ސިއްހީ ދާއިރާގެ ފެންވަރު ދަށްވުމުގެ ޒިންމާ ނަގަން ޖެހޭނީ ކުރީގެ ސަރުކާރުން: ރައީސް ޔާމިން

ސިއްހީ ދާއިރާގެ ހާލަތު މިއަދު މިއޮތް މިންވަރަށް ގޯސް ވާންޖެހުމުގެ ޒިންމާ ނަގަން ޖެހޭނީ ކުރީގެ ސަރުކާރުން ކަމަށް ރައީސުލްޖުމްހޫރިއްޔާ އަބްދުﷲ ޔާމިން ވިދާޅުވެއްޖެއެވެ.

ރައީސް ޔާމިން މިހެން ވިދާޅުވީ އިހަވަންދޫ ދާއިރާގެ މެމްބަރު މުހައްމަދު އަބްދުﷲ ޕީޕީއެމާ ގުޅިވަޑައިގަތުމަށް ރޭ މުލިއާ ގޭގައި ބޭއްވި ބައްދަލުވުމުގައެވެ. 

ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ރައީސް ޔާމީން ވިދާޅުވީ އެއްވެސް އިރެއްގައި ސިއްހީ ދާއިރާއަށް ޖަހާފައި އޮތް ބަޖެޓު ކުޑަ ނޫންކަމަށެވެ. މިހެންކަމުން ސިއްހީ ފަރުވާދޭ ތަންތަނުގެ ފެންވަރު ދަށްވެގެން ދާއިރު އެތަންތަނުގެ "އާބާތުރަ ނުފިލުވި" އޮތީ ކުރީގެ ސަރުކާރުން ކަމަށް ރައީސް ޔާމިން ވިދާޅުވިއެވެ. 

"ސިއްހީ ދާއިރާއާ މެދު އަޅާލުން ކުޑަކަމަށް މިދެކެވޭ ވާހަކަ. ބަޖެޓުގައި ހުރި އަދަދުތަކަށް ބަލަންޏާ ސިއްހީ ދާއިރާއަށް އަޅާލުން ކުޑައެއް ނޫން. ސިއްހީ ދާއިރާއަށް ފައިސާ އެބަހުރި އެހެން ނަމަވެސް މިދިޔަ ހަތަރު ފަސް އަހަރެއްގެ ތެރޭގައި އިމާރާތްތަކަށް ދަންދެން އާބާތުރަ ނުފިލުވާ ތަންތަން ހަލާކުވާ ހިސާބަށް ގޮސްފައި އޮތީ. އެއީ ކުރީގެ ސަރުކާރުން ހަމަ ޒިންމާ އުފުއްލަވަން ޖެހޭކަމެއް،" 

ރައީސް ވިދާޅުވީ ރައީސް ނަޝީދުގެ ވެރިކަމުގައި ވެސް ސިއްހީ ދާއިރާއަށް ޕީޕީއެމުން އެއްބާރުލުން ދީގެން ބޮޑެތި ބަޖެތަކެއް ފާސްކޮށްދީފައި ހުންނާނެ ކަމަށެވެ. 

"ސަތާރަ މިލިއަން އަށާރަ މިލިއަން ރުފިޔާގެ ބަޖެޓު ހުންނާނެ ފާސްކޮށްދީފައި. އެެހެންވީމާ އެހާބޮޑަށް އަޅާނުލެވި ހުރީމައި މިގޮތަށް މިވީ. އަތޮޅުތެރޭގައި ވެސް ހުރި ސިއްހާ ތަންތަނަށް އަޅާނުލެވި އޮތީ،" ރައީސް ޔާމިން ވިދާޅުވިއެވެ. 

ރައީސް ޔާމިން ވިދާޅުވީ ކުރީގެ ސަރުކާރަށް ދަތުރު ފަތުރު ކުރުމުގެ ނިޒާމުގެ ކަންކަން ވެސް ރަނގަޅަށް ކުރިއަށް ނުގެންދެވުނު ކަމަށެވެ. މިގޮތުން ބަލިމީހުން އެއްރަށުން އަނެއްރަށް އުފުލުހުމުގެ މަސައްކަތް ސީ އެމްބިއުލާންސްގައި ފަށަން ޖެހިފައިވަނީ މި ސަރުކާރަށް ކަމަށް ވެސް ރައީސް ޔާމިން ވިދާޅުވިއެވެ. 

އަދި ރައީސް ޔާމިން ވިދާޅުވީ މަޖިލީހުގެ ތެރެއިން ސަރުކާރު ޒިންމާދާރު ކުރަންޖެހޭ ފަދަ ކަމެއް ނުހިގާކަމަށެވެ. އަދި ބައެއް ހިދުމަތްތައް ސަރުކާރުން ފޯރުކޮށް ނުދެވި އޮތީ ސަރުކާރުގެ ރިސޯސް މިވަގުތު އޮތްގޮތުން ކަމަށެވެ.

"ސަރުކާރު ގޯހެއް ހަދައިގެން ސަރުކާރު ޖަވާބުދާރީ ކުރުވަންޖެހޭ ވަރުގެ މައްސަލައެއް ހަގީގަތުގައި މަޖިލީހަށް އަދި ނާދޭ. އެހެނަސް ވަޒީރަކާ ސުވާލުކުރުމުގެ ތެރޭގައި ސަރުކާރުން ވަކިކަމަކާ އަޅާނުލެވި ނުވަތަ ސަރުކާރުގެ ރިސޯސް މިވަގުތު ހުރި ގޮތުން ވަކިކަމެއް ނުކުރެވި ހުރެ މައްސަލަ މައްސަލައަކަށް ހަދާކަމަށްވަންޏާ އެއީ މައްސަލައަކަށް ވެދާނެ،"