އިސްލާމު ދީނާއިމެދު ޒުވާނުންގެ ހޭލުންތެރިކަން އިތުރުކުރުން މުހިންމު: ނާއިބު ރައީސް

އިސްލާމް ދީނާއިމެދު ޒުވާނުންގެ ހޭލުންތެރިކަން އިތުރުކުރުމަށް މަސައްކަތްކޮށް ދިނުމަށް ނާއިބު ރައީސް ޑރ. މުހައްމަދު ޖަމީލް އަހުދު އެދިލައްވައިފިއެވެ.

ނާއިބު ރައީސް މިހެން ވިދާޅުވީ ފުރުޤާން މިސްކިތް ހުޅުވުމަށް މިއަދު ބޭއްވި ރަސްމިއްޔާތުގައި އެ މިސްކިތް ހުޅުވައިދެއްވުމަށް ފަހު ވާހަކަފުޅު ދައްކަވަމުންނެވެ.  މިސްކިތް ހުޅުވައި ދެއްވުމަށްފަހު އެމަނިކުފާނު ވިދާޅުވީ، ރާއްޖޭގެ ޒުވާނުންނަށް އިސްލާމް ދީނުގެ ފުރިހަމަ ކަމާއި އެ ދީނުގެ ލުއިފަސޭހަކަން އަންގައިދިނުމަކީ ވަރަށް މުހިންމު ކަމެއްކަމަށެވެ. ދީނުގެ ލުއިފަސޭހަކަން ޒުވާނުންނަށް ވިސްނޭނެ ފަދަ ގޮތަކަށް ފަތުވާ ދެއްވުމަށް ޑރ. ޖަމީލް ވަނީ ދީނީ އިލްމުވެރިންގެ ގާތުގައި އެދިލައްވައިފައެވެ.

"އަޅުގަނޑު ވަރަށް އާދޭހާއެކު މި ދަންނަވަނީ ރާއްޖޭގައި މިއޮތް ސައްތައިން ސައްތަ އިސްލާމީ ޝަހުސިއްޔަތު ދަމަަހައްޓައިދިނުމަށް. މި ދުވަސްވަރަކީ ދީނީ ގޮންޖެހުންތަކެއް ދިމާވެފައިވާ ދުވަސްވަރެއް. މިހެންކަމުން އިސް އަހައްމިއްޔަތެއް ދެއްވައިގެން ދީނީ ހޭލުންތެރިކަން އިތުރުކުރުމަށް އަޅުގަނޑު ގޮވާލަން،" ޑރ. ޖަމީލް ވިދާޅުވިއެވެ.

އެމަނިކުފާނު ވަނީ މިސްތުގެ ބޭނުން އޭގެ އެންމެ ފުރިހަމަ ގޮތުގައި ހިފުމަށް އެދިލައްވައިފައެވެ. އަދި އެތަނަކީ ދީނީ ބައިބައިވުން އުފެދޭނެފަދަ ތަނަކަކަށް ނުހެއްދެވުމަށް ވެސް އެދިލެއްވިއެވެ.

ފުރުޤާން މިސްކިތް ހުޅުވުމަށް ބޭސްވި ރަސްމިއްޔާތުގައި އިސްލާމިކް މިނިސްޓަރ. މުހައްމަދު ޝަހީމް އަލީ ސައީދު ވެސް ބައިވެރިވެ ވަޑައިގެންނެވިއެވެ. އެ މަނިކުފާނު ވިދާޅުވީ އެ މިސްކިތަކީ ސަރުކާރުން މިހާތަނަށް އެންމެ ބޮޑު ހަރަދެއްކޮށްގެން އިމާރާތްކުރި މިސްކިތް ކަމަށެވެ.

"މިއީ ގަލޮޅު ރައްޔިތުން ވަރަށް ގިނަ ދުވަސްތަކެއް ވަންދެން ކުރި ދިގު އިންތިޒާރެއްގެ ނިމުން،" ޝަހީމް ވިދާޅުވިއެވެ.