ރައީސް ޔާމިން ބޭނުންފުޅުވަނީ މިނިސްޓަރުކަމުން އުމަރު ނަސީރު ވަކިކުރައްވަން: ރައީސް ނަޝީދު

ރައީސުލްޖުމްހޫރިއްޔާ އަބްދުﷲ ޔާމިން ބޭނުންފުޅު ވަނީ ހޯމް މިނިސްޓަރ އުމަރު ނަސީރު މަގާމުން ދުރުކުރައްވަން ކަމަށް އެމްޑީޕީގެ ވަގުތީ ރައީސް މުަހައްމަދު ނަޝީދު ވިދާޅުވެއްޖެއެވެ.

ރާއްޖެ ޓީވީގެ "ފަލަސުރުހީ" ޕްރޮގުރާމުގައި ވާހަކަ ދައްކަވަމުން ރައީސް ނަޝީދު ވިދާޅުވީ، ޝަރުއީ ނިޒާމަށް ސަރުކާރާއި ވިޔަފާރިވެރިންގެ ނުފޫޒު ވަރަށް ބޮޑަށް ފޯރާފައިވާކަމަށެވެ. އަދި ސަރުކާރަށްވުރެ ބޮޑަށް ޝަރުއީ ނިޒާމަށް އޮތީ ވިޔަފާރިވެރިންގެ ނުފޫޒުކަމަށް ވެސް ރައީސް ނަޝީދު ވިދާޅުވިއެވެ. އަދި އެމަނިކުފާނު ވިދާޅުވީ އުމަރު ނަސީރުގެ މައްޗަށް ކުރާ ދައުވާއާއި، އޭނާގެ މައްޗަށް ދައުވާކުރާ ގާނޫނާއި ތައާރަޒު ވާކަމަށެވެ. އެފަދަ ގޮތަކަށް އުމަރުގެ މައްޗަށް ދައުވާ ކުރަނީ ރައީސް ޔާމިންގެ "ނުފޫޒުން" ކަމަށް ދެކިލައްވާކަމަށް ރައީސް ނަޝީދު ވިދާޅުވިއެވެ.

"އުމަރު ނަސީރުގެ މައްޗަށް މި ކުރަނީ އަމުރަށް ނުކިޔަމަންތެރިވުމުގެ ކުށުގެ ތުހުމަތުގެ ދައުވާ އެކަމަކު ތުހުމަތު ކުރެވުނު ކަންތަކާ އުގޫބާތް ދިނުމަށް ދައުވާ ކުރާ ގާނޫނާ އެއް ގޮތަކަށް ވެސް ނުގުޅޭ. އެހެންވީމާ ވަރަށް ސާފުކޮށް އެބަ އިނގޭ މީގައި ބޭނުން ވެގެން މިއުޅެނީ ވެރިކަމުގެ ފަރާތުން ރައީސް އަބްދުﷲ ޔާމީން ބޭނުންފުޅުވެ ވަޑައިގަންނަވަނީކަން އުމަރު ނަސީރު އެތަނުން ދުރު ކުރުމަށް. ނުވަތައް އުމަރު ނަސީރަށް ގެއްލުމެއް ދިނުމަށް،" ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ ވަޒީރެއްގެ މައްޗަށް ޖިނާއީ ކުށެއްގެ ދައުވާކުރާއިރު، އެފަދަ ބޭފުޅަކު ވަޒީފައި ބަހައްޓާފައި ހުރުމަކީ ވެސް "އަޖައިބުވާ" ކަމަށެވެ.

ސަރުކާރުގެ ފަރާތުން ޕްރޮގްރެސިވް ޕާޓީ އޮފް މޯލްޑިވިސް (ޕީޕީއެމް) ގެ ޕާލިމެންޓަރީ ގުރޫޕުގެ ލީޑަރު އަހުމަދު ނިހާން ހުސެން މަނިކު ހުށަހަޅުއްވާފައިވާ އިގްތިސާދީ ހާއްސަ ސަރަހައްދުތަކުގެ ބިލަށް ވެސް ނަޝީދު ވަނީ މިރޭ ވެސް ފާޑު ވިދާޅުވެފައެވެ. އެމަނިކުފާނު ވިދުވީ، އިގްތިސާދީ ސަރަހައްދުތަކެއް ކަނޑައެޅިއަސް އެ ސަރަހައްދުތަކުގައި ދިރިއުޅޭ ރައްޔިތުނަނަށް އެކަމުން މަންފާއެއް ނުލިބޭނެކަމަށެވެ. އަދި އެފަދަ ސަރަހައްދުތަކެއް ސަރުކާރުން އުފެއްދުމަށް މަސައްކަތް ކުރަނީ ވަގު ވިޔަފާރިއަށް މަގުފަހި ކުރަން ކަމަށް ވެސް އެމަނިކުފާނު ތުހުމަތުކުރެއްވިއެވެ. ރޯދަ މަހުގެ ކުރިން އެމްޑީޕީން ޗާންދަނީ މަގުގައި ބޭއްވި އެއްވުމެއްގައި ވެސް ރައީސް ނަޝީދު ވަނީ އެ ބިލަށް ފާޑު ވިދާޅުވެފައެވެ.

"އެއާއެކު ކިތަންމެ ބިރުވެރިކަމެއް ވެސް އުފައްދާ. ހާއްސަކޮށް ވަގު ވިޔަފާރި ކުރުމަށް މަގުފަހިވޭ. ކަޅު ފައިސާ ދޮވުމަށް ފުރުސަތުތަކެއް ހުޅުވިގެން އެބައާދޭ،" ނަޝީދު ވިދާޅުވި އެވެ.