މިސަރުކާރު ޔާމީނަށް ދީގެން ފަސްއަހަރު ވަންދެން އެމްޑީޕީން މަޑުން ނޯންނާނެ- ޝިފާޒް

25 އިންސައްތަ ތާއީދާއެކީ 5 އަހަރުދުވަހު މިސަރުކާރު ދެމިއޮންނާކަށް އެމްޑީޕީން މަޑަކުން ނުތިބޭނެ ކަމަށް ބާރަށު ދާއިރާގެ ކުރީގެ މެންބަރު އަދި އެމްޑީޕީގެ ނާއިބު ރައީސް ކަމުގެ މަޤާމަށް ކުރިމަތި ލައްވާފައިވާ މުހައްމަދު ޝިފާޒު ވިދާޅު ވެއްޖެއެވެ.

"ދުވަސް" އަށް ދެއްވި ޚާއްސަ އިންޓަވިއު އެއްގައި ޝިފާޒު ވިދާޅުވީ، އެމްޑީޕީ ސަރުކާރު އޮތްއިރު އެބޭފުޅުން (މިހާރު ސަރުކާރުގައި ތިއްބެވި ބޭފުޅުން) ވަކާލާތު ކުރަމުން ގެންދިޔަ ހުރިހާ ކަމެއް މިހާރު "އަނެއް ކޮޅަށް" ޖެހިފައިވާ ކަމަށެވެ.

"ޖީއެސްޓީ ނެގީމަައި އެންމެ ބޮޑަށް ހަޅޭއްލެވީ އެބޭފުޅުން. އާސަންދަ ގާއިމް ކުރީމަައި ހަޅޭއްލެވި. ޓްރާންސްޕޮޓޭޝަން ހުއްޓުވާލަން ހަޅޭއްލެވި. އަދި އިޖުތިމާއީ ރައްކާތެރި ކަމާ ދެކޮޅަށްވެސް ހަޅޭއްލެވި. ނަމަވެސް މިސަރުކާރުން އެކަންތައްތައް ހިންގަން ނޭނގިގެން އެދަނީ ބޮއްސުން ލަމުން. ހުސްނުވާ އާސަންދައޭ ބުނީމައި އެންމެންނަށް އެބަ އިނގޭ އެ ހުސްނުވާނެކަން. ހޮސްޕިޓަލެއްގަައި ޑޮކްޓަރުން ނެތް، ބޭހެއް ނެތް، އޮޕަރޭޝަން ކުރާނެ ވަސީލަތްތަކެއް ނެތް. ބަލިވާ މީހާ އިންޝުއަރެންސަކުން ނޫން ޚަރަދު ކުރަން މިޖެހެނީ. އަމިއްލަ ޖީބުން ޚަރަދު ކުރަން މިޖެހެނީ. އެހެންވީމަައި ކިހިނެއްތޯ އެހުސްވާނީ" ޝިފާޒު ވިދާޅުވިއެވެ.

އެމްޑީޕީ މަޑުން ނޯންނަންޖެހޭ އެއް ސަބަބެއްގެ ގޮތުގައި ޝިފާޒު ވިދާޅުވީ، މިހާރަކަށް އައިސް މާތްވެގެންވާ އިސްލާމް ދީނަށް ފުރައްސާރަ ކުރަމުން އަންނަ މީހުން ގިނަވަމުން އަންނާތީ ކަމަށެވެ. އޭނާ ވިދާޅުވީ ދީނުގެ ވާހަކަ ކުރިން ދައްކަމުންދިޔަ އެއްވެސް ބަޔަކު މިހާރު އެވާހަކަ ނުދައްކާ ކަމަށެވެ. އެކަމަށް އަޅާވެސް ނުލާ ކަމަށެވެ.

އޭނާ ވިދާޅުވީ، ރާއްޖޭގައި މިހާރު ކުށުގެ ބޮޑެތި ޖަރީމާތައް ހިންގަމުން އަންނަ ކަމަށެވެ. އެގޮތުން މިހާރަކަށް އައިސް ޑްރަގުގެ ބޮޑެތި މައްސަލަތައް ދިމާވާއިރު އެއިން އެއްވެސް މީހަކަށް ޙުކުމް ކުރެވިގެންދާތަން ފެނިގެން ނުދާކަމަށެވެ.

"ހީކުރާ ވަރަށްވުރެ މާބާރަށް މިރާއްޖޭގައި މާތްވެގެންވާ އިސްލާމްދީނަށް ފުރައްސާރަ އެކި ނަންނަމުގަައި މިއަންނަނީ ކުރަމުން. އެކަންކަމަކާ ދީން އަތަށްލައިގެންދުވި އެއްވެސް ބަޔަކު އަޅައެއްނުލި. މިރާއްޖޭގަައި މިއަންނަނީ "އޯގަނައިޒް ކްރައިމް" ތަކެއް ހިންގަމުން. އެއްވެސް މީހަކަށް ޙުކުމް ކުރެވޭ ތަނެއް ނުފެނޭ. ހިފައި ހައްޔަރެއް ނުކުރެވޭ. މިއީ އަޅުގަނޑުމެން މަޑުން ތިބެން ނުޖެހޭ ސަބަބުތަކަކީ" ޝިފާޒު ވިދާޅުވިއެވެ.

އޭނާ ވިދާޅުވީ، ސަރުކާރުގައި މިހާރު ތިއްބެވި ބޭފުޅުން އެމްޑީޕީ ސަރުކާރަށް ފާޑުކިޔަމުން ދިޔައީ ވަރަށް ބޮޑަށް ރައްޔިތުންނަށް އޮޅުވާލަން ކަމަށެވެ. ނުޙައްގު ގޮތުގަައި ވޯޓުތަކެއް ހޯދައިގެން ސަރުކާރުން ތިބޭއިރު، އެކަން ކުރި ސަބަބު މިއަދު ރައްޔިތުންނަށް ހާމަކޮށްދޭން ޖެހޭ ކަމަށްވެސް އޭނާ ވިދާޅުވިއެވެ.

އޭނާ ވިދާޅުވީ އެމްޑީޕީ ނިކުތީ ހެޔޮބަލަކަށް ކަަމަށެވެ. ރައްޔިތުންނަށް ފަހިގޮތްތަކެއް ހޯދައިދޭން ކަމަށެވެ. ރައްޔިތުންނަށް ގެއްލިފައިވާ ހައްގުތަކެއް ހޯދައިދޭން ކަމަށެވެ. އެކަން ކާމިޔާބު ނުކޮށް އެމްޑީޕީން ހުއްޓައި ނުލާނެ ކަމަށްވެސް އޭނާ ވިދާޅުވިއެވެ.

ޝިފާޒުގެ މިވާހަކަތަކާ ގުޅިގެން ޕީޕީއެމްގެ ނިލަންދޫ ދާއިރާގެ މެންބަރު ޢަބްދުﷲ ޚަލީލް ވިދާޅުވީ އެވާހަކަތަކަކީ އެމްޑީޕީއަށް ނުކުރެވުނު ކަންތައްތަކެއް މިސަރުކާރުން ކުރައްވަމުން ގެންދަވާތީ އެޕާޓީގެ ސަޕޯޓަރުން ހިތްރުއްސަން ދައްކަވަމުން ގެންދަވާ ވާހަކަތަކެއް ކަމަށެވެ. "އެމްޑީޕީއަކީ ވެރިކަމުގައި އޮވެގެން މަގުމައްޗަށް ނިކުމެ ރައްޔިތުންނަށް ދަތިކުރި ޕާޓީއެއް. އެބޭފުޅުންގެ ކަމަކީ "ބަހުން މެޓާހިލުން" މިބާވާތުގެ ވާހަކަ ދައްކައިގެންނޫނީ އެޕާޓީއަށް ތާއީދު ކުރާ މީހުން ހިތްހަމަ ޖެއްސޭކަށްނެތް،" ޚަލީލް ވިދާޅުވިއެވެ.

އޭނާ ވިދާޅުވީ އެމްޑީޕީގެ ވެރިކަމުގައި 21 ދުވަސް ތެރޭގައި ވަނީ ގާސިމް އިބްރާހީމް ވެސް "ދުރުކޮށްފައި" ކަމަށެވެ. ނަމަވެސް ކޯލިޝަން އެއްބަސްވުން އުވާލި ކަމަށް ބުނަމުން ދިޔަނަމަސް މިހާރުވެސް ގާސިމް މަސައްކަތް ކުރަނީ ސަރުކާރާ ވަރަށް ގާތުން ކަމަށް އޭނާ ވިދާޅުވިއެވެ. ކޯލިޝަން އެއްބަސްވުން ނުރޫޅޭ ކަމަށް ގާސިމް ވަނީ ވިދާޅުވެފައެވެ. އަދި ސަރުކާރާ ގުޅިގެން ގާސިމް މަސައްކަތް ކުރައްވާނެ ކަމަށް އުންމީދު ކުރައްވާ ކަމަށް ރައީސް ޔާމީން ވަނީ ވިދާޅުވެފައެވެ. "މި ދެބޭފުޅުންގެ ވާހަކަތަކުން އެބަ ދޭހަވޭ ރަނގަޅު ގުޅުމެއް އެބައޮތްކަން. އެމްޑީޕީއަށްވެސް އެނގޭ އެކަން. އެހެންވެ އެޕާޓީން ބޭނުންވަނީ ގާސިމް އެބޭފުޅުންނާ ދިމާއަށް ގެންދަން. އެކަމަކު ގާސިމަކީ ރައްޔިތުންނާ މެދު އެއްވުރެ ބޮޑަށް ވިސްނަވާ ބޭފުޅެއް. ގައުމަށް ހެޔޮއެދި ވަޑައިގަންނަވާ ބޭފުޅެއް،" ޚަލީލް ވިދާޅިވިއެވެ.

ޚަލީލް ވިދާޅުވީ ސޯޝަލް ސެކިޔުރިޓީގެ ވާހަކަ އެމްޑީޕީން ދައްކަވާއިރު އެޕާޓީގެ ވެރިކަމުގައި އެންމެ ކުޑަމިނުން ޚިދުމަތްދޭ އިމާރާތެއް މަރާމާތު ކުރުމުގެ ބަދަލުގައި ކުލަވެސް ލައިފައިނުވާ ކަމަށެވެ. އަދި ހޮސްޕިޓަލެއްގެ މެޝިނެއް ހަލާކުވެގެން އެވެސް ހަދައިފައިނުވާ ކަމަށެވެ. އެމްޑީޕީގެ ތިންް އަހަރުގެ ވެރިކަން ނިމުނުއިރު ސިއްހީ ދާއިރާވަނީ "ވަޅުގަނޑަކަށް ވައްޓާލައިފައި" މިސަރުކާރުން މަސައްކަތް ކުރަމުންދަނީ އެވަޅުގަނޑުން އަރައިގަންނަން،" ޚަލީލް ވިދާޅުވިއެވެ.