ކޮމިޓީތަކަށް މެންބަރުން އައްޔަން ކުރުމުގެ މައްސަލަ ހައްލު ކޮށްފި

ރައްޔިތުންގެ މަޖިލީހުގެ ދާއިމީކޮމިޓީތަކަށް މެންބަރުން އައްޔަން ކުރުމުގައި، ސިޔާސީ ޕާޓީތަކަށް ޖާގަހަމަޖެއްސުމާ ބެހޭގޮތުން، މެންބަރުންގެ މެދުގައި އުފެދުނު ހިޔާލު ތަފާތުވުންތައް މިއަދު ހައްލު ވެ އެކަމުގައި އެއްބަސް ވުމަކަށް އަތުވެއްޖެ އެވެ.

ކޮމިޓީން މިއަދު އެއްބަސް ވެފައިވާ ގޮތަށް ބަލާއިރު، މީގެ ކުރިން ކޮމިޓީތަކަށް، ޕާޓީތަކުންދޭ ޖާގައިގެ އަދަދަށް ވަނީ ބަދަލުތަކެއް ގެނެސްފައެވެ.

ކޮމިޓީން ނިންމި ނިންމުމަށް ބަލާއިރު، މަޖިލީހުގައި ހިމެނޭ ތޭރަ ކޮމިޓީގެ ތެރެއިން، މަޖިލީހުގައިއެންމެ ގިނަ މެންބަރުން (41 މެންބަރުން) ހިމެނޭ ވެރިކަންކުރާ ޕީޕީއެމަށް ކޮމިޓީތަކުން 64 ޖާގަ ކަނޑައަޅާފައި ވެއެވެ. ދެވަނައަށް އެންމެ ގިނަ މެންބަރުން، (24 މެންބަރުން) ހިމެނޭ އިދިކޮޅު އެމްޑީޕީއަށް ކޮމިޓީތަކުން 37 ޖާގަ ލިބޭގޮތަށް ވަނީ ހަމަޖައްސައިފަ އެވެ. އަދި ތިންވަނައަށް އެންމެ ގިނަ މެންބަރުން މަޖިލީހުގައި ތަމްސީލްކުރާ ޖުމްހޫރީ ޕާޓީއަށް ކޮމިޓީތަކުން 20 ޖާގަ ދިނުމަށް ހަމަޖެހިފައި ވެއެވެ.މަޖިލީހުގައި ފަސް މެންބަރުން ތިއްބެވި އެމްޑީއޭ އަށް ކޮމިޓީތަކުން 8 ޖާގަ ލިބޭގޮތަށް ވަނީ ނިންމައިފަ އެވެ. އަދި މަޖިލީހުގެ އެންމެ ގޮނޑިއެއް ނިސްބަތްވާ އަދާލަތު ޕާޓީއަށް ކޮމިޓީތަކުން ދެ ޖާގަ ކަނޑައަޅައިފައި ވެއެވެ. މަޖިލީހުގައި ހުންނެވި ހަމައެކި މިނިވަން މެންބަރަށް ކަނޑައަޅާފައިވަނީ އެންމެ ކޮމިޓީއެކެވެ.

ކޮމިޓީގެ މިއަދުގެ ނިންމުމުގައި، މާލިއްޔަތު ކޮމިޓީގެ މެންބަރުންގެ އަދަދު 13 އަށް އިތުރު ކުރުމަށްވެސް ވަނީ ފާސްކޮށްފައެވެ.

އަދިސަލާމަތީ ޚިދުމަތްތަކާބެހޭ ކޮމިޓީ (241) ކޮމިޓީގައި ތިއްބަވާނެ މެންބަރުންގެ އަދަދުވެސް ވަނީ ފާސްކޮށްފައެވެ.

މަޖިލީހުގެ ދާއިމީ ކޮމިޓީތަކުގައި ޕާޓީތަކުން މެންބަރުން ހިމެނޭނެ އުސޫލް ކޮމިޓީންފާސްކޮށްފައި މިވަނީ އެކަމާމެދު މަޖިލިސް މެންބަރުންގެ މެދުގައި ބޮޑެތި ހިޔާލު ތަފާތުވުންތަކެއް އުފެދި މަޖިލީހުގެ ޖަލްސާތައް ކުރިއަށް ނުގެންދެވި ދުވަސްތަކެއް ފާއިތުވުމުންނެވެ. މަޖިލީހުގެ އިއްޔެގެ ޖަލްސާ އާއި މިއަދުގެ ޖަލްސާވެސް ކުރިއަށް ނުގެންދެވުނީ އެ މައްސަލައިގެ ސަބަބުންނެވެ.