ރޯދަ މަސް ފެށުމުގެ ކުރިން ހުޅުމާލޭ ފެރީގެ ނިޒާމުގެ މައްސަލަ ހައްލުވާނެެ: ރައީސް ޔާމިން
25 ޖޫން 2014 17:17
ރައީސުލް ޖުމްހޫރިއްޔާ އަބްދުﷲ ޔާމިން ހުޅުމާލޭ ރައްޔިތުން ދެއްވި މާހެފުމެއް ޝަރަދުވެރިކޮށްދެއްވުމަށްފަހު ވާހަކަ ދައްކަވަނީ: ފޮޓޯ ރައީސް އޮފީސް
ހުޅުމާލެއާއި މާލެއާ ދެމެދު ދަތުރުފަތުރު ކުރުމުގައިހުރި ދަތިކަން ރޯދަމަސް ފެށުމުގެ ކުރިން ހައްލުވާނެކަމަށް ރައީސުލްޖުމްހޫރިއްޔާ އަބްދުﷲ ޔާމިން ވިދާޅުވެއްޖެއެވެ.
ރައީސް އޮފީހުގެ ވެބްސައިޓުގައި ބުނެފައިވަނީ ފެރީގެ ނިޒާމުގެ ކަންކަން ރޯދައިގެ ކުރިން ހައްލުވެގެން ދާނެ ކަމަށެވެ. އެމަނިކުފާނު މިހެން ވިދާޅުވީ ހުޅުމާލޭ ރައްޔިތުންގެ ފަރާތުން ހުޅުމާލޭ ޣާޒީ ސްކޫލްގައި ރޭ ބޭއްވި މާހެފުމުގައި ވާހަކަފުޅު ދައްކަވަމުންނެވެ. ރައީސް ޔާމިން ވިދާޅުވީ ފެރީގެ މައްސަލަ ހައްލު ވެގެން ދާއިރު 10 މިނިޓަށްވުރެ ގިނައިރު ފެރީ ޓާމިނަލްގައި މަޑުކުރަން ނުޖެހޭނެ ކަމަށެވެ.
ހުޅުމާލޭގައި ދިރިއުޅޭ މީހުންނަށް ދިމާވެފައިވާ އެންމެ ބޮޑު ދަތިކަމަކީ މާލެއާއި އެ ރަށާއި ދެމެދު ދަތުރު ކުރުން ކަމަށްވެސް ރައީސް ވިދާޅުވިއެވެ. އަދި އެމައްސަލަ ހައްލުކުރުމަށް އެމްޓީސީސީ އާއި އެމަނިކުފާނު އަމިއްލަފުށަށް މަޝްވަރާކުރައްވާފައި ވާކަމަށް ވެސް ވިދާޅުވިއެވެ. އަދި ރޯދަ މަސް ފެށުމުގެ ކުރިން ފެރީތައް އިތުރުކޮށް ހުޅުމާލެއަށް ދަތުރުކުރާފެރީގެ ހިދުމަތްތައް އަވަސްވެގެން ދާނެކަމުގެ ޔަގީންކަން އެމްޓީސީސީން އަރުވާފައިވާކަމަށްވެސް ރައީސް ވިދާޅުވިއެވެ.
ސަރުކާރުން ދެކޭގޮތުގައި ހުޅުމާލެ އަކީ އުންމީދީ ރަށެއް ކަމަށް ޔާމިން ވިދާޅުވިއެވެ. އަދި ޒުވާނުންގެ ސިޓީ ހުޅުމާލޭގައި ހައްދަވާނެ ކަމުގެޔަގީންކަން ވެސް އެމަނިކުފާނު ދެއްވިއެވެ.
ކިޔުންތެރިންގެ ހިޔާލު