އިިޒްރޭލުގެ އަނިޔާވެރިކަން ކުށްވެރިކޮށް ހިނގާލުންތަކެއް ބާއްވަނީ

އިޒްރޭލުން ފަލަސްތީނުގެ ޣައްޒާއަށް ދެމުންދާ، އަނިޔާވެރި ވައިގެ ހަމަލާތައް ކުށްވެރިކޮށް މާލޭގައި ތަފާތު ދެ ހިނގާލުމެއް ބޭއްވުމަށް ނިންމައިފިއެވެ.

ފުރަތަމަ ހިނގާލުން އޮންނާނީ މިއަދު ހަވީރު 4:00 ގައެެވެ. މިއީ ޒުވާނުންތަކެއް އިސްނަގައިގެން ބާއްވާ ހިނގާލުމެއް ކަމަށް މައުލޫމާތު ލިބިފައިވެއެވެ.

ދެވަަނަ ހިނގާލުން ބޭއްވުމަށް ހަމަޖެހިފައިވަނީ އަންނަ އަންގާރަ ދުވަހުގެރޭ 9:00 ގައި ސޯޝަލް ސެންޓަރު ކުރިމަތިން ކަމަށް މިހިނގާލުން އިންތިޒާމް ކުރާ ފަރާތުން ހާމަކޮށްފައިވެއެވެ. މި ހިނގާލުން ނިންމާލުމަށް ހަމަޖެހިފައިވަނީ ދުވާ ޓްރެކަށެވެ. ހިނގާލުން ނިންމާލުމަށްފަހު، ފަލަސްތީނާ މެދު އާންމުން ހޭލުންތެރި ކުރުމުގެ ގޮތުން ތަފާތު ހަރަކާތްތައް ހިންގުމަށް ވަނީ ހަމަޖައްސާފައެވެ. މިގޮތުން ޝުއޫރު ފާޅުކުރުމާއި ފަލަސްތީނާ ގުޅޭ ތަފާތު ވީޑިއޯ ޕްރެޒެންޓޭޝަންތައް ހުށަހެޅުމަށް ވެސް ވަނީ ނިންމާފައެވެ. މިއީ ސިޔާސީ ބައެއް ފަރާތްތަކާއިމ ޒުވާނުން ގުޅިގެން ބާއްވާ ހިނގާލުމެކެވެ.

ރައީސުލްޖުމްހޫރިއްޔާ އަބްދުﷲ ޔާމިިން ވަނީ ފަލަސްތީނަށް ދެމުން ގެންދާ ހަމަލާތައް ހުއްޓާލުމަށް ގޮވާލައްވާފައެވެ. އަދި އިދިކޮޅު ލީޑަރު ކުރީގެ ރައީސް މުހައްމަދު ނަޝީދުވެސް ވަނީ ފަލަސްތީނާ އެއްކޮޅަށް ހުރިހާ ދިވެހި ރައްޔިތުން އަޑުއުފުލުމަށް ގޮވާލައްވާފައެެވެ. ފަލަސްތީނުގައި އިޒުރޭލުން  ހިންގަމުންދާ ޖަރީމާތައް ރާއްޖޭގެ ހަތަރު ސިޔާސީ ޕާޓީއަކުން ވަނީ  ކުށްވެރިކޮށްްފައެވެ.

އެއީ ޕީޕީއެމާއި، ޖުމްހޫރީ ޕާޓީއާ، އާދާލަތާއި، އެމްޑީޕީއެވެ. އެމްޑީޕީން ވަނީ ޒިޒްރޭލާ ދެކޮޅަށް އަޑުއުފުލުމަށް ގަރާރެއް ފާސްކޮށްފައެވެ. އަދާލަތު ޕާޓީން ވަނީ ފަލަސްތީނުގެ ރައްޔިތުންނަށް އެހީތެރިވުމުގެ ގޮތުން ފަންޑެއް ހުޅުވުމަށް ނިންމާފައެވެ. އަދި އިސްލާމިކް މިނިސްޓްރީން ވަނީ ފަލަސްތީނު ރައްޔިތުންނަށް ދުއާކޮށްދިނުމަށް އަންގާފައެވެ. 

ޖުމްހޫރީ ޕާޓީން ބުނެފައިވަނީ ފަލަސްތީނު ރައްޔިތުންނަށް ދޭ ކޮންމެ އަނިޔާއަކީ މުސްލިމު ކޮންމެ ރައްޔިތަކަށް ދެވޭ އަނިޔާއެއް ކަމަށް ދެކޭކަމަށެވެ. 

ޕީޕީއެމުން ބުނެފައިވަނީ ފަލަސްތީނު ރައްޔިތުންނަށް ދެމުންދާ އަނިޔާތަކަކީ އިންސާނީ ހައްގުތަކާ ބެހޭ ބައިނަލްއަގުވާމީ އެތަކެއް މުއާހަދާތަކަކާ ހިލާފު އަދި ފަލަސްތީނު ރައްޔިތުންގެ ހައްގުތަކާ ބެހޭ ގޮތުން އދ. އިން ނެރެފައިވާ އެތައް ގަރާރަކާ ހިލާފު އަމަލުތަކެއް ކަމަށެވެ.