ފަރެސް މާތޮޑާ އައިސް ޕްލާންޓްގެ ފައިދާ މަސްވެރިންނަށް ނުކުރޭ: ކައުންސިލް
4 ޖުލައި 2014 16:43
ފަރެސް މާތޮޑާ އައިސް ޕްލާންޓް: ފޮޓޯ- އަހުމަދު ޒާހިރު
ހުވަދު އަތޮޅު ދެކުނުބުރީ ފަރެސް މާތޮޑާގައި ގާއިމް ކޮށްފައިވާ އައިސް ޕްލާންޓްގެ ފައިދާ އެންމެ އެދެވޭ ގޮތުގައި މަސްވެރިންނަށް ނުލިބޭ ކަމަށް އެރަށުގެ ކައުންސިލުން ބުނެފިއެވެ.
ކައުންސިލްގެ ނާއިބު ރައީސް އަހުމަދު ޒާހިރު ވިދާޅުވީ އައިސް ޕްލާންޓުގެ ޚިދުމަތް އެދެވޭ ގޮތަކަށް ނުދެވެނީ މަރާމާތުގެ މަސައްކަތް ގިނަކަމުން ކަމަށެވެ. "އަބަދު ގޭސް ލީކުވުން ކަހަލަ މައްސަލަ ދިމާވަނީ. ދެ ހަފްތާއިން އެއްހަފްތާ ގޭސް އަޅަންޖެހޭ. މެއިންޓަނަންސް މަސައްކަތް އަބަދު ކުރަން ޖެހިފައި އޮންނަނީ،" އޭނާވިދާޅުވިއެވެ.
އަހުމަދު ވިދާޅުވީ ފަރެސް މާތޮޑާ އައިސް ޕްލާންޓް ހިންގަނީ ކުއްޑޫ ފިޝަރީޒް މޯލްޑިވްސް ލިމިޓެޑުގެ ބެލުމުގެ ދަށުން ކަަމަށެވެ. އައިސް ޕްލާންޓަށް ދިމާވާ މައްސަލަ ހައްލު ކުރުމަށްއެތަނުން މަސައްކަތް ކުރިކަމަށް ވިޔަސް އަދިވެސް ދާއިމީ ހައްލެއް ލިބިފައި ނުވާކަމަށް އޭނާ ވިދާޅުވިއެވެ.
"ޕްލާންޓް ހުންނަނީ އެހެން ބައެއްގެ ވޮރަންޓީގެ ދަށުގައި. އެހެން ކަމުން ކޫއްޑުއަށްވެސް ނޯވޭބޭނުން ގޮތެއް ހަދައިލެވޭ ކަށް،" އަހުމަދު ވިދާޅުވިއެވެ.
އޭނާ ވިދާޅުވީއެ ޕްލާންޓުން ދުވާލަކަށް 25 ޓަނު އައިސް އުފެއްދުމުގެ ގާބިލްކަން ލިބިފައިވާ ކަމަށެވެ. ނަމަވެސް އުފެއްދެނީ 10 ޓަނެވެ.
އުފައްދާ އައިސް މަސްވެރިން ގަތުމަށްފަހު ދޯންޏަށް އަރުވަން ބުރަ މަސައްކަތް ކުރަން ޖެހޭތީ އައިސް އުފުލުމުގެ އިންތިޒާމް ހަމަޖެއްސުމަށް ކޫއްޑޫން މަސައްކަތް ކުރަމުންދާކަމުގެ މައުލޫމާތު ލިބިފައިވާ ކަމަށް އަހުމަދު ވިދާޅުވިއެވެ. "މަސްވެރިން އޮޑިއަށް އައިސް އަރުވަން ޖެހެނީބޮޑެތި ހަންބުރިއަށް އަޅައިގެން ދަމައިފައި ގޮސް. އެއީ ކުޑަކަމެއް ނޫން. އެކަންހައްލު ކުރުމަށް ކޫއްޑޫއިން ކުދި ގާޑިއާތަކެއް ހަދަމުންދާ ކަމުގެ މައުލޫމާތު ވަނީ ލިބިފައި. އެދެވޭ ގޮތުގައި މަސްވެރިންނަށް، އައިސް ޕްލާންޓުގެ ޚިދުމަތް ނުލިބޭތީ މަސްވެރިންގެ ޝަކުވާވެސް ވަނީ ބޮޑުވެފައި،" އަހުމަދު ވިދާޅުވިއެވެ.
ފަރެސްމާތޮޑާގެ މަސްވެރިއަކު ބުނީ މަސްވެރިކަން ރަނގަޅު ދުވަސްވަރު އެއްދުވަހު އައިސްއަޅައިގެން ދެވަނަ ދުވަހު އަޅަން އަންނައިރު ހުންނަނީ ހުސްވެފައި ނުވަތަ ޕްލާންޓަށް ކޮންމެވެސް މައްސަލައެއް ދިމާވެފައި ކަމަށެވެ.
"އެހެން ކަމުން މަސްވެރިން އައިސް ގަންނަންދަނީ ތިނަދުއަށް. ތިނަދޫން އެއް އަގެއްގައި ފަސޭހަ ކަމާއެކު އައިސް ލިބޭ. އަދި ފަސޭހަ ކަމާއެކު ދޯންޏަށް އައިސް އެރުވުމުގެ އިންތިޒާމްވެސް ހަމަޖެހޭ. އެހެންވީމާ ފަރެސް މާތޮޑާގެ އައިސް ޕްލާންޓުން މަސްވެރިންނަށް އެދެވޭ ފައިދާއެއް ކުރާ ކަމަށް ނުބެލެވޭ،" އޭނާ ބުންޏެވެ.
ކިޔުންތެރިންގެ ހިޔާލު