމަށެވެ. ނަމަވެސް ހައްގުތަކުގެ ބޭނުން އެއްވެސް މީހަކު ނަހަމަގޮތުގައި ހިފުމުގެ ފުރުސަތެއް ނޯންނާނެ ކަމަށްވެސް މިނިސްޓަރ ވިދާޅުވިއެވެ.