މާލޭ މަގުތަކަށް ކުނިއެޅުން ހުއްޓުވޭނީ ރައްޔިތުން ހޭލުންތެރި ކޮށްގެން: ޑެޕިއުޓީ މޭޔަރު

މާލޭ މަގުތަކަށް ކުނި އެޅުމުގެ މައްސަލަ ހައްލުކުރެވޭނީ ގާނޫނީ ގޮތުން ހަރުކަށި ފިޔަވަޅުތަކެއް އެޅުމުގެ ބަދަލުގައި ރައްޔިތުން ހޭލުންތެރިވެގެން ކަމަށް މާލޭ ސިޓީ ކައުންސިލްގެ ޑެޕިއުޓީ މޭޔަރ ޝިފާ މުހައްމަދު ވިދާޅުވެއްޖެއެވެ.

މާލޭ މަގުތަކަށް ކުނި އެޅުން މަދުކުރުމަށް މާލޭ ސިޓީ ކައުންސިލުން ވަނީ ގަވާއިދެއް ހަދައި އެ ގަވާއިދު ތަންފީޒު ކުރުމަށް ފުލުހުންނާއި ހަވާލުކޮށްފައެވެ. އެހެން ނަމަވެސް މިހާތަނަށް ޖޫރިމަނާ ކޮށްފައިވަނީ 10 ވަރަކަށް މީހުންކަމަށް ޝިފާ ވިދާޅުވިއެވެ. ޖޫރިމަނާ ކުރާ މީހުންގެ އަދަދު މިހާ މަދު ވުމަކީ ކުނި އަޅާ މީހުންގެ އަދަދު މަދުވުން ނޫންކަމަށް ވިދާޅުވިއެވެ.

"ފުލުހުން ކިހިނެއްތޯ އަބަދު މީހަކު މަގު މައްޗަށް ކުނިކޮޅެއް ވައްޓާލާތޯ ބަލަން ތިބޭނީ؟ ކޮންމެ މީހެއްގެ ފަހަތުގައި ފުލުހެއް އަޅުގަނޑުމެންނަކަށް ނުބެހެއްޓޭނެ."

ކުނި މެނޭޖްކުރުމާ ބެހޭ ގަވާދުގައިވާ ގޮތުން މަގުތަކާއި ގޮނޑުދޮށްތަކާއި ފަޅުތެރެ އާއި ބަނދަރު ފަދަ ތަންތަނަށް ކުނި އަޅައިފި ނަމަ 5-500 ރުފިޔާ އާ ދެމެދުގެ އަދަދަކުން ޖޫރިމަނާކުރެވެ އެވެ. އަދި ތަންފީޒީ އިދާރާއަކުން ހުއްދަ ދީފައިވާ ތަންތަން ނޫން އެހެން ތަންތަނަށް ކުނި އެޅުމާއި އެކުމަކީ ވެސް މަނާ ކަމެކެވެ. އޭގެ އަދަބަކީ 501 ރުފިޔާއާއި، 100 މިލިއަން ރުފިޔާއާ ދެމެދުގެ ޖޫރިމަނާ ކުރުމެވެ.

މާލޭ މަގުތައް މަތީގައި ޑަސްބިން ބަހައްޓާފައި ހުރި ނަމަވެސް އެ ތަކެތީގެ ބޭނުން ވެސް ފުރިހަމަ ގޮތުގައި ނުހިފާކަމަށް އޭނާ ވިދާޅުވިއެވެ.

"ބައެއް ބޭފުޅުން ޑަސްބިން ތަކަށް މަދުން ނަމަވެސް ކަރު ގޮހޮރުވެސް އެބަ އަޅާ. މިހެން ކަން ކުރުމުގެ ސަބަބުން އެތަކެތީގެ ބޭނުން އެންމެ ރަނގަޅަކަށް ނުހިފޭ،" ޝިފާ ވިދާޅުވިއެވެ.

މާލޭގައި މިހާރު ހުރި މިންވަރަށްވުރެ އިތުރަށް ވެސް ޑަސްބިން ބަހައްޓަން ސިޓީ ކައުންސިލުން ބޭނުންވެއެވެ. އެހެންނަމަ ވެސް ޑަސްބިން ބެހެއްޓުމުގެ ހުއްދަ އޮންނަނީ އެ ކައުންސިލުން ބަލަހައްޓާ ޕާކު ފަދަ ތަންތަނާއި އެތަންތަނުގެ ކުރިމަތީގައެވެ.

"އަޅުގަނޑުމެން ޑަސްބިނުގެ މިންވަރު އިތުރުކުރަން ވެސް ބޭނުން. އެެހެން ނަމަވެސް އެ މަސައްކަތް ކުރެވޭކަށް ނެތް އެހާ ފަސޭހައަކުން. މީހުން ދިރިއުޅޭ ގޭގޭގެ ދޮރު މަތީގައި ޑަސްބިން ބެެހެއްޓޭކަށް ނެތް. ޕާކުފަދަ ތަންތަނުގައި މި ބަހައްޓަން ޖެހެނީ."

ޝިފާ ވިދާޅުވީ ޑަސްބިން ބެހެއްޓުމަކީ ވެސް ހައްލެއް ނޫންކަމަށެވެ. އެ މައްސަލަ ހައްލު ކުރެވޭނީ މާލޭގައި ދިރިއުޅޭ ހުރިހާ އެންމެެން ވެސް އެކަމަށް އެއްބާރުލުން ދީގެން ކަމަށެވެ. އަދި ކުނި އަޅާތޯ ބަލަން ކޮންމެ މީހެއްގެ ފަހަތުގައި ފުލުހެއް ބެހެއްޓުމަކީ ކުރެވޭނެކަމަށް ނޫންކަމަށް ވެސް ޝިފާ ވިދާޅުވިއެވެ.

"މިކަމަށް ހޭލުންތެރިވެގެން ނޫނީ ކަންކަން ރަނގަޅެއް ނުކުރެވޭނެ ދެއްތޯ. ރާއްޖޭ މީހުން ސިންގަޕޫރަށް ޖަޕާނު ތަންތަނަށް ގޮސް މަގުމައްޗަށް ކުންޏެއް ނާޅާ. ދެން ކީއްވެތޯ މާލެ އަށް ދުރުވެފަ މަގުމައްޗަށް ކުނި އަޅުއްވަން ކެރިވަޑައިގަންނަވަނީ؟ މިކަމަކީ ހަމަ ރައްޔިތުން ހޭލުންތެރިވެގެން ނޫނީ ނުވާނެކަން،" ޝިފާ ވިދާޅުވިއެވެ.