ޓްރާންސްޕޯޓުގެ ތިން ސްޓޭޓް މިނިސްޓަރަކު އެހެން މިނިސްޓްރީތަކަށް ބަދަލު ކުރައްވައިފި
ސްޓޭޓް މިނިސްޓަރަކާއި، ސީނިއާ ކޯޑިނޭޓަރަކު މަގާމުން ވަކިކުރައްވައިފި
2 ޖުލައި 2014 15:07
ސަރުކާރުގެ ގިނައޮފީސްތައް ހިންގާ ވެލާނާގެ
ކުރީގެ ޓްރާންސްޕޯޓް މިނިސްޓްރީގެ ހަތަރު ސްޓޭޓް މިނިސްޓަރުންގެ ތެރެއިން ތިން ބޭފުޅަކު އެހެން ދެ މިނިސްޓްރީއަކަށް ބަދަލު ކުރެއްވުމަށްފަހު އެއްބޭފުޅަކު މަގާމުން ވަކި ކުރައްވައިފި އެވެ.
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ގެންނެވި މި ބަދަލުތަކުގެ ތެރެއިން، އިކޮނޮމިކް މިނިސްޓްރީގެ ސްޓޭޓް މިނިސްޓަރުންނަށް ބަދަލު ކުރެއްވީ ހުޅުމާލެ 10213 އަބްދުއްލަތީފް މުހައްމަދާއި، ގ. ތަރިޖެހިގޭ، މުޙައްމަދު އަނީސް އެވެ. އެ މިނިސްޓްރީގެ ސްޓޭޓް މިނިސްޓަރު ހ. ނޫމުތި މުހައްމަދު އިބްރާހީމް ބަދަލުކުރައްވާފައި ވަނީ އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރު ކަމުގެ މަގާމަށެވެ.
މަގާމުން ވަކިކުރައްވާފައި ވަނީ ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި އިކްރާމް ހަސަން އެވެ. އޭނާގެ އިތުރުން އެމިނިސްޓްރީގެ އެގްޒެކެޓިވް ކޯޑިނޭޓަރުގެ މަގާމު އަދާކުރައްވަމުން ގެންދެވި ހ. ގާދޫ، އަހްމަދު އަޒީމް ވެސް ވަނީ މަގާމުން ވަކި ކުރައްވައިފައެވެ.
ޓްރާންސްޕޯޓް މިނިސްޓްރީއަކީ މިހާރު އުވާލައިފައިވާ މިނިސްޓްރީއެކެވެ. ނަމަވެސް އެމިނިސްޓްރީގެ އިސްމަގާމް ތަކުގައި ތިއްބެވި ފަސް ބޭފުޅުންގެ ތެރެއިން ތިން ބޭފުޅަކު އެހެން މިނިސްޓްރީތަކަށް ބަދަލު ކުރެއްވުމަށްފަހު އަނެއް ދެބޭފުޅުން ވަޒީފާއިން ވަކި ކުރެއްވި ސަބަބެއް ރައީސް އޮފީހުން ހާމައެއް ނުކުރައްވައެވެ.
ކިޔުންތެރިންގެ ހިޔާލު