ހައްދުންމަތީ ހަތަރު ރަށެއް ލިންކް ރޯޑަކުން ގުޅާލުމުގެ އެއްބަސްވުމުގައި ސޮއި ކޮށްފި
8 ޖުލައި 2014 17:25
ލިންކް ރޯޑު ހެދުމުގެ އެއްބަސްވުމުގެ ލިޔެކިޔުން ބަދަލު ކުރައްވަނީ
ހައްދުމަތީގެ ހަތަރު ރަށެއް ލިންކު ރޯޑަކުން ގުޅާލުމުގެ އެއްބަސްވުމެއްގައި މިއަދު ސޮއި ކޮށްފިއެވެ.
މިއީ މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރއާއި ޗައިނާގެ ޖިއަންގސޫ ޕްރޮވިންޝަލް ޓްރާންސްޕޮޓޭޝަން އިންޖިނިއަރިންގ ގްރޫޕް ކޯ. ލިމިޓެޑް އާއި ގުޅިގެން ޗައިނާގެ ހިލޭއެހީގެ ދަށުން ކުރިއަށް ގެންދާ މަޝްރުއެކެވެ.
މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރގައި މިއަދު ބޭއްވި މިރަސްމިއްޔާތުގައި މިނިސްޓްރީގެ ފަރާތުން ސޮއި ކުރެއްވީ ޕާރމަނަންޓް ސެކްރެޓަރީ ޑރ. މުޙައްމަދު ޝަރީފެވެ. ޖިއަންގސޫ ޕްރޮވިންޝަލް ޓްރާންސްޕޮޓޭޝަން އިންޖިނިއަރިންގ ގްރޫޕްގެ ފަރާތުން ސޮއި ކުރެއްވީ ވޭންގް ޔިރޫއެވެ.
މިއެއްބަސްވުމުގެ ދަށުން ލިންކު ރޯޑުން ގުޅައިލެވޭނީ ލ. ގަން، މާންދޫ، ކައްދޫ، ފޮނަދޫ އެވެ. މިލިންކް ރޯޑަކީ 15 ކިލޯމީޓަރުގެ މަގެކެވެ. މިމަގު ހެދިގެންދާނީ ޒަމާނީ ފެންވަރަށެވެ.
މިމަޝްރޫޢުގެ މަސައްކަތް 2 އަހަރުގެ ތެރޭގައި ނިންމުމަށްވަނީ ހަމަޖެހިފައެވެ. މި މަޝްރޫއުގެ އަމަލީ މަސައްކަތް ފެށުމަށް ހަމަޖެހިފައިވަނީ މިއަހަރުގެ ސެޕްޓެމްބަރ މަހު ކަމަށް ހައުސިން މިނިސްޓްރީން ވަނީ ހާމަކުރައްވާފައެވެ.
ޑރ. މުޙައްމަދު ޝަރީފް ވަނީ ޗައިނާ ސަރުކާރުން ދިވެހިރާއްޖެއާ އެކު ބާއްވަމުން ގެންދަވަނީ ވަރަށް ގާތް ގުޅުމެއް ކަމަށެވެ. ރާއްޖޭގެ ތަރައްޤީގެ އެކިއެކި ކަންކަމުގައި އެގައުމުން ވަރަށް ބޮޑަށް އެހީވަމުން ގެންދާ ކަމަށެވެ. އެކަމަށްޓަކައި ޗައިނާ ސަރުކާރަށް ޝުކުރު ދަންނަވާ ކަމަށްވެސް ވިދާޅުވިއެވެ.
ކިޔުންތެރިންގެ ހިޔާލު