އެމްޑީޕީގެ ނާއިބު ރައީސް ކަމަށް ދެބޭޅުން، އެހެން ކޮންމެ މަގާމަކަށް ބޭފުޅަކު ކުރިމަތި ލައްވައިފި
24 ޖޫން 2014 15:24
އެމްޑީޕީގެ އެންމެ އިސް މަގާމުތަކަށް ކުރިމަތި ލެއްވުމަށް ހުޅުވާ ލައްވާފައިވާ މުއްދަތު މިއަދަށް ހަމަވެއްޖެއެވެ. މުއްދަތު ހަމަވިއިރު 4 މަގާމަކަށް 5 ބޭފުޅުން ވަނީ ކުރިމަތި ލައްވާފައެވެ.
އެމްޑީޕީގެ އިންތިޚާބު ތަކާބެހޭ ކޮމިޓީގެ އިސްބޭފުޅަކު ވިދާޅުވީ ރައީސް ކަމަށް ކުރިމަތި ލައްވާފައިވަނީ ރާއްޖޭގެ ކުރީގެ ރައީސް އަދި އެމްޑީޕީގެ ވަގުތީ ރައީސަކަށް މިހާރު ހުންނެވި މުޙައްމަދު ނަޝީދެވެ. ނާއިބު ރައީސް ކަމަށް ކުރިމަތި ލައްވާފައިވަނީ ފޭދޫދާއިރާގެ ކުރީގެ މެންބަރު އަދި އެމްޑީޕީގެ ކުރީގެ ނާއިބު ލީޑަރު، އަލްހާން ފަހްމީއާއި، ބާރަށު ދާއިރާގެ ކުރީގެ މެންބަރު މުހައްމަދު ޝިފާޒެވެ.
ޕާޓީގެ ޗެއާޕަސަނަކަށް ކުރިމަތި ލައްވާފައިވަނީ ތޮއްޑޫ ދާއިރާގެ ކުރީގެ މެންބަރު ޢަލީ ވަހީދެވެ. ޗެއާޕާސަންގެ ނާއިބަކަށް ކުރިމަތި ލައްވާފައިވަނީ އުތުރު ޕްރޮވިންގެ ރައީސް އަލީނިޔާޒު އެވެ.
އެމްޑީޕީގެ ޗެއާޕާސަން ކަމުގެ މަގާމު ހުސްވެފައިވަނީ މީގެ ކުރިން އެ މަގާމުގައި ހުންނެވި، މިހާރު ރައްޔިތުންގެ މަޖިލީހުގެ ނާއިބުރައީސް ރީކޯ މޫސާ މަނިކު އިސްތިއުފާ ދެއްވުމުންނެވެ.
އެމްޑީޕީގެ އެތެރޭގެ އިންތިހާބު ބޭއްވުމަށް ހަމަޖެހިފައިވަނީ މި އަހަރުގެ އޯގަސްޓް މަހުގެ ނަވާވީސްވަނަ ދުވަހުގަ އެވެ.
މަގާމުތަކަށް ކުރިމަތި ލައްވާފައި ތިއްބެވި ބޭފުޅުންގެ ތެރެއިން ޝަރުތު ފުރިހަމަވާ ބޭފުޅުންގެ ނަންތައް އިންތިހާބުގެ ކުރިން، އިއުލާން ކުރާގޮތަށް ވަނީ ހަމަޖެހިފަ އެވެ.
ކިޔުންތެރިންގެ ހިޔާލު