ޖީއެމްއާރު ބޭރުކޮށްލި މީހުން ރައްޔިތުންގެ ކިބައިން މައާފަށް އެދެންޖެހޭނެ: ޝިފާޒު
26 ޖޫން 2014 22:15
މުހައްމަދު ޝިފާޒު "ދުވަސް" އަށް މައުލޫމާތު ދެއްވަނީ
އިބްރާހީމް ނާސިރު އިންޓަރނޭޝަނަލް އެއާޕޯޓް ކުރިން ހިންގަމުންދިޔަ އިންޑިއާގެ ޖީއެމްއާރު ކުންފުނި ރާއްޖެއިން ފޮނުވާލުމުގައި ބައިވެރިވި އެންމެން އެކަމުގެ ޒިންމާ އުފުލަން ޖެހޭނެ ކަމަށް ބާރަށު ދާއިރާގެ ކުރީގެ މެންބަރު އަދި އެމްޑީޕީގެ ނާއިބު ރައީސަކަށް ވާދަކުރަމުންދާ މުހައްމަދު ޝިފާޒު ވިދާޅުވެއްޖެއެވެ.
އެކަމުގެ ޒިންމާ ނެގުމަކީ އެކަމަށް އެއްބަސްވެ ރައްޔިތުންގެ ކިބައިން މާފަށް އެދުން ކަމަށްވެސް އޭނާ ވިދާޅުވިއެވެ. ޝިފާޒު ވިދާޅުވީ ޖީއެމްއާރުގެ ބޭރުކޮށްލި މައްސަލާގައި ދައުލަތުގެ އޭރު ބަންޑާރަ ނާއިބު އާޒިމާ ޝަކޫރާއި، އޭރުގެ ރައީސް ޑރ. މުހައްމަދު ވަހީދާއި، ކުރީގެ ރައީސް މައުމޫން އަބްދުލް ގައްޔޫމް ޚާއްސަ ގޮތެއްގައި ޒިންމާ ނަންގަވަން ޖެހޭނެ ކަމަށެވެ.
"ޒިންމާ ނަގަން ޖެހުމަކީ، އެކަން އަނބުރާ އިޔާދަ ކޮށްދިނުމެއްނޫން. އަދި އެކަމެއް އެމީހުން އަތުން ހޯދުމެއްވެސް ނޫން. އަދި އެކަމެއް އެގޮތަކަށް ނުުވެސް ވާނެ. އެފަރާތްތަކުން ޖެހޭނެ ރައްޔިތުން ކިބައިން މައާފަށް އެދެން. އެއީ ޒިންމާދާރު ގޮތަކީ" ޝިފާޒު ވިދާޅުވިއެވެ.
އޭނާ ވިދާޅުވީ ޖީއެމްއާރުގެ މައްސަލާގައި ބަދަލެއްގެ ގޮތުގައި އެމީހުން ހުށަހަޅައިފައިވާ ފައިސާއަކީ ދައުލަތަށް ދެއްކޭނެ އެއްޗެއް ނޫންކަމަށެވެ. އެ މައްސަލާގައި ބަދަލުގެ ގޮތުގައި ދޭންޖެހޭ ފައިސާގެ އިތުރަށް އާބިޓްރޭޝަނަށް ޖީއެމްއާރުން ހޭދަކޮށްފައިވާ ފައިސާގެ ގޮތުގައި 4 މިލިއަން ޑޮލަރު ވަނީ ސަރުކާރުން ޖީއެމްއާރަށް ދޭންޖެހިފައެވެ.
ޝިފާޒު ވިދާޅުވީ ޖީއެމްއާރަށް ފައިސާ ދެއްކުމުގެ ގާބިލްކަން ސަރުކާރުގައި އެބަހުރި ކަމަށް ޓޫރިޒަމް މިނިސްޓަރ ވިދާޅުވިޔަސް އެވަރު ދައުލަތުގައި ނުހުންނާނެ ކަމަށެވެ. އެވަރު ހުރިކަމަށް ޓޫރިޒަމް މިނިސްޓަރ ވިދާޅުވާނަމަ އެއީ އޭސީސީން ބަލަން ޖެހޭނެ ކަމެއް ކަމަށްވެސް އޭނާ ވިދާޅުވިއެވެ.
ކިޔުންތެރިންގެ ހިޔާލު