މިނިސްޓަރ އޮފް އެޑިޔުކޭޝަންގެ ނައިބުގެ މަޤާމަށް ޔުމްނާ މައުމޫން ޢައްޔަނު ކުރައްވައިފި

މިނިސްޓަރ އޮފް އެޑިޔުކޭޝަންގެ ނައިބުގެ މަޤާމަށް މާފަންނު އެންދެރިމާގޭ ޔުމްނާ މައުމޫން މިއަދު ޢައްޔަނު ކުރައްވައިފިއެވެ.

ރައީސުލް ޖުމްހޫރިއްޔާ އަބުދުﷲ ޔާމީން، ޔުމްނާ މައުމޫން މި މަޤާމަށް ޢައްޔަނު ކުރެއްވީ، ޑިޕާޓްމަންޓް އޮފް ހެރިޓޭޖް ހިންގަވާ އެންމެ އިސްވެރިއެއްގެ ގޮތުގައެވެ.

ޔުމްނާއަށް އެޑިއުކޭޝަން މިނިސްޓަރ ގެ ނާއިބު ކަމުގެ މަގާމު ދެއްވާފައި މި ވަނީ، ކުރީގެ ރައީސް އަދި ވެރިކަން ހިންގާ ޕީޕީއެމްގެ ރައީސް މައުމޫނު އަބްދުލް ގައްޔޫމުގެ އާއިލީ ބޭފުޅުންނަށް، ރައީސް ޔާމީން ސަރުކާރުގެ އިސް މަގާމުތައް ދެއްވަމުން ގެންދަވާތީ އިދިކޮޅު ފަރާތްތަކުގެ ފާޑު ކިއުންތައް އިތުރުވެފައިވާ ދަނޑިވަޅެއްގަ އެވެ.

ޔުމްނާއާ އެއްމާބަނޑު ދުންޔާ މައުމޫނު ގެންދަވަނީ ރާއްޖޭގެ ޚާރިޖީ ވަޒީރު ކަމުގެ މަގާމު ފުރުއްވަމުންނެވެ. ޣައްސާން މައުމޫނަކީ ޔޫތު މިނިސްޓްރީގެ ސްޓޭޓް މިނިސްޓަރެވެ. ފާރިޝް މައުމޫނަކީ އިކޮނޮމިކް މިނިސްޓްރީގެ ސްޓޭޓް މިނިސްޓްރެވެ.