ފަލަސްތީނު ރައްޔިތުންނަށް ދެމުން އަންނަ އުދުވާނީ ހަމަލާތައް ކުށްވެރިކޮށް މާލޭގައި ހިނގާލުމެއް ބާއްވައިފި
16 ޖުލައި 2014 9:01
މާލޭގައި ރޭ ބޭއްވި ހިނގާލުމުގެ ތެރެއިން: ފޮޓޯ ޝޯޝަލް މީޑިއާ
ފަލަސްތީނުގެ ޣައްޒާގައި މުސްލިމުންނަށް ދެމުން އަންނަ އުދުވާނީ ހަމަލާތައް ކުށްވެރިކޮށް މާލޭގައި ރޭ ހިނގާލުމެއް ބާއްވައިފިއެވެ.
މާލޭ ސޯޝަލް ސެންޓަރުން ފަށައިގެން މަޖީދީ މަގުން އާޓިފިޝަލް ބީޗާއި ހަމައަށް ބޭއްވި ހިނގާލުމުގައި ވަނީ އިޒްރޭލުން އުފައްދާ ބާވަތްތައް ބޮއިކޮޓް ކުރުމަށް ވަނީ ގޮވާލައިފައެވެ. އަދި އެ ގައުމުގެ ބޮޑު ވަޒީރު ބެންޖަމިން ނަތަންޔާހޫ އާއި ދެކޮޅަށް ވެސް ޝިއާރުތައް ލިޔެފައިވާ ބޯޓުތައް ހިފައިގެން ބައެއް މީހުން ތިއްބެވެ. ގިނަ މީހުން ތިބީ ފަލަސްތީނުގެ ދިދަ ހިފައިގެނެވެ. ހިނގާލުމުގައި ހުރިހާ އުމުރުފުރައެއްގެ މީހުން ވެސް ބައިވެރިވިއެވެ. ސިޔާސީ ބޭފުޅުން ވެސް ބައިވެރިވެ ވަޑައިގެންނެވިއެވެ. މީގެ އިތުރުން ހިނގާލުމުގައި ރާއްޖޭގައި ދިރިއުޅޭ ފަލަސްތީނަށް ތާއީދުކުރާ ބިދޭސީން ވެސް ބައިވެރިވިއެވެ. ދިވެހިން އިމްތިޒާމްކޮށްގެން ބާއްވާ ހިނގާލުމެއްގައި މީގެ ކުރިން ބިދޭސީން ބައިވެރިވެފައެއް ނުވެއެވެ.
ހިނގާލުން އިމްތިޒާމުކުރީ ޒުވާނުން އިސްނަގައިގެނެވެ. އެހެން ނަމަވެސް ހިނގާލުން ފެށުމުގެ ކުރިން ރާއްޖޭގެ ބޮޑު ފަސް ސިޔާސީ ޕާޓީއަކުން ވަނީ ހިނގާލުމުގައި އޭބާރުލުން ދިނުމަށް އެއްބަސްވެފައެވެ. އެއީ އެމްޑީޕީ، ޕީޕީއެމް، ޖުމްހޫރީ ޕާޓީގެ އިތުރުން އަދާލަތު ޕާޓީއެވެ.
ހިނގާލުން ކުރިއަށް ގެންދިޔަ ވަގުތުގައި ފުލުހުންގެ އެހީތެރިކަން ވެސް ފޯރުކޮށްދީފައިވެއެވެ. ފުލުހުން އެހީތެރިވެފައި ވަނީ ޓްރެފިކް ކޮންޓްރޯލް ކުރުމަށާއި އަމަން ބެލެހެއްޓުމަށެވެ. ހިނގާލުން ކުރިއަށް ދިޔަ ވަގުތުގައި މާލޭގެ މަގުތައް މަތީގައި ބާރުބޮޑިވި ކަމުގައިވިއަސް ބަރުގަނޑު އަޅައި ހިނގާލުމުގެ ބައިވެރިންނަށް އެއްވެސް މިންވަރަކަށް އުނދަގޫވާނެ ފަދަކަމެއް ކޮށްފައެއް ވެސް ނުވެއެވެ. ހިނގާލުމުގެ ތެރޭގައި އެއްވެސް ހަމަނުޖެހުމެއް ނުހިނގައެވެ. ހިނގާލުން ނިންމާލާފައިވަނީ ފަލަސްތީނަށް ހެޔޮދުއާ ކުރުމަށްފަހުއެވެ.
ކިޔުންތެރިންގެ ހިޔާލު