އެއްގަމު އުޅަނދުފަހަރުން ނަގާ ފީއަކީ ސަރުކާރަށް ލިބެންޖެހޭ އެއްޗެއް: މީރާ

އެއްގަމުގައި ދުއްވާ އުޅަނދު ފަހަރުން ނަގާ ފީއަކީ ސީދާ ސަރުކާރަށް ލިބެންވާ ފައިސާއެއް ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ބުނެފިއެވެ.

މިރާއިން މިހެން ބުނެފައިވަނީ އައްޑޫ ސިޓީގައި ދުއްވާ އެއްގަމު އުޅަނދުފަހަރުން ފީނެގުމަށްފަހު އެފައިސާ މީރާއަށް ނުފޮނުވާ މައްސަލައާ ގުޅިގެންނެވެ. މިމައްސަލައާ ގުޅިގެން އައްޑޫ ސިޓީ ކައުންސިލްގެ ރައީސް ޢަބްދުﷲ ޞާދިގު (ސޯބެ) ވިދާޅުވެފައިވަނީ އެފައިސާ މީރާގެ އެކައުންޓަށް ޖަމާ ނުކުރަނީ އެއީ ލާމަރުކަޒީ ގާނޫނުގެ ދަށުން އެކައުންސިލަށް ލިބެންޖެހޭ އެއްޗަކަށްވާތީ ކަމަށެވެ.

އައްޑޫސިޓީން މިފައިސާ މީރާއަށް ނުފޮނުވާތީ މީރާއިން ވަނީ ވެހިކަލްގައި ޖަހާ ސްޓިކަރ އެސިޓީއަށް ފޮނުވުން ހުއްޓާލައިފައެވެ. ސްޓިކާ ފޮނުވުން ހުއްޓާލުމުން އައްޑޫ ސިޓީ ކައުންސިލުންވަނީ އަމިއްލައަށް ސްޓިކާ ހަދައިގެން ވެހިކަލްތަކުގައި ޖަހަން ފަށައިފިއެވެ.މިކަމާ ގުޅިގެން މީރާގެ ޑައިރެކްޓަރު ޖެނެރަލް ރިޓާރން އެންޑް ޕޭމަންޓް ޕްރޮސެސިން އަޙުމަދު ޝަރީފް ވިދާޅުވީ "މައްސަލައަކީ ސްޓިކާއެއްނޫން. މައްސަލައަކީ އަހަރީފީ. ސްޓިކާއަކީ އަހަރީ ފީ ދެއްކިކަން އަންގައިދިނުމުގެ ގޮތުން ޖަހާ އެއްޗެއް. ސްޓިކާ ޖަހާފައި ހުއްޓަސް އެފައިސާ ދެއްކިކަން މީރާގެ ސިސްޓަމުން ނުދައްކާ ކަމަށްވާނަމަ ފައިސާ ދެއްކި ކަމަށް ނުބެލެވޭނެ،" ކަމަށެވެ.

ޝަރީފް ވިދާޅުވީ ލާމަރުކަޒީ ގާނޫނުގެ ދަށުން ކައުންސިލަށް ނެގޭނެ ފީތަކެއްވެސް އެބަހުރި ކަަމަށެވެ. ނަމަވެސް އެއްގަމު ދުއްވާ އުޅަނދު ފަހަރުން ނަގާ ފީއަކީ ސީދާ މައިސަރުކާރަށް ލިބެން ޖެހޭ އެއްޗެއްކަން ފިނޭންސް މިނިސްޓްރީން ދެފަހަރެއްގެ މަތީން ސިޓީކައުންސިލަށް އަންގާފައިވާ ކަމަށެވެ.

ޝަރީފް ވިދާޅުވީ މިކަމާ ގުޅިގެން އާމުންނަށް ދިމާވެދާނެ ދަތިކަމަކަށް ވަރަށް ބޮޑަށް ވިސްނަވާ ކަމަށެވެ. އެކަން ހައްލު ކުރުމަށް ކަމާބެހޭ ފަރާތްތަކާއެކު މަޝްވަރާ ކުރަމުން ގެންދާ ކަމަށްވެސް އޭނާ ވިދާޅުވިއެވެ.

މިކަމަށް މަޝްވަރާ ކުރަމުން ގެންދާތީ ސްޓިކާގެ މައްސަލަ ހައްލު ކުރުމަށް ފުލުހުން އަދި އެއްވެސް މަސައްކަތެެއް ކޮށްފައެއް ނުވެއެވެ. ވެހިކަލްތައް ދުއްވާ މީހުން އައްޑޫ ސިޓީން ދޫކުރަމުންދާ ސްޓިކާ ޖަހައިގެން ދުއްވަނީ ފައިސާ ދެއްކުމަށްފަހު އެމީހާ ކުރަންޖެހޭ ކަންކަން ފުރިހަމަ ކުރުމަށްފަހުއެވެ. އެކަން އެގޮތަށް ކުރަނީ އައްޑޫ ސިޓީގެ އެންގެވުމުގެ މަތިން ކަމަށްވުމުން އާންމުންގެ މީހާއާ މެދު ފިޔަވަޅު އެޅުމަކީ ފަސޭހަ ކަމަމަކަށް ނުވާނެ ކަމަށްވެސް ފުލުހުން ވަނީ ބުނެފައެވެ.