ދެބަންދާ ދިމާކޮށް ބޮޑު ބަންދެއް ލިބޭ ގޮތަށް ހަމަޖައްސަވައިފި
10 ޖުލައި 2014 14:18
ފިޠުރު ޢީދު ބަންދާ މިނިވަން ދުވަހުގެ ބަންދާއެކު އެއްހަފުތާ ލިބޭ ގޮތަށް ރައީސުލްޖުމްހޫރިއްޔާ އަބްދުﷲ ޔާމިން ހަމަޖައްސަވައިފިއެވެ.
އެމަނިކުފާނު ނިންމަވާފައިވަނީ މިމަހު 28 ވަނަ ދުވަހަކީ އީދު ދުވަހަށް ވެއްޖެނަމަ ޖުލައި 31 ވާ ބުރާސްފަތި ދުވަސް ބަންދު ކުރުމަށެވެ. އަދި އީދަށް ހަނދުު ނުފެނިއްޖެ ނަމަ ރޯދަ މަހުގެ 30 ވަނަ ދުވަސް ބަންދުކުރުމަށެވެ.
މިހެން ނިންމެވުމުން ފިޠުރު ޢީދާއި މިނިވަން ދުވަހުގެ މުނާސަބަތުގައި ބަންދުކޮށްފައިވާ ދުވަސްތަކާއެކު ނުވަ ދުވަހުގެ ޗުއްޓީއެއް ސަރުކާރު މުވައްޒަފުންނަށް ލިބޭނެއެވެ. އެއީ މިމަހުގެ 25 ވަނަ ދުވަހުން އަންނަ އޮގަސް މަހުގެ 3 ވަނަ ދުވަހާ ހަމައަށެވެ.
މިގޮތަށް ރައީސުލްޖުމްހޫރިއްޔާ ހަމަޖެއްސެވީ، ފިޠުރު ޢީދުގެ ބަންދާ ގުޅިގެން، ޗުއްޓީގަޔާއި އެނޫން އެހެން ބޭނުންތަކުގައި ރަށުން ބޭރަށްދާން ބޭނުންވާ ސަރުކާރު މުވައްޒަފުންނަށް ލުޔެއް ދެއްވުމުގެ ގޮތުންކަމަށް ރައީސް އޮފީހުން ހާމަކުރައްވާފައިވެއެވެ.
ކިޔުންތެރިންގެ ހިޔާލު