ޝެލްބަން ކޮލެޖުގައި ކިޔެވުމުގެ ފުރުސަތު ދިވެހިންނަށް އެވިޑުން ހޯދައިދީފި

އަޔަލޭންޑުގެ ޝެލްބަން ކޮލެޖާއި، ރާއްޖޭގެ އެވިޑްކޮލެޖު ގުޅިގެން އަޔަލޭންޑުގައި ކިޔެވުމުގެ ފުރުސަތު ދިވެހި ކުދިންނަށް ހުޅުވަލައިފިއެވެ.

އެވިޑް ކޮލެޖުގެ ރަޖިސްޓްރާ އަހުމަދު އާސިމް ވިދާޅުވީ މިއީ ދެކޮލެޖުގެ މެދުގައި ވެފައިވާ އެއްބަސް ވުމެއްގެ ދަށުން ހުޅުވާލެފައިވާ ފުރުސަތުތަކެއް ކަމަށެވެ. އެއްބަސްވުމުގެ ދަށުން ޝެލްބަން ކޮލެޖުގެ ބައެއްކޯސްތައް އެވިޑުގައިވެސް ހިންގާނެއެވެ.

މިއެއްބަސްވުމުގެ ދަށުން ޝެލްބަންއިންވަނީ ދިވެހި ކުދިންނަށް ޚާއްސަ ސްކޮލަރ ޝިޕްތަކެއް ހުޅުވައިފައެވެ. ސްކޮލަޝިޕްގެ ފުރުސަތު ހުޅުވާފައިވަނީ ދެބަޔަކަށް ބަހައިގެން ކަމަށްވެސް އޭނާ ވިދާޅުވިއެވެ. އެއީ ފުލްސްކޮލަރ ޝިޕާއި، ޕާޝަލް ސްކޮލަރޝިޕެވެ.

ފުލް ސްކޮލަރޝިޕް ލިބޭނީ އޭލެވެލްގެ އެއްމާއްދާއިން އޭ ގްރޭޑު ލިބުމަށްފަހު އިތުރު ދެ މާއްދާއިން ދަށް  ވެގެން ބީ ފާސް ހޯދައިފައިވާ ދަރިވަރުންނަށެވެ. ޕާޝަލް ސްކޮލަރޝިޕް ތަކުގައި ބައިވެރިވުމުގެ ފުރުސަތު ހުޅުވަލާފައިވަނީ އޭލަވެލްގެ ތިންމާއްދާއަކުން "ބީ" ގްރޭޑަށްވުރެ މަތިން ހޯދާފައިވާ ކުދިންނަށް ކަމަށްވެސް އަހުމަދު ވިދާޅުވިއެވެ.

ފުލް ސްކޮލަރ ޝިޕް ލިބޭ ކުދިންނަށް ހުރުމާއިކިޔެވުމުގެ ހަރަދު ޝެލްބަން ކޮލެޖުން ހަމަޖައްސައިދޭނެއެވެ. ޕާޝަލް ސްކޮލަރ ޝިޕްލިބޭ ކުދިންގެ ކިޔެވުމަށް ހިނގާ ހަރަދުގެ ދެބައިކުޅަ އެއްބައި އެ ކޮލެޖުން ހަމަޖައްސަައިދޭނެ ކަމަށްވެސް އަހުމަދު ވިދާޅުވިއެވެ.

މި ސްކޮލަރޝިޕްގެ ދަށުން އަޔަލޭންޑަށް ކިޔަވަންދާ ދަރިވަރުންނަށް ހަފްތާއަކު 20 ގަޑިއިރު ވަޒީފާ އަދާކޮށްގެން އާމްދަނީ ހޯދުމުގެ ފުރުސަތުވެސް ލިބޭނެ ކަމަށް އަހުމަދު ވިދާޅުވިއެވެ. ހަފްތާއަކު 20 ގަޑިއިރު މަސައްކަތް ކުރުމުން މަހަކު 800 ޔޫރޯ ލިބޭނެއެވެ. އެވަރުގެ އާމްދަނީއަކުން ކިޔެވުމުގެ ހަރަދާއިި ހުރުމަށް ހަރަދުކޮށްފައި ބާކީވެސް ކުރެވޭނެ ކަމަށް މި ވަގުތުއެވިޑުގައި މަސައްކަތް ކުރަމުންދާ ޝެލްބަން ކޮލެޖުގެ މާކެޓިންގް މެނޭޖަރ އަބޫބަކުރު ޔޫސުފް ވިދާޅުވިއެވެ.

ޝެލަބަން ކޮލެޖުން ހިންގާ އިނގިރޭސިވިލާތުގެ މަޝްހޫރު އެގްޒެމިނިންގް ބޯޑުތަކުގެ ޕްރޮފެޝަނަލް ކޯސްތައް އެވިޑްކޮލެޖުގައި ހިންގުމަށް ވެސް ވަނީ ހަމަޖެހިފައެވެ. މީގެ ސަބަބުން އަޔަލަންޑަށްދެވޭނެ ފުރުސަތު ނެތް ދަރިވަރުންނަށް ހަމަ އެއް ކޯސްތަކެއް ހެދުމުގެ ފުރުސަތު ރާއްޖޭގަައި ތިބެގެން ލިބޭނެއެވެ.  އޭގެ ތެރޭގައި ބްރިޓިޝް ކޮމްޕިއުޓަރ ސޮސައިޓީ (ބީސީއެސް) ގެ އިންފޮމޭޝަން ޓެކްނޮލޮޖީގެ ކޯސްތަކާއި އަދި ކޮންފެޑަރޭޝަން އޮފް ޓުއަރިޒަމް އެންޑް ހޮސްޕިޓަލިޓީގެ (ސީ.ޓީ.އެޗް) ގެ ހޮސްޕިޓަލިޓީ މެނޭޖްމަންޓް ކޯސްތަކާއި، ދަ މެނޭޖްމަންޓް އެވޯޑިންގް އޯގަނައިޒޭޝަން (އޭ.ޓީ.އެޗް.އީ) ގެ މޭނޭޖުމަންޓް ދާއިރާގެ ކޯސްތަކާއި، އިންގްލިޝްސްޕީކިންގް ބޯޑު (އީ.އެސް.ބީ) ގެ އިނގިރޭސި ބަހުގެ ކޯސްތައް ވެސް ހިމެނެއެވެ.

މި ކޯސްތަކީ އިނގިރޭސިވިލާތުގެ ކަމާބެހޭ ފަރާތްތަކުން ބަލައިގެންފައިވާ ކޯސްތަކެކެވެ. އެވިޑުން މިހާރު ގެންދަވަނީ ރާއްޖޭގެ ސަނަދު ތަކުގެ އޮނިގަނޑަށް މި ކޯސްތައް ފެއްތުމުގެ މަސައްކަތްތައް ކުރަމުންނެވެ. މިމަސައްކަތްތައް ނިމުމުން އެކި ބޯޑުތަކުގެ ކޯސްތައް ރާއްޖޭގެ އޮނިގަޑުގެ ޑިޕްލޮމާ،އެޑްވާންސްޑް ޑިޕްލޮމާ، ޑިގްރީ އަދި މާސްޓަރސް ފެންވަރަށް ފެތިގެން ދާނެކަމަށް އާސިމް ވިދާޅުވިއެވެ. އަދި ބޭނުން ދަރިވަރުންނަށް ޑިގްރީ ނިންމުމަށްޓަކައި ފަހުއަހަރު ޝެލްބަން ކޮލެޖުގައި ކިޔެވުމުގެ ފުރުސަތުވެސް އޮބައޮތް ކަމަށް އޭނާވިދާޅުވިއެވެ.

ދިވެހި ދަރިވަރުން އަޔަލޭންޑަށް ދިއުމަށް ވިސާނަގާކަށް ނުޖެހެއެވެ. އަދި އެ ގައުމުގައި ކިޔަވާ ކުދިންނަށް 2.5 މިލިޔަން ޔޫރޯގެމެޑިކަލް އިންޝުއަރަންސްވަނީ ކަށަވަރު ކޮށްދީފައެވެ. މިއިންޝުއަރެންސަށް އަހަރަކު ޚަރަދު ކުރަންޖެހެނީ  90 ޔޫރޯ އެވެ.