ރައްޔިތުން މަޖިލީހުގެ ޖަލްސާއެއް މާދަމާ ބާއްވަން ނިންމައިފި

ކޮމިޓީ ތަކުގެ މެޖޯރިޓީ ހޯދުމުގެ މައްސަލައިގައި ޕާޓީތަކުގެ ޒުވާބު ހޫނުވެފައި ވަނިކޮށް، ރައްޔިތުންގެ މަޖިލީހުގެ ޖަލްސާއެއް މާދަމާ ބާއްވަން ނިންމައިފި އެވެ.

ރައްޔިތުންގެ މަޖިލީހުގެ އިދާރާއިން ބުނީ، ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ހަތަރުވަނަ ޖަލްސާ މާދަމާ އޮންނާނެ ކަމަށެވެ.

އެޖަލްސާއަށް ފުރަތަމަ ކަމަކަށް އެޖެންޑާ ކޮށްފައިވަނީ، ރައްޔިތުންގެ މަޖިލީހުގެ އައްޑޫ މީދޫދާއިރާގެ މެންބަރު ރޮޒެއިނާ އާދަން މިނިސްޓަރ އޮފް ހައުސިންގ އެންޑް އިންފްރާންސްޓްރަކްޗަރޑރ.މުހައްމަދު މުއިއްޒުއާ ސުވާލު ކުރެއްވުމެވެ. ރިޒެއިނާ ހައުސިން މިނިސްޓަރާ ސުވާލު ކުރައްވާނީ މިއަހަރު އައްޑޫގައި ހިންގުމަށް ހަމަޖެހިފައިވާ ތަރައްގީގެ މަޝްރޫއު ތަކާބެހޭ ގޮތުންނެވެ.

މީގެ އިތުރުން އަށް ބިލެއްގެ ބަހުސްގެ މަރުހަލާ ފެށުމަށްވެސް މާދަމާގެ ޖަލްސާއަށް ވަނީ އެޖެންޑާ ކޮށްފަ އެވެ.

މާދަމާ  14 ބިލެއްގެ ބަހުސްގެ މަރުހަލާ ފެށުމަށްވަނީ ހަމަޖައްސާފަ އެވެ. އޭގެތެރެޭގައި ސަރުކާރުގެ ފަރާތުން ވިލިމާލެ ދާއިރާގެ މެންބަރު އަޙްމަދު ނިހާން ޙުސަންމަނިކު ހުށަހަޅުއްވާފައިވާ، ސްޕެޝަލް އިކޮނޮމިކް ޒޯންގެ ބިލު ފާހަގަކޮށްލެވެއެވެ.

 ރައްޔިތުންގެ އާ މަޖިލީހަށް ރައީސް އަކާއި ނާއިބު ރައީސެއް އިންތިހާބު ކުރުމަށްފަހު މަޖިލީހުގެ ކޮމިޓީތަކަށް މެންބަރުން އިންތިހާބު ކުރުމަށް ކުރިއަށް ގެންދިޔަ މަސައްކަތުގައި ސިޔާސީ ޕާޓީތަކާއި މެންބަރުންގެ ހިޔާލު ތަފާތުވުންބޮޑުވެގެން މިހާތަނަށް އިތުރު ޖަލްސާއެއް ވަނީ ކުރިއަށް ގެންދެވޭވަރު ނުވެފައެވެ.

އެންމެފަހުން، މިމަހު ސަތާރައިގައި ބޭއްވި ރައްޔިތުންގެ މަޖިލީހގެ ޖަލްސާވެސް ކުރިއަށް ނުގެންދެވިގެން ނިންމާލީ، ކޮމިޓީތަކުގެ މައްސަލައިގައި މެންބަރުންގެ މެދުގައި ހިޔާލު ތަފާތުވުން އުފެދި މަޖިލީހުގެ ނިޒާމު ގެއްލިގެން ޖަލްސާ ކުރިއަށް ނުގެންދެވި ގެންނެވެ. އެދުވަހުގެ ޖަލްސާގައި، ރައްޔިތުންގެ މަޖިލީހުގެ ދާއިމީ ކޮމެޓީތަކަށް މެމްބަރުން އައްޔަން ކުރުމުގެ މައްސަލާގައި އިދިކޮޅު އެމްޑީޕީ މެންބަރުން ނިޒާމީ މައްސަލަ ނަންގަވައި އަޑުގަދަ ކުރައްވަން ފެއްޓެވެމުން މަޖިލީހުގެ ނިޒާމް ގެއްލިގެން ދިޔުމުން ރިޔާސަތުގައި އިންނެވި މަޖިލީހުގެ ރައީސް އަބްދުﷲ މަސީޙް މުހައްމަދު ވިދާޅުވީ "މަޖިލީހުގެ ދައިމީ ކޮމެޓީތައް އެކުލަވާލުމުގެ މައްސަލަ ހައްލު ކުރެއްވުމަށް މަޖިލީހުގައި ހިމެނޭ ޕާޓީތަކުގެ އިސްވެރިންނާ މަޝްވަރާ ކުރެއްވުމަށް މަޖިލީހުގެ ޖަލްސާ މެދު ކަނޑުއްވާލެއްވީ" ކަމަށެވެ.

ރައްޔިތުންގެ މަޖިލީހުގެ ޖަލްސާ މާދަމާ ފަށަން ހަމަޖައްސާފައިވާއިރު ވެސް ސިޔާސީ ޕާޓީތަކުގެ މެދުގައި، ކޮމިޓީ ހޮވުމުގައި އޮތްހިޔާލު ތަފާތުވުން ނިމުމަކަށް އައިސްފައެއް ނުވެއެވެ.