ގައުމީ ކުތުބުޚާނާ އިން ޚިދުމަތްދޭ ވަގުތު އިތުރު ކުރަން ނިންމަފައި

ހަ ރޯދައަށްފަހު ގައުމީ ކުތުބުޚާނާ ހުޅުވާފައި ހުންނަވަގުތު އިތުރު ކުރުމަށް ނިންމާފައި ވާކަމަށް ޗީފް ލައިބްރޭރިއަން ހައްވާ ނާސިހާ ވިދާޅުވެއްޖެއެވެ.

"ރޭޑިއޯ އެފްއެމް" އަށް ދެއްވި އިންޓަވިއު އެއްގައި ނާސިހާ ވިދާޅުވީ ލައިބްރަރީގެވަގުތު އިތުރު ކުރުމަށް ނިންމާފައިވަނީ ހެނދުނު 9:00 އިން ހަވީރު 6:00 އަށް ކަމަށެވެ.

ވަގުތު އިތުރު ކުރަން ނިންމެވީ ކުތުބުޚާނާއިން ޚިދުމަތް ހޯދާ ގިނަ މީހުން އެކަމަށް އެދެމުންދާތީ ކަމަށް އޭނާ ވިދާޅުވިއެވެ. ވަގުތުއިތުރު ކުރުމަށް ނިންމެވީ ޚިދުމަތް ހޯދާ މީހުންގެ މެދުގައި ޚިޔާލު ހޯދުމުގެ ސާވޭއެއް ކުރެއްވުމަށް ފަހުގައެވެ. އޭނާ ވިދާޅުވީ ކުތުބުޚާނާ ހުޅުވާފައި ބަހައްޓާ ގަޑިއިތުރު ކުރުމަށް ގިނަ މީހުން ބޭނުންވާ ކަމަށް އެ ސާވޭއިން ދައްކައިފައިވާ ކަމަށެވެ.

ކުތުބުޚާނާގެ ވަގުތު އިތުރު ކުރަން ފަށާނީ އޮގަސްޓްމަހު 4 ވަނަ ދުވަހުން ފެށިގެން ކަމަށްވެސް އޭނާ ވިދާޅުވިއެވެ. ކުތުބުޚާނާގެ ވަގުތުއިތުރު ކުރި ނަމަވެސް ނެޝަނަލް ކަލެކްޝަންސް ހުޅުުވާ ގަޑި އަށް ބަދަލެއް ނާންނާނެ ކަމަށްވެސް ވިދާޅުވިއެވެ. ސަބަބަކީ ގިނަފޮތްތަކެއް ހުރުމުގެ ސަބަބުން ކުޑަ ވަގުތު ކޮޅެއްގެ ތެރޭގަައި ތަރުތީބު ކުރަން އުނދަގޫވާނެތީ ކަމަށް އޭނާ ވިދާޅުވިއެވެ. އެހެން ކަމުން އެތަން އާންމުންނަށް ހުޅުވާފައިބަހައްޓާނީ ހެނދުނު 9:30 އިން ހަވީރު 5:30 އަށް ކަމަށް އޭނާ ވިދާޅުވިއެވެ. ކުތުބުޚާނާ މިހާރު ހުޅުވައި ހުންނަނީ ހެނދުނު 10 އިން ހަވީރު 5 އަށެވެ.

ގައުމީ ކުތުބުޚާނާގެ ދަށުން ހިންގާ މަލްޓި މީޑިއާލައިބްރަރީ ހުޅުވާ ގަޑިއަށް އެއްވެސް ބަދަލެއް ނާންނާނެ ކަމަށް ނާސިހާވިދާޅުވިއެވެ.