އުދަ އަރައިފާނެ ކަމަށް ސަމާލުވެ ތިބުމަށް މެޓު އޮފީހުން އިލްތިމާސް ކޮށްފި
ތިމަރަފުށީ އެއާޕޯޓްގެ ރަންވޭއަށް އުދައަރައިފި
25 ޖޫން 2014 17:45
ތިމަރަފުށީ އެއާޕޯޓުގެ ރަންވޭއަށް އުދައާއެކު އަރައިފައިވާ ވެއްޔާއި ކުނިބުނި: ފޮޓޯ އަހުމަދު ރިޔާޒް
ކުރިއަށްއޮތް ދެދުވަހު ދެކުނާއި މެދު ރާއްޖެތެރޭގެ ރަށްރަށަށް އުދަ އަރައިފާނެ ކަމަށް ލަފާ ކުރެވޭތީ އެކަމަށް ސަމާލުވެ ތިބުމަށް މޯލްޑިވްސް މިޓިއޮރޮލޮޖިކަލް ސާވިސް (މެޓު) އިން އިލްތިމާސް ކޮށްފިއެވެ.
އެ ސާވިސުން ބުނީ ކުރިއަށް އޮތް ދެ ދުވަހުވެސް މެދުރާއްޖެ ތެރެއާއި ދެކުނުގެ ރަށްރަށަށް އުދައެރުމަކީ އެކަށީގެންވާ ކަމެއް ކަމަށެވެ. އެހެން ނަމަވެސް އުދަ އަރާނީ ކޮން ރަށްރަށަކަށް ކަމެއް ބުނަން ނޭނގޭ ކަމަށް މެޓުން މައުލޫމާތު ދެއްވިއެވެ. މެދު ރާއްޖެތެރެއާއި ދެކުނުގެ ކޮންމެ ރަށަކަށް ވެސް އުދައެރުމަކީ އެކަށީގެންވާ ކަމެއް ކަމަށްވެސް އެ އިދާރާއިން މައުލޫމާތު ދެއްވިއެވެ.
"އަޅުގަނޑު މެންނަށް ދަންނަވަން ނޭނގޭ މިވެނި ރަށަކަށް އުދައަރާނޭ. މެދު ރާއްޖެތެރެއާއި ދެކުނު ހުރިހާ ރަށްރަށެއްގެ ރައްޔިތުން ވެސް ސަމާލުވެ ތިއްބެވުން މުހިންމު،" މެޓުން ދުވަސްނޫހަށް މައުލޫމާތު ދެއްވި އިސްބޭފުޅަކު ވިދާޅުވިއެވެ.
މޯލްޑިވްސް ނެޝަނަލް ޑިފެންސްފޯސް (އެމްއެންޑީއެފް) ގެ ތަރުޖަމާނު ވިދާޅުވީ ރާއްޖޭގެ ބައެއް ރަށްރަށަށް އުދައަރަމުން އަންނަ ކަމުގެ މައުލޫމާތު ލިބިފައިވާ ކަމަށެވެ. އެހެން ނަމަވެސް އަދި މިހާތަނަށް އެއްވެސް ރަށަކުން އުދައެރުމުގެ ސަބަބުން ސިފައިންގެ އެހީތެރިކަމަށް އެދިގެން "ރިޕޯޓް ކުރެވިފައިވާ ކަމަށް މައުލޫމާތު ނުލިބޭ" ކަމަށް އޭނާ ވިދާޅުވިއެވެ.
މިއަދުވެސް ރާއްޖޭގެ ބައެއް ރަށްރަށަށް ވަނީ އުދައަރައިފައެވެ. އެގޮތުން ހުވަދު އަތޮޅު ދެކުނުބުރީ ފަރެސް މާތޮޑާއަށާއި، ކޮޅުމަޑުލު ތިމަރަފުށީ އެއާޕޯޓުގެ ރަންވޭއަށް ވެސް އުދައަ އަރައިފައިވެއެވެ. ތިމަރަފުށީ އެއާޕޯޓުގެ ރަންވޭއަށް އުދައެރުމުގެ ސަބަބުން ރަންވޭ ވަށައިގެން ޖަހައިފައިވާ "ފެންސް" ގެ ބައެއް ވަނީ ހަލާކުވެފައި ކަމަށް އެއާޕޯޓުގައި މަސައްކަތް ކުރާ މީހަކު ބުންނެވެ.
ތިމަރަފުށީ އެއާޕޯޓަށް އުދައަރައިފައިވަނީ މިއަދަށް ޝެޑިއުލް ކޮށްފައިވާ ބޯޓުގެ ދަތުރަށްފަހު ކަމަށް އެރަށުން ވާހަކަ ދެއްކި މީހަކު ބުންޏެވެ. އޭނާ ބުނީ ރަންވޭއަށް އުދަ އަރައި މުޅި ރަންވޭގައި ވަނީ ކުނިފެތުރިފައެވެ. ރާޅާއެކު ރަންވޭއަށް އަރައިފައިވާ ކުންޏާއި، ވެލި ސާފު ކުރުމުގެ މަސައްކަތް މިހާރުވެސް ކުރަމުންދާ ކަމަށް އެރަށުން މައުލޫމާތު ލިބިފައިވެއެވެ. ފައިވެއެވެ. ރަންވޭގެ 200 ވަރަކަށް ފޫޓަށްވަނީ އުދައަރައިފައެވެ.
އެއާޕޯޓް ރަންވޭ ސާފުކުރުމުގެ މަސައްކަތުގައި ހަރަކާތްތެރިވަނީ އެއާޕޯޓުގެ މުވައްޒަފުންނާއި، އެމްޓީސީސީއާއި، ޕޮލިހުންނާއި، އެމްއެންޑީއެފް ގުޅިގެން ކަމަށް މައުލޫމާތު ލިބިފައިވެއެވެ. ސާފު ކުރުމުގެ މަސައްކަތްނިމި މިރޭ ފަތިހު ބޯޓުފަހަރު ޖެއްސޭ ވަރުވާނެ ކަމަށްވެސް އެމަސައްކަތުގައި ހަރަކާތްތެރިވާ މީހަކު ބުންޏެވެ.
މެޓުން ބުނީ ހުޅަނގު މޫސުމުގެ ވިއްސާރައިގައި ރާއްޖޭގެ އެކި ސަރަހައްދު ތަކަށް ކޮންމެ އަހަރަކު ވެސް އުދަ އަރަމުން އަންނަކަމަށެވެ.
ކިޔުންތެރިންގެ ހިޔާލު