މީޑިއާ ކައުންސިލް އޮތީ ގާނޫނީ ހުސްކަމެއްގެ ތެރޭގައި: ހުޝާމް
2 ޖުލައި 2014 15:08
މީޑިޔާ ކައުންސިލްގެ ކުރީގެ ރައީސް ހުޝާމް މުޙައްމަދު: ފޮޓޯ ހަވީރު
މީޑިއާ ކައުންސިލްގެ އިންތިހާބު ބާއްވަންޖެހޭ ދުވަސް ފަހަނަޅައިދިޔައިރު ވެސް އިންތިހާބު ނުބޭއްވުމުން އެ ކައުންސިލް ވަނީ ގާނޫނީ ހުސްކަމެއްގެ ތެރެއަށް ވެއްޓިފައި ކަމަށް އެ ކައުންސިލްގެ ކުރީގެ ރައީސް ހުޝާމް މުހައްމަދު ވިދާޅުވެއްޖެއެވެ.
މީޑިއާ ކައުންސިލްގެ އިންތިހާބު ބާއްވަންޖެހޭ އެންމެ ފަހުގެ ތާރީހަކީ މިދިޔަ ޖޫން މަހުގެ 30 ވަނަ ދުވަހެވެ. އެހެން ނަމަވެސް އެ ދުވަަސް ފަހަނަ އަޅާއިދިޔައިރު ވެސް އިންތިހާބު ނުބޭއްވީ އެކަމުގެ ޒިންމާ ނަގަންޖެހޭނީ ސަރުކާރުންކަމަށް ވެސް އޭނާ ވިދާޅުވިއެވެ. އޭނާ ވިދާޅުވީ މީޑިއާ ކައުންސިލް ގައި މިހާރު ގާނޫނީ ގޮތުން ޒިންމާ ނަގާނެ އެއްވެސް މީހަކު ނެތްކަމަށެވެ.
"އިންތިހާބު ބޭއްވުމުގެ ބާރު މީގެ ކުރިން އޮތީ ޔޫތު މިނިސްޓްރީ އަތުގައި. މިހާރު އެ މަސައްކަތް އޮތީ ހޯމް މިނިސްޓްރީގެ އަތް މަތީގައި. މިހެންކަމުން މި މައްސަލައިގެ ޒިންމާ ނަގަން ޖެހޭނީ ސަރުކާރުން،" ހުޝާމް ވިދާޅުވިއެވެ.
ހުޝާމު ވަނީ މީޑިއާ ކައުންސިލްގެ ރައީސްކަމާއި ނައިބު ރައީސްކަން ވެސް ކުރައްވާފައެވެ. ފެބުރުއަރީ މަހުގެ ތެރޭގައި އޭނާ އިސްތިއުފާ ދެއްވާފައިވަނީ މީޑިއާ ކައުންސިލްގެ ގާނޫނު ތަންފީޒު ކުރުމުގައި ހުރަސްތަކަކާއި ދިމާވާކަމަށް ވިދާޅުވެއެެވެ.
މި ކަމާއިގުޅިގެން ހޯމް މިިނިސްޓްރީގެ ބަހެއް އަދި ނުލިބެއެވެ.
ކިޔުންތެރިންގެ ހިޔާލު