ތަރާވީސް ނަމާދު ކުރުމަށް ގދ.ގެ ހަ ރަށަކަށް ދިހަ ހާފިޒުން ހަމަޖައްސައިފި

އަންނަ ރޯދަމަހު ހިފުޒުކޮށް ތަރާވީސް ނަމާދު ކުރުމަށް ހުވަދުއަތޮޅު ދެކުނުބުރީ 6 ރަށަކަށް 10 ހާފިޒުން މާދަމާ ދާނެ ކަމަށް ހާފިޒުން ގެނައުމުގެ ކަންކަން އިންތިޒާމުކުރި ފަރާތުން ހާމަކޮށްފިއެވެ.

ހާފިޒުން ގެނައުމުގެ ކަންކަން އިންތިޒާމްކުރި އަތޮޅު ކައުންސިލްގެ މެންބަރު މުހައްމަދު ރިޒާން ވިދާޅުވީ ހާފިޒުން ގެނައީ ލަންކާއާއި އިންޑިއާއިން ކަމަށެވެ.

ހާފިޒުން ގެނައި ރަށްރަށަކީ ހޯޑެއްދޫ، ނަޑައްލާ، ވާދޫ، މިއިން ކޮންމެ ރަށަކަށް ހާފިޒެކެވެ. ފަރެސް މާތޮޑާ އަދި ތިނަދޫ މިއިން ކޮންމެ ރަށަކަށް 2 ހާފިޒުންނެވެ. ގައްދު 3 ހާފިޒުންންނެވެ. ރިޒާން ވިދާޅުވީ މިއެންމެންވެސް ދެންމެ ކާޑެއްދޫ އެއާޕޯޓަށް ގޮސްފައިވާ ކަމަށެވެ. އެމީހުން ރަށްރަށަށް ގެންގޮސްދޭނީ އަތޮޅު ކައުންސިލުގެ ލޯންޗުގައި ކަމަށް އޭނާ ވިދާޅުވިއެވެ. އެމީހުން މިރަށްރަށަށް ގެންދާނީ މާދަމާއެވެ.

އޭނާ ވިދާޅުވީ މިއީ ރަށްރަށުގެ ކައުންސިލާއި އަމިއްލަ ފަރާތްތައް ގުޅިގެން އަތޮޅު ކައުންސިލްގެ އެހީއާއެކު ގެނައި ހާފިޒުންނެވެ. އަތޮޅު ކައުންސިލުން ކޮށްދޭ ކަމަކީ "ކާޑެއްދޫއިން ރަށްރަށަށް އަދި ރޯދަމަސް ނިމުމުން ރަށްރަށުން ކާޑެއްދުއަށް ގެންގޮސް ދިނުން" ރިޒާން ވިދާޅުވިއެވެ.

އޭނާ ވިދާޅުވީ ގައްދުއާއި ވާދުއަށް ހާފިޒުން ހަމަޖައްސާފައިވަނީ އަމިއްލަ ފަރާތްތަކުން ކަމަށެވެ. އެހެން މީހުން ގެނެސްފައިވަނީ އެރަށެއްގެ ރަށުކައުންސިލުންނެވެ.

އޭނާ ވިދާޅުވީ އިންޑިއާއާއި، ލަންކާއިން ހާފިޒުން ގެނައީ ފެންވަރު ވެސް ރަނގަޅުވެފައި އަގުހެޔޮ ވުމުންނެވެ.

"އިންޑިއާ ހާފިޒެއްގެ ޚަރަދަށް ނަގައިފައިވަނީ ސާދަހާސް ފަންސަވީސް ރުފިޔާ. ލަންކާގެ ހާފިޒަކަށް ނަގާފައިވަނީ ތޭރަހާސް ރުފިޔާ. އެއީ ވަރަށް ކުޑައަގެއް. އަތޮޅުގެ ބައެއް އެހެން ރަށްރަށަށް ހާފިޒުން ބައެއް ޖަމާއަތްތަކުން ގެނެސްދެނީ ފަންސަވީސް ހާސް ރުފިޔާއަށްވުރެ ބޮޑު އެއްޗެއް ނަގައިގެން ކަމަށްވަނީ. އެހެން ވީމާ އަޅުގަނޑު މިނަގަނީ ވަރަށް ކުޑައަގެއް" ރިޒާން ވިދާޅުވިއެވެ.

މިދެގައުމުގެ ހާފިޒުންނަށް ކުރަން ޖެހޭ ޚަރަދު ތަފާތުވެފައިވަނީ ދަތުރު ފަތުރުގެ އަގު ތަފާތުވެފައިވާ ނިސްބަތުން ކަމަށްވެސް ރިޒާން ވިދާޅުވިއެވެ.

މިއީ ރިޒާން މެދުވެރިވެގެން މިޚިދުމަތް ދެމުން ގެންދާ 4 ވަނަ އަހަރެވެ.