ސްކޫލްތައް ބަންދު ކޮށްފި ނަމަ ސިލަބަސް ކަވަރު ކުރެވޭނެ އެއްވެސް ފޯމިޔުލާއެއް ނުފެނުނު: ޓީއޭ

ރޯދަމަސް އެއްކޮށް ސްކޫލްތަކުގެ ކިޔެވުން ބަންދުކޮށްފި ނަމަ އަހަރުގެ ބާކީއޮތް ދުވަސްތަކުގައި، ގްރޭޑް 8 އާއި 9 ގެދަރިވަރުންގެ ސިލަބަސް ކަވަރު ކުރެވޭނެ އެއްވެސް ފޯމިޔުލާއެއް ނުފެނުނުކަމަށް ޓީޗާސް އެސޯސިއޭޝަން (ޓީއޭ) އިން ހާމަ ކޮށްފިއެވެ.

ޓީއޭގެ ރައީސް އާތިފް އަބްދުލް ހަކީމް ވިދާޅުވީމިކަމާ ބެހޭ ގޮތުން ރޭވެސް ޓީއޭގެ ބައްދަލުވުމެއް ބޭއްވި ކަމަށެވެ. އެބައްދަލުވުމުގައި އެކިގޮތްތަށް މަޝްވަރާކޮށްގެން ހިސާބު ޖަހައިގެން ބެލިއިރު ވެސް އެއް މަސް ބަންދު ކޮށްގެން އެކަން ކުރެވޭނެ އުސޫލެއް ނުފެނުނު ކަމަށެވެ.

"ހުރިހާ ބަންދު ދުވަހެއް ގައި ކިޔަވައިދީގެން ވެސް އަށެއް ނުވައެއްގެ ކުދިންގެ ސިލަބަސް ކަވަރު ކުރެވޭނެ ފޯމިޔުލާއެއް ނުފެނުނު. ނަމަވެސް ހުރިހާ ފިލާވަޅެއް އެއްފަހަރާ "އަޅައިފިނަމަ" ސިލަބަސް ކަވަރު ވެދާނެ. އެކަމަކު އެއިން ކުދިންނަށް ކުރާނެ އެއްވެސް ފައިދާއެއް ނޯންނާނެ،" އާތިފް ވިދާޅުވިއެވެ.

އޭނާ ވިދާޅުވީ ކުދިންނަށް ކިޔަވައި ދެމުންގެންދަނީ ކެމްބްރިޖުގެ ސިލަބަހަށް ކަމަށްވީ ހިނދު އެމީހުންގެ އިމްތިހާންތައްބާއްވާ ގަޑިއަށް އެމީހުން ބާއްވާނެ ކަމަށެވެ. ނަަމަވެސް އޭރު ގްރޭޑް 8 އަދި 9 ގެދަރިވަރުންގެ ސިލަބަސް ކަވަރު ވެފައި ނުވުމުން ވަރަށް ބޮޑެތި މައްސަލަތައް ނިކުންނާނެ ކަމަށެވެ. އޭގެ ސަބަބުން ކުދިންނަށް ވަރަށް ބޮޑު ނޭދެވޭ އަސަރެއްކުރާނެ ކަމަށްވެސް އޭނާ ވިދާޅުވިއެވެ. "ގްރޭޑް ދިހައެއްގެ ކުދިންގެ ކިޔެވުންބަންދެއް ނުކުރެއެއް ނޫންތޯ. އެއީ އަހަރުގެ ފުރަތަމަ 4 މަހުގެ ކުރިން ދިހައެއްގެ ސިލަބަސްކަވަރު ކުރެވޭނެ. އެމީހުންގެ ދެން އޮންނާނީ ރިވިޝަން. ނަމަވެސް މިކަމުގެ ގެއްލުންލިބޭނީ އަށެއް އަދި ނުވައެއްގެ ކުދިންނަށް،" އޭނާ ވިދާޅުވިއެވެ.

އާތިފް ވިދާޅުވީ އެޑިޔުކޭޝަނުގައި ޕްލޭނިން ސެކްޝަނެއް އޮންނައިރު ކުރިން މިކަންކަން ޕްލޭން ކުރެވެންވާނެ ކަމަށެވެ. ނަމަވެސް ކުއްލިއަކަށް މިފަދަ ގޮތަކަށް ކަންކަން ކުރުމުން ސުވާލު އުފެދޭ ކަމަށެވެ. އޭނާ ވިދާޅުވީ ޓީޗަރުން ކިޔަވައިދެމުން ގެންދަނީ އެޑިޔުކޭޝަނުގެ ޕްލޭނާ އެއްގޮތަށް ސްކީމެއް ހަދައިގެން ކަމަށެވެ. ނަަމަ ވެސް ކުއްލިއަކަށް މިފަދަ ބަދަލެއް ގެނައުމުން މައްސަލަތައް ދިމާވާނެ ކަމަށެވެ.

އޭނާ ވިދާޅުވީ ރޯދަމަސް އެއްކޮށް ބަންދު ކުރަން ނިންމުމުން އެކަމުގެ ޝަކުވާ ވަރަށް ބޮޑަށް ޓީއޭއަށް ލިބެމުން އަންނަ ކަމަށެވެ. އަދި އެކަމާ ހިތްހަމަ ނުޖެހޭ ޓީޗަރުން ވެސް ވަރަށް ގިނަ ކަމަށް ވިދާޅުވިއެވެ.

އޭނާ ވިދާޅުވީ ރޯދަމަހު ކިޔެވުން ބަންދުކުރާ ގޮތަށް އެޑިޔުކޭޝަނުން ނިންމެވީ ޕްރިންސިޕަލުންނާ ވެސް އެކަށީގެންވާ ގޮތަށް މަޝްވަރާނުކޮށް ކަމަށް މައުލުމާތު ލިބިފައިވާ ކަމަށެވެ. އެޑިޔުކޭޝަނުން މަޝްވަރާ ކުރެއްވި ޕްރިންސިޕަލުން ވެސް އެއްބަސްވީ ރޯދަމަހުގެ ފަހުދިހަ އެކަނި ބަންދު ކުރަން ކަމަށް މައުލުމާތު ލިބިފައިވާ ކަމަށްވެސް ވިދާޅުވިއެވެ. "ޕްރިންސިޕަލުންނަށް ވަރަށްރަނގަޅަށް އެނގޭނެ އެއްމަސް ބަންދު ކުރުމުން ދިމާވާނެ މައްސަލަ. އެހެންވީމާއެގޮތަށް ޕްރިންސިޕަލުން އެއްބަސްވާނެ ކަމަށް ގަބޫލެއް ނުކުރެވޭ،" އޭނާވިދާޅުވިއެވެ.

އެޑިޔުކޭޝަން މިނިސްޓްރީން ބުނެފައިވަނީ ރޯދަމަހު ކިޔެވުން ބަންދުކުރަނީ ބެލެނިވެރިންނާއި ޓީޗަރުންނާ ވެސް ބައްދަލު ކުރައްވައިއެމީހުންގެވެސް އެދުމުގެ މަތިން ކަމަށެވެ. ނަމަވެސް އާތިފް ވިދާޅުވީއެޑިޔުކޭޝަނުން އެހެން ބުނެފައިވާތީ ވަރަށްގިނަ ޓީޗަރުންނާއި ޕްރިންސިޕަލުންޓީއޭގައި ޝަކުވާ ކުރަމުންދާ ކަމަށެވެ. "މިއީ (ޓީއޭ) އެތައް ސަތޭކަ ޓީޗަރުންހިމެނޭ ޖަމިއްޔާއެއް. އެޑިޔުކޭޝަނުން މަޝްވަރާ ކުރި ޓީޗަރަކާ އަދި ދިމައެއްނުވޭ.އެ ވިދާޅުވީ މަޝްވަރާތަކަށް މި އެސޯސިއޭޝަނަށް ދައުވަތެއްވެސް ނުލިބޭ،" އޭނާވިދާޅުވިއެވެ.

އާތިފް ވިދާޅުވީ ބަންދު ކުރާކަމަށްވާނަމަރޯދަމަހުގެ ފަހު ދިހަ ދުވަސް ބަންދު ކުރުމަކީ މައްސަލައެއް ނޫން ކަމަށެވެ. އޭރުންއެދުވަސްތައް ބަންދު ދުވަސްތަކުގައި ނަގައި ހަމަކުރެވިދާނެ ކަމަށެވެ. އޭނާވިދާޅުވީ ރޯދަމަހަކީ އަޅުކަމުގެ މަސް ކަމަށް ބުނެ ބަންދު ކުރާ ކަމަށްވާނަމައަޅުކަމަށްވެސް ޚާއްސަ ޕްރްގްރާމްތައް ރޭވިފައި ހުންނަން ޖެހޭނެ ކަމަށެވެ. އެހެންނޫނަސް އިލްމު އުނގެނުމަކި ވެސް އަޅުކަމުގެ ތެރޭގައި ހިމެނޭ ކަމެއް ކަމަށް "އިލްމުވެރިން ވިދާޅުވާތީ އިވޭ" ކަމަށް އާތިފް ވިދާޅުވިއެވެ.

އާތިފް ވިދާޅުވީ ރޯދަމަސް އެއްކޮށް ބަންދު ކުރާތީ އެކަމާ ބެހޭގޮތުން މަޝްވަރާ ކުރުމަށް ޓީއޭ އިން ރޭ ބޭއްވި މަޝްވަރާތަކުގައި ކަންބޮޑުވާ ބައިވަރު ކަންކަން ފާހަގަ ކޮށްފައިވާ ކަމަށެވެ. "އެކަންބޮޑުވުންތަކާއެކު މިއަދު އަޅުގަނޑުމެން އެޑިޔުކޭޝަން މިނިސްޓަރަށް ސިޓީއެއް ފޮނުވާނަން. ރަަމަޟާން މަހުގައި ކިޔެވުން ބަންދު ކުރުމުން ސިލަބަސް ކަވަރު ނުކުރެވޭނެތީ މިނިސްޓްރީގެ ނިންމެވުން ބަދަލުކޮށް ރޯދަމަހުގައި ވެސް ކިޔަވައިދޭ ގޮތަށް ހައްދަވައި ދެއްވުމަށް އެދި ދަންނަވާނަން،" އާތިފް ވިދާޅުވިއެވެ. އޭނާވިދާޅުވީ ރޯދަމަހު ސްކޫލްތަކުގެ ކިޔެވުން ބަންދު ކޮށްފިނަމަ ފޫނުބެއްދޭ ވަރުގެބޮޑު ގެއްލުމެއް ގްރޭޑް 8 އަދި 9 ގެ ކުދިންނަށް ލިބޭނެ ކަމަށެވެ.