ސިރީލަންކާގެ ރައީސް ރާޖަޕަކްސާ ފުރާވަޑައިގެންފި

ރަސްމީ ދަތުރުފުޅެއްގައި ބުދަ ދުވަހު ރާއްޖެ ވަޑައިގެންނެވި ސިރީ ލަންކާގެ ރައީސް މަހިންދަ ރާޖަޕަކްސާ މިއަދު ހެނދުނު ފުރާވަޑައިގެންފިއެވެ.

ރާއްޖެއަށް ފަހު އެމަނިކުފާނު ދެން ވަޑައިގަންނަވާނީ ސީޝެލްސް އަށެވެ. ސީޝެލްސްގައި އެމަނިކުފާނު ތިން ދުވަހު މަޑުކުރައްވާނެއެވެ. އެ ގައުމަށް ވެސް ވަޑައިގެންފައިވަނީ ރަސްމީ ދަތުރުފުޅެއްގައެވެ.

ރާޖަޕަކްސައާއި އެމަނިކުފާނުގެ އަނބިކަނބަލުން ޝިރާންތީ ރާޖަޕަކްސަގެ ޝަރަފުގައި، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔާއި އެމަނިކުފާނުގެ އަނބިކަނބަލުން، ފާތިމަތު އިބްރާހީމް ފުރަމާނަ ޖާފަތެއް ބޭއްވެވިއެވެ. އެ ޖަފާތުގައި ދިވެހި ދައުލަތުގެ އިސްވެރިން ބައިވެރިވެ ވަޑައިގެންނެވިއެވެ. އަދި ރާއްޖެއާއި ސިރީ ލަންކާއާއި ދެމެދު ގުޅުން ބަދަހިކުރެވޭނެ ގޮތްތަކާމެދު މަޝްވަރާކުރެއްވިއެވެ.

ރައީސުލްޖުމްހޫރިއްޔާގެ އަނބިކަނބަލުން  ސްރީލަންކާ ‏‏ރައީސްގެ އަނބިކަނބަލުން ނާއި ބުދަ ދުވަހު މުލިއާގޭގައި ބައްދަލުކުރެއްވިއެވެ. މިބައްދަލުކުރެއްވުމުގައި، އިޖުތިމާޢީ ދާއިރާއިން ‏‏ދެބޭފުޅުން ކުރައްވަމުން ގެންދަވާ މަސައްކަތްޕުޅުތަކުގެ މައްޗަށް ބައްލަވާލެއްވިއެވެ.

ރާޖަޕަކްސާގެ މި ދަތުރުފުޅުގައި ރާއްޖެއާއި ސިރީލަންކާއާއި ދެމެދު ގުޅުން ބަދަހިކުރުމުގެ ގޮތުން ތިން އެއްބަސްވުމެއްގައި ސޮއިކޮށްފައިވެއެވެ. އެއީ ޞިއްޙީ ދާއިރާއިން ގުޅުން ބަދަހިކުރުމާބެހޭ އެއްބަސްވުމަކާއި، ސްރީލަންކާގެ އިންވެސްޓްމަންޓް ބޯޑާއި، ރާއްޖޭގެ އިކޮނޮމިކް މިނިސްޓްރީއާ ދެމެދު ގުޅުން ބަދަހިކުރުމާބެހޭ އެއްބަސްވުމަކާއި، ހާލުގައި ޖެހޭ މީހުން ހޯދުމާއި، ސަލާމަތްކުރުމާ ބެހޭ އެއްބަސްވުމެކެވެ.