އަލީ ހަމީދުގެ މައްސަލާގައި އިމްތިޔާޒު ފަހުމީ ހުށަހެޅި ކުއްލި މައްސަލަ ތަޅުމުން ބޭރުކޮށްފި

ސުޕްރީމް ކޯޓުގެ ފަނޑިޔާރު އަލީ ހަމީދުގެ މައްޗަށް ތުހުމަތު ކުރެވޭ ބަދުއަހުލާގީ މައްސަލައާ ގުޅިގެން، އެ މައްސަލަ ބަލައި އަލީހަމީދުގެ މައްޗަށް އެ މައްސަލަ ސާބިތުނުވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) ނިންމުމާ ގުޅިގެން އެމްޑީޕީން ރައްޔިތުންގެ މަޖިލީހަށް ހުށަހެޅި ކުއްލި މައްލަ މަޖިލީހުގެ ތަޅުމުން ބޭރުކޮށްލައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް މި މައްސަލަ ހުށަހެޅުއްވީ، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އެވެ.

އިންތި ހުށަހެޅުއްވި އެ މައްސަލާގައި ބުނެފައިވަނީ ސުޕްރީމް ކޯޓުގެ ފަނޑިޔާރު އަލީ ހަމީދުގެ މައްޗަށް އެމައްސަލަ ސާބިތު ނުވާކަމަށް ޖޭއެސްސީން ނިންމި ނިންމުމަކީ މިރާއްޖޭގައި ތާއަބަދަށް ދެމިގެންދާނެ ނުބައެއް ކަމަށެވެ. އަދި އެކަމުގެ ސަބަބުން ރާއްޖޭގެ ޖުޑީޝަރީގެ އިސްލާހަށް މަސައްކަތްކުރާ މީހުންގެ އުންމީދުތައް ގެއްލިފައިވާ ކަމަށްވެސް މައްސަލައިގައި ބުނެފައި ވެއެވެ. އެގޮތުން ގާއިމްކުރެވިގެން އެދިޔަ މިންގަނޑަކީ ކަސްބީ އަންހެނުންނާއިއެކު ބަރަހަނާކޮށް ޖިންސީ ގުޅުން ހިންގިކަމުގެ ބޮޑެތި ތުހުމަތު ކުރެވިފައިވީނަމަވެސް އަދި އެކަން ދައްކުވައިދޭ ވީޑިއޯ އާއްމުވެފައިވީ ނަމަވެސް އަދި އެކަމަކީ ހަގީގަތެއްކަމަށް އެންމެހައި ރައްޔިތުން ގަބޫލުކޮށްގެން ތިބިކަމުގައި ވިޔަސް އެއީ އެއްވެސް މައްސަލައެއް ނޫންކަމުގެ މިންގަނޑުކަށާއި އެހެންކަމުން ރާއްޖޭގެ ޖުޑީޝަރީ މީގެފަހުން ބިނާވެގެންވާނީ އެމިންގަނޑުގެ މައްޗަށް ކަމަށް އެ މައްސަލައިގައި ބަޔާން ކޮށްފައި ވެއެވެ.

މި ކުއްލި މައްސަލައަށް މަޖިލީހުގެ ތަޅުމުގައި ބަހުސްކުރަން ފެނޭތޯ ބެލުމަށް ވޯޓަށް އެއްސެވުމުން ވޯޓުގައި ބައިވެރިވެ ވަޑައިގެންނެވި 62 މެމްބަރުން ގެ ތެރެއިން، އެ މައްސަލަ އަށް ބަހުސްކުރަން ފެނިވަޑައިގަންނަވާ ކަމަށް ވޯޓު ދެއްވީ 18 މެމްބަރުންނެވެ. މައްސަލައަށް ބަހުސްކުރަން ފެނިވަޑައިނުގަންނަވާ ކަމަށް 44 މެމްބަރަކު ވޯޓު ދެއްވި އެވެ.

ކުއްލި މި މައްސަލައާއެކު ފަނޑިޔާރު އަލީ ހަމީދުގެ މައްޗަށް ދައުވާކުރަން ފޮނުވާފައިވާ ކޮރަޕްޝަނުގެ މައްސަލަ ކުރިމަނަލް ކޯޓުގައި ކުރިއަށް ނުގެންދާ ކަމާއި، ބަރަހަނާ ވީޑިއޯގެ މައްސަލާގައި ފޮރެންސިކް ރިޕޯޓް އެކުލަވާލުމަށް ފުލުހުންނަށް ބޭނުންވާ ކޯޓްއަމުރު ނުދިން ކަމަށްބުނާ މައްސަލަވެސް އިންތި ފާހަގަކުރެއްވި އެވެ.