ނާޒިމް ރަޝާދު ޕީޕީއެމް އަށް ސޮއި ކުރައްވަައިފި

ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ނާޒިމް ރަޝާދު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަށް މިއަދު ސޮއި ކުރައްވައިފިއެވެ.

ނާޒިމް ޕީޕީއެމާއި ގުޅިވަޑައިގަތް ނަމަވެސް އޭނާ ތުޅާދޫ ދާއިރާއަށް ހޮވި ވަޑައިގެންފައިވަނީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީގެ) ޓިކެޓުގައިއެވެ. އޭނާ މިއަދު ޕީޕިއެމްއަށް ސޮއި ކުރެއްވީ އެޕާޓީއާ އޭނާ ގުޅޭނެ ކަމުގެ އަޑުތައް ފެތުރިފައިވާތާ ދުވަސްކޮޅެއް ފަހުންނެވެ.

މިދިޔަ އޭޕްރީލް މަހުގެ ތެރޭގައި "ރާއްޖެ ޓީވީ" އަށް ދެއްވި އިންޓަވިއު އެއްގައި ނާޒިމް ވިދާޅުވެފައިވަނީ އެމްޑީޕީ ދޫކުރައްވައި އެހެން ޕާޓީއަކަށް ބަދަލުވުމަށް ނުވިސްނަވާ ކަމަށެވެ.

އެމްޑީޕީ ޓިކެޓުގައި މަޖިލީހަށް ހޮވި ވަޑައިގެންނެވި ހޮޅުދޫ ދާއިރާގެ މެމްބަރު އަލީ މުހައްމަދު ވެސް ވަނީ މިމަހުގެ 24 ވަނަ ދުވަހު ޕީޕީއެމްއަށް ސޮއި ކުރައްވާފައެވެ.

މިލަންދޫ ދާއިރާގެ މެމްބަރު ހަސަން މުފީދު އަބްދުލްގާދިރާއި ނޮޅިވަރަމް ދާއިރާގެ މެމްބަރު ހަސަން އަރީފް ވަނީ މިމަހު 16 ވަނަ ދުވަހު ޕީޕީއެމަށް ސޮއި ކުރައްވާފައެވެ.

އެމްޑީޕީ ޓިކެޓުގައި މަޖިލީހަށް ހޮވިވަޑައިގެންފައިވާ ތިމަރަފުށީ ދާއިރާގެ މެމްބަރު މުހައްމަދު މުސްތަފާ ވެސް ވަނީ ޕީޕީއެމަށް ސޮއި ކުރައްވާފައެވެ. މިހާރު މަޖިލީހުގައި ޕީޕީއެމް ތަމްސީލުކުރާ 42 މެމެބަރުން އެބަތިއްބެވިއެވެ. އެމްޑީޕީ ތަމްސީލުކުރަނީ 23 މެމްބަރުންނެވެ.