އައްޑު އަތޮޅުގެ ހުރިހާ ރަށަކަށް ސާފު ބޯފެން ފޯރުކޮށްދިނުމުގެ މަޝްރޫއެއް ފެނަކައާއި ހަވާލުކޮށްފި
2 ޖުލައި 2014 12:51
އައްޑޫ ލިންކު ރޯޑު: ފޮޓޯ ޕޮލިސް
އައްޑު އަތޮޅުގެ ހުރިހާ ރަށަކަށް ސާފުބޯފެން ފޯރުކޮށްދިނުމުގެ ބިޔަ މަޝްރޫޢެއް ފެނަކަ ކޯޕަރޭޝަނާއި ހަވާލުކޮށްފައިވާކަމަށް މިނިސްޓަރ އޮފް އެންވަޔަރުމަންޓު އެންޑު އެނަރޖީ ތޯރިގް އިބްރާހިމް ވިދާޅުވެއްޖެއެވެ.
ރައްޔިތުން މަޖިލީހުގައި މިއަދު ބޭއްވި ޖަލްސާގައި އައްޑޫ މީދޫޫ ދާއިރާގެ މެމްބަރު ރޮަޒެއިނާ އާދަމް ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ އައްޑުއަށް ސާފު ބޯފެން ފޯރުކޮށްދިނުމުގެ މަޝްރޫ އަންނަ އޮގަސްޓު މަހުގެ ތެރޭގައި ފެށޭނެކަމަށެވެ. އަދި އަންނަ އަހަރަށް މަސައްކަތް އެެއްކޮށް ނިންމާލެވޭ ވަރު ކުރާނެކަމަށް ވެސް އޭނާ ވިދާޅުވިއެވެ.
ފެނަަކައާއި ހަވާލުކުރުމުގެ ކުރިން އެ ޕްރޮޖެކްޓު ހަވާލުކޮށްފައިވަނީ "ބައިވޯޓާ" ކިޔާ ބޭރު ކުންފުންޏަކާއެވެ. އެ މަސައްކަތް ފެނަކައާއި ހަވާލުކޮށްފައިވަނީ ބައިވޯޓާއިން މަސައްކަތް ނުފަށާ ގިނަ ދުވަސްވުމުންނެވެ. މިނިސްޓަރ ވިދާޅުވީ އެ ޕްރޮޖެކްޓަކީ 42 މިލިޔަން ޑޮލަރަށް އެމްޑީޕީ ސަރުކާރުން ބައިވޯޓާ ކިޔާ ބޭރުގެ ކުންފުންޏަކާ ހަވާލުކޮށްފައިވާ މަޝްރޫއެއް ކަމަށެވެ. އަދި އެއްބަސް ވުމުގައިވާގޮތުން ދިވެހި ސަރުކާރުން ދައްކަން ޖެހެނީ، 15 މިލިޔަން ޑޮލަރެވެ. އެހެން ނަމަވެސް މަސައްކަތް ނުފެށި ލަސްވެފައިވަނީ އެ ކުންފުނިން ހޯދަންޖެހޭ ފައިސާ ނުލިބިގެނެވެ. ޕްރޮޖެކްޓު ފެށުމަށް އެކުންފުނިން 27 މިލިއަން ޑޮލަރު ހޯދަންޖެހެއެވެ. ޕްރޮޖެކްޓު ހަވާލުކޮށްފައިވަނީ އައްޑުއާއި ފުވައްމުލަކުގެ ހުރިހާ ރަށެއް ހިމެނޭގޮތަށް ފެނާ ނަރުދަމާގެ ނިޒާމްހަމަޖެއްސުން ކަމަށެވެ. ނަމަވެސް އެ ކުންފުނިން މަސައްކަތް ކޮށްފައިވަނީ،ހަމައެކަނި އައްޑޫއަށް އަމާޒުކޮށްގެން ފެނުނެ ނިޒާމުގެ މަސައްކަތް ކަމަށް ވެސް މިނިސްޓަރ ވިދާޅުވި އެވެ.
.ފެނުގެ މަޝްރޫގެ އިތުރުން ނަރުދަމާގެ މަޝްރޫތަކާއި ކުނިނައްތާލުމުގެ މަޝްރޫތައް އައްޑޫގައި ފެށުމަށް ރާވާފައިވާކަމަށް މިނިސްޓަރ ވަނީ ވިދާޅުވެފައެވެ
ކިޔުންތެރިންގެ ހިޔާލު