ސާފުފެން އައްޑޫ ސިޓީއަށް ފޯރުކޮށް ދިނުމަށް ބާރާ މިލިއަން ރުފިޔާ ފެނަކައާ ހަވާލުކޮށްފި

އައްޑޫ ސިޓީގެ ރަށްރަށް ގުޅޭގޮތަށް އެ އަތޮޅު ހުރިހާރަށަކަށް ސާފުފެން ފޯރުކޮށްދިނުމުގެ ޕްރޮޖެކްޓްގެ މަސައްކަތަކަށް ކުރިއަށް ގެންދިއުމަށް، ފެނަކަ ކޯޕަރޭޝަނާ ބާރަ މިލިޔަން ރުފިޔާ މިހާރު ހަވާލުކޮށްފައިވާނެ ކަމަށް މިނިސްޓަރ އޮފް އެންވަޔަރަންމަންޓް އެންޑް އެނަޖީ ތާރިގް އިބްރާހިމް ވިދާޅުވެއްޖެއެވެ.

އައްޑުއަތޮޅަށްހުރި ތަރައްގީގެ މަޝްރޫޢުތަކާ ބެހޭގޮތުން، ރައްޔިތުންގެ މަޖިލީހުގެ މިއަދުގެ ޖަލްސާގައި، އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ، ނަރުދަމާ އާއި ފެނާއި، ކަރަންޓާއި އަދި ކުނި ނައްތާލުމުގެ މަޝްރޫއުތައް އައްޑޫގައި ހިންގުމަށް ހަމަޖެހިފައިވާ ކަމަށެވެ. އޭގެ ތެރޭގައި ހިމެނޭ އެއްމެ މުހިއްމު އެއް މަޝްރޫޢު ކަމުގައިވާ ފެނުގެ މަޝްރޫއަށް ފެނަކަ އާ ހަވާލުކުރި ބާރަ މިލިޔަން ރުފިޔާއަކީ އެކަމަށް ބޭނުންވާ ސާމާނު ގަތުމަށް ހަވާލުކުރި ފައިސާ ކަމަށާއި، އެތަކެތި އަންނަ އޯގަސްޓްމަހުގެ ތެރޭގައި ލިބި މަސައްކަތް ފެށޭވަރުވާނެ ކަމަށްވެސް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ، ފެނުގެ ޕްރޮޖެކްޓް މިއަހަރުގެ ތެރޭގައި ފެށި އަންނަ އަހަރު މުޅިން ނިންމާލެއްވޭނެ ކަމަށެވެ. އަދި އެ ޕްރޮޖެކްޓްގެ ސަބަބުން މުޅި އައްޑޫ ހުރިހާ ރަށެއް ގުޅޭގޮތަށް ފެނުގެ ހިދުމަތް ލިބިގެންދާނެ ކަންވެސް މިނިސްޓަރ ވިދާޅުވިއެވެ.

އައްޑޫގެ ހުރިހާ ރަށްރަށަށް ފެން ފޯރުކޮށްދިނުމުގެ ޕްރޮޖެކްޓަކީ، އެމްޑީޕީ ސަރުކާރުން ބޮޑުބައެއް ނިންމާފައިވާ ޕްރޮޖެކްޓެއްކަމަށް ވިދާޅުވެ މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރ ވިދާޅުވީ، 42 މިލިޔަން ޑޮލަރަށް އެމްޑީޕީ ސަރުކާރުން އެ ޕްރޮޖެކްޓް ހަވާލުކުރީ ބައިވޯޓާ (ބޭރުގެ ކުންފުންޏެއް) އާ ކަމަށެވެ.

އެ އެއްބަސް ވުމުގައިވާ ގޮތުން ދިވެހި ސަރުކާރުން ދައްކަން ޖެހެނީ، 15 މިލިޔަން ޑޮލަރު ކަމަށާއި، އެ ކުންފުނިން 27 މިލިޔަން ޑޮލަރު ހޯދަންޖެހޭ ކަމަށްވެސް ވިދާޅުވި އެވެ. އަދި ދިވެހި ސަރުކާރުން ދައްކަންޖެހުނު 15 މިލިޔަން ޑޮލަރު އެ ކުންފުންޏަށް ދެއްކި ނަމަވެސް ކުންފުނިން ހޯދަންޖެހޭ 27 މިލިޔަން ޑޮލަރު ނުލިބިގެން އެ ކުންފުނިން އެ ޕްރޮޖެކްޓް ހުއްޓާލާފައިވާ ކަމަށްވެސް ވިދާޅުވި އެވެ. އަދި އޭރު އެ ޕްރޮޖެކްޓް ހަމަޖެހިފައި އޮތީ، އައްޑޫގެ ހުރިހާ ރަށަކާއި ފުވައްމުލައް ހިމެނޭގޮތަށް ފެނާ ނަރުދަމާގެ ނިޒާމް ހަމަޖެއްސުމަށް ކަމަށެވެ. ނަމަވެސް އެ ކުންފުނިން މަސައްކަތް ކޮށްފައިވަނީ، ހަމައެކަނި އައްޑޫއަށް އަމާޒުކޮށްގެން ފެނުނެ ނިޒާމުގެ މަސައްކަތް ކަމަށްވެސް މިނިސްޓަރ ވިދާޅުވި އެވެ.