މާލޭ މަގުތައް މަރާމާތު ކުރުމަށް ބެޖެޓުކުރި ހަ މިލިއަން ރުފިޔާ ސިޓީކައުންސިލަށް ނުލިބޭ: ޑެޕިޔުޓީ މޭޔާރު

މާލޭ މަގުތައް، މަރާމާތު ކުރުމަށް ބަޖެޓުގައި ހިމަނާފައިވާ ހަ މިލިއަން ރުފިޔާ މާލޭ ސިޓީކައުންސިލަށް އަދިވެސް ނުލިބޭ ކަމަށް އެ ކައުންސިލްގެ ޑެޕިއުޓީ މޭޔަރު ޝިފާ މުހައްމަދު ވިދާޅުވެއްޖެއެވެ.

ޝިފާ ވިދާޅުވީ މާލޭ މަގުތައް މިހާރުން މިހާރަށް ވެސް މަރާމާތު ކުރަން ޖެހިފައިވާ ކަމަށެވެ. މަގުތައް ހަލާކުވެފައި އޮތުމުގެ ސަބަބުން ސިޓީ ކައުންސިލަށް އެތައް ބައިވަރު ޝަކުވާތަކެއް ލިބިފައިވެއެވެ. އެހެން ނަމަވެސް ފައިސާ ނެތި މަގުތައް މަރާމާތު ނުކުރެވޭނެ ކަމަށް އޭނާ ވިދާޅުވިއެވެ.

"މަގުތައް އެބަޖެހޭ މާރާމާތު ކުރަން. މަލޭ މަގުތައް މަރާމާތު ކުރުމަށް ބަޖެޓުގައި ސަރުކާރުން ޖަހާފައި އޮތް ހަ މިލިއަން ރުފިޔާ ހައުސިން މިނިސްޓްރީއާއި ހަވާލުކޮށްފައި އޮތްކަމަށް އަޅުގަނޑަށް އަޑުއިވިފައި އޮތީ. އެކަން ވެސް ބަލަމުން މިގެންދަނީ. ހުރިހާ ކަމެއްވެސް ހައްލުކުރެވެން އޮތީ ފައިސާ ލިބިގެން. އަޅުގަނޑުމެން ސިޓީ ކައުންސިލަށް ކުރެވެން އޮތް ކަމަކީ ކަން ކުރާނެ މަގު ހޯދުން. ދައުލަތުން ފައިސާ ފޯރުކޮށްދީގެން ނޫނީ އެއްވެސް މަަސައްކަތެއް ކުރިއަކަށް ނުގެންދެވޭނެ،" ޝިފާ ވިދާޅުވިއެވެ.މާލޭ މަގުތަކަށް ދިމާވެފައިވާ އެންމެ ބޮޑު އެއް މައްސަލައަކީ ހުޅަނގު ފަރާތުން އައިޖީއެމް ހޮސްޕިޓަލުގެ ބިއްދޮށުގައި ހުންނަ ކާނުތަކުން ބޮޑުތަކުރުފާނު މަގަށް ލޮނު އެރުމެވެ. އަދި ވިއްސާރަ ދުވަސްވަރު ބޮޑު ސަރަހައްދެއްގައި ފެންބޮޑުވުމެވެ.

މާލޭ މަގުތަކަށް ލޮނު އަރާ މައްސަލައިގައި ސިޓީ ކައުންސިލުން ވަނީ އެންވަޔަރުމަންޓް ޕްރޮޓެކްޝަން އެޖެންސީ (އީޕީއޭ) އާ ގުޅިގެން ދިރާސާއެއް ވެސް ކުރިއަށް ގެންގޮސްފައިއެވެ. ޝިފާ ވިދާޅުވީ މާލޭގެ ކާނުތައްކުން ފެން ބޭރުކުރުމަށް ހުރި ޕަންޕުތައް މަރާމާތު ކުރުމަށް ފަސް ލައްކަ ރުފިޔާ ހަރަދުވާނެ ކަމަށެވެ. އެހެން ނަމަވެސް އެ މަސައްކަތް ނުކުރެވި ހުއްޓިފައިވަނީ ބަޖެޓުގެ ތާށިކަމުންނެވެ.

"ހުރިހާ ކަމަކަށް ވެސް މި ބޭނުންވަނީ ފައިސާ. ފައިސާ ނެތި އެއްވެސް ކަމެއް ނުކުރެވޭނެ. ފަސްލައްކަ ވަރަަކަށް ރުފިޔާ އެބަ ބޭނުންވޭ ފެންބޭރުކުރަން ހުރި ޕަންޕުތައް މަރާމާތު ކުރަން ވެސް،"

އޭނާ ވިދާޅުވީ އެކަށީގެންވާ ބަޖެޓެއް ނުލިބި މާލޭ މަގުތަަކަށް ދިމާވެފައިވާ މައްސަލަތައް ހައްލު ނުކުރެވޭނެ ކަމަށެވެ. އެހެން ނަމަވެސް އެ މައްސަލަތަކަށް ވަގުތީ ހައްލެއް ގެނައުމުގެ ގޮތުން ސިޓީ ކައުންސިލުން ގެންދަނީ މަގުތަކުގެ ކާނުތައް ސާފުކޮށް ބަލަހައްޓަމުންނެވެ. މައްސަލަ އިތުރަށް ގޯސްވިޔަ ނުދިނުމަށް ކާނުތައް ސާފުކޮށް ބެހެއްޓުމަކީ މުހިންމު ކަމެއްކަމަށް ޝިފާ ވިދާޅުވިއެވެ. މާލޭގައި ދިރިއުޅޭ މީހުންގެ އެހީތެރިކަން އެކަމަށް ބޭނުންވާކަމަށް ވެސް އޭނާ ވިދާޅުވިއެވެ.

"އަޅުގަނޑުމެންނަށް މިވަގުތުން މިވަގުތަށް ގެނެވެން އޮތް ހައްލަކީ ކާނުތައް ސާފުކޮށް ބެލެހެއްޓުން. އެކަން އަޅުގަނޑުމެން އެވަނީ ކޮށްފައި. ސިގިރޭޓު ބުއިމަށްފަހު ބަޓުބުރި، ކާނުތެރެއަށް އެއްލާ ނުލައްވާށޭ އަޅުގަނޑުމެން މި ދަންނަވަނީ. ކުނިކެހުމަށްފަހު ކުނިތައްވެސް ކާނުގެތެރެއަށް އެޅުން ހުއްޓާލައްވަން އެބަޖެހޭ،" ޝިފާ ވިދާޅުވިއެވެ.

  އުދައަރާ މައްސަލަ ހައްލުކުރުމަށް އެންވާރުމަންޓު މިނިސްޓްރީ އާއި ވަނީ މަޝްރާކޮށްފައި. މަޝްވަރާކުރުމަށް ފަހު އެ މަސައްކަތުގެ އަމަލީ ސިފަ ގެނެވެނީ އެކަމަށް ވެސް ބޭނުންވާ ބަޖެޓު ލިބިގެން ކަމަށް ޝިފަ ވިދާޅުވިއެވެ. މާލޭ ހުޅަނގު ފަރާތުން ބޮޑުތަކުރު ފާނު މަގަށް މޫދުން ފެން އަރަމުން އަންނަނީ މާލެ އެފަޅިއަށް އަރިއަށް އޮންނާތީ. އެ މައްސަލަ ހައްލުކުރުމަށް އެންވާރުމަންޓު މިނިސްޓްރީ އާއި މަޝްވަރާ ކުރަމުން އަންނަކަމަށް ޝިފާ ވިދާޅުވިއެވެ.