މިނިސްޓްރީ އޮފް ލޯ އެންޑް ޖެންޑަރ ގެ ނަމުގައި އައު މިނިސްޓްރީއެއް މިއަދު އުފައްދަވައިފި

ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން [މިނިސްޓްރީ އޮފް ލޯ އެންޑް ޖެންޑަރ]ގެ ނަމުގައި، ރައީސުލްޖުމްހޫރިއްޔާ، އާ މިނިސްޓްރީއެއް މިއަދު އުފައްދަވައިފިއެވެ.

ރައީސުލް ޖުމްހޫރިއްޔާގެ އޮފީހުން ބުނީ، މިމިނިސްޓްރީ އުފެއްދެވުމާ ގުޅިގެން، މި މިނިސްޓްރީގެ މަސައްކަތުގެ ދާއިރާގެ ގޮތުގައި، މިހާތަނަށް މިނިސްޓްރީ އޮފް ހެލްތު އެންޑް ޖެންޑަރ އިން ބަލަހައްޓަވަމުން ގެންދެވި ޢާއިލާއާއި، ކުޑަކުދިންނާއި، އަންހެނުންނާއި، ޚާއްޞަ އެހީއަށް ބޭނުންވާ މީހުންނާބެހޭ އެންމެހައި ކަންތައްތަކާއި، އިންސާނީ ޙައްޤުތަކާބެހޭ ސަރުކާރުގެ ސިޔާސަތު ވިލަރެސް ކުރުމާ ގުޅޭ އެންމެހައި ކަންތައްތަކާއި، ސަރުކާރުގެ ފަރާތުން ކުރަންޖެހޭ ޤާނޫނީ މަސައްކަތްތައް ބެލެހެއްޓެވުމުގެ ކަންކަން އާ މިނިސްޓްރީއަށް ބަދަލު ކުރެވޭނެ ކަމަށެވެ.

އަދި މިނިސްޓްރީ އޮފް ލޯ އެންޑް ޖެންޑަރ އުފެއްދެވުމާ ގުޅިގެން، މިހާތަނަށް ހިނގަމުންދިޔަ އެޓަރނީ ޖެނެރަލްގެ އޮފީހަކީ، އެމިނިސްޓްރީގެ ދަށުން ހިނގަމުންދާ އިދާރީ ވަކި އޮފީހެއްގެ ގޮތުގައި މިއަދުން ފެށިގެން ރައީސުލްޖުމްހޫރިއްޔާ ވަނީ ހަމަޖައްސަވާފަކަމަށް ވެސް ރައީސް އޮފީހުން ބުނެ އެވެ.

މިގެންނެވި ބަދަލާ ގުޅިގެން، ޤާނޫނުއަސާސީއާއި ޤާނޫނުތަކުން ބަންޑާރަ ނައިބުގެ އޮފީސް ނުވަތަ އެޓަރނީ ޖެނެރަލްގެ އޮފީހާ ޙަވާލުކޮށްފައިވާ އެންމެހައި މަސްއޫލިއްޔަތުތަކާއި ޒިންމާތައް، މިއަދުން ފެށިގެން އަދާކުރަމުން ގެންދާނީ، މި އުފެއްދެވި މިނިސްޓްރީ އޮފް ލޯ އެންޑް ޖެންޑަރގެ ދަށުން ހިނގަމުންދާ އެޓަރނީ ޖެނެރަލްގެ އޮފީހުންނެވެ.

މިގޮތަށް ހަމަޖެއްސެވުމާ ގުޅިގެން، މިނިސްޓްރީ އޮފް ލޯ އެންޑް ޖެންޑަރގެ ދަށުން ހިނގަމުންދާނީ، އެޓަރނީ ޖެނެރަލްގެ އޮފީސް، ޚާއްޞަ އެހީއަށް ބޭނުންވާ މީހުންގެ މަރްކަޒު، ކ. ގުރައިދޫ، ކުޑަކުދިންގެ ހިޔާ، ކ. ވިލިނގިލި، އަމާން ހިޔާ ކ. ވިލިނގިލި، ތަޢުލީމާއި މަސައްކަތް އުނގަންނައިދޭ ކުޑަކުދިންގެ މަރްކަޒު، ފެމިލީ އެންޑް ޗިލްޑްރަން ސަރވިސް ސެންޓަރުތައް ކަމަށް ރައީސުލްޖުމްހޫރިއްޔާ ހަމަޖައްސަވައިފި ކަމަށްވެސް ރައީސް އޮފީހުން ވަނީ ބުނެފައެވެ.

މީގެއިތުރުން، ޤާނޫނު ނަންބަރު 2013/3 (ގެވެށި އަނިޔާ ހުއްޓުވުމުގެ ގާނޫނު) ގެ 52 ވަނަ މާއްދާގެ ދަށުން އުފެދިފައިވާ ފެމިލީ ޕްރޮޓެކްޝަން އޮތޯރިޓީއަކީ، މިނިސްޓްރީ އޮފް ލޯ އެންޑް ޖެންޑަރގެ ދަށުން ހިނގަމުންދާ ތަނެއް ކަމުގައި ރައީސުލްޖުމްހޫރިއްޔާ ވަނީ ހަމަޖައްސަވާފައެވެ. އަދި އެ ޤާނޫނުގެ 50 ވަނަ މާއްދާގައިވާ ގޮތުގެ މަތިން، ކޯޓާ ޙަވާލު ކުރެވިގެންވާ މަސްއޫލިއްޔަތުތަކާއި، ފުލުހުންނާ ޙަވާލުކުރެވިގެންވާ މަސްއޫލިއްޔަތުތައް ފިޔަވައި، ގެވެށި އަނިޔާގެ ޢަމަލުތައް ހުއްޓުވުމާ ގުޅޭގޮތުން، އެޤާނޫނުގައި ބަޔާންކޮށްފައިވާ ކަންކަން ހިންގުމާއި، ތަންފީޒު ކުރުމުގެ އެންމެ އިސް ޒިންމާ، މިއަދުން ފެށިގެން އެޓަރނީ ޖެނެރަލާ، ރައީސުލްޖުމްހޫރިއްޔާ ޙަވާލުކުރައްވައި، ޤާނޫނުއަސާސީގެ 140 ވަނަ މާއްދާގައިވާ ގޮތުގެ މަތިން، ފެމިލީ ޕްރޮޓެކްޝަން އޮތޯރިޓީއާ މަސްއޫލުވާނެ ވަޒީރުންގެ މަޖިލީހުގެ މެންބަރެއްގެ ގޮތުގައި، އެޓަރނީ ޖެނެރަލް އަލްއުސްތާޒު މުޙައްމަދު އަނިލް، ރައީސުލްޖުމްހޫރިއްޔާ ވަނީ ހަމަޖައްސަވާފައެވެ.